EFETIKILO 45
45
1Oco Yosefe ka tẽlele vali oku likandangiyila kowiñi wosi wo ñuala, yu wa kaluka hati, Omanu vosi va nunde. Oco lumue wa kala la Yosefe eci a lisitulula ku vahuvaye. 2Kuenje wa sukoka oku lila okuti va Egito va ci yeva, lonjo ya Fareo ya ci yevavo. 3Yosefe yu wa popia la vahuvaye hati, Ame Yosefe. Tate yo lomuenyo? Vahuvaye ka va tẽlele oku u tambulula momo vo salukila enene.
4Oco Yosefe wa popia la vahuvaye hati, Kokeli ocipepi. Kuenje vo kokela. Eye wa popia lavo hati, Ame manjene Yosefe, una wa landisili ke Egito. 5Ko ka yokoki. Ko ka litemẽli ño omo wa ndandisili kulo; momo Suku wa numa oku livanga kovaso yene oku popela ovimuenyo. 6Momo ulima ulo vali elambu li kasi vofeka, kuenje kua kamba vali alima atãlo okuti ka ku kala oku lima, ndaño oku ungula. 7Suku wa numa oku livanga kovaso yene okuti nda supisili vamue kilu lieve, kuendavo okuti ene ndu muisi epuluko linene. 8Oco heneko wa numi kulo, te Suku, kuenje suku wa ñapa nda isia ya Fareo, haime muẽleonjo yaye yosi, haime ndukulu wofeka yosi ye Egito. 9Yayuliko, lamaneli ku tate, ko sapuiliko hoti, Omõlove Yosefe wa popia hati, Suku wa ñapa ukulu wofeka yosi ye Egito. Lokila kulo. Ku ka taluke. 10O tunga vofeka ya Gosene, o kala ocipepi lame, ove lomãla vove, lomãla vomãla vove, lolomeme viove, lolongombe viove, la cosi wa fuka, 11omo hu tekuila. Momo kua siala vali alima atãlo elambu, kuenje kuli ohele sanga ove, lonjo yove, la viosi wa fuka wiñili vusuke. 12Cilo, ovaso ene a mõla, lovaso a manjange Benjamini laovo a mõla okuti omẽla wange muẽle wa popia lene. 13Sapuili tate ulamba wange wosi wa mulo ve Egito, lovina viosi wa mõli. Yayuliko. Neni tate kulo. 14Noke wa petamẽla kosingo ya manjaye Benjamini kuenje wa lila. Benjamini leyevo wa lililavo kosingo yaye. 15Yosefe wa sipula vahuvaye vosi loku va lilila, kuenje vahuvaye va vangula laye noke.
16Eci ca yevala vonjo ya Fareo okuti vahuva a Yosefe veya, oco Fareo lakuenje vaye va ci sanjukila ca lua. 17Kuenje Fareo wa popia la Yosefe hati, Sapuila vahuvove, huti, Tuiki ovimbulu viene, katuki, kuendi kofeka ya Kanana. 18Kopilili isiene lapata ene, enjui kokuange; ndu wihi eci ca velapo covofeka ye Egito; vu lia elau liofeka. 19Va sapuilavo huti, Tambuli akãlu ofeka ye Egito, kopilimo otumãla tuene lakãi vene la isiene, enjui. 20Ko ka sokololi ovikuata viene, momo elau liofeka yosi ye Egito olio liene.
21Omãla va Isareli va ci linga. Yosefe wa va iha akãlu ndeci ca popia Fareo, kuenje wa va iha ohuta yokonjila. 22Wa va ihavo omunu omunu ovowalo avali, Bejamini puãi wa wiha ovita vitatu kolopalata lovowalo atãlo. 23Ku isiaye wa tuma ndomo: ekui liovimbulu via ambata ovina viwa vie Egito, lekui liovimbulu violomange via ambata otiliku lokulia lohuta ya isiaye yovonjila. 24Yu wa katula vahuvaye kuenje va enda, wa vosika, hati, Ko ka liyenji vonjila. 25Oco va tunda ke Egito, va enda kofeka ya Kanana, ku isiavo Yakoba. 26Vo sapuila vati, Yosefe yu lomuenyo, haeye ukulu wofeka yosi ye Egito. Poku ci yeva Yokoba wa si oku ambuka omo ka kolelele olondaka viavo. 27Puãi eci vo sapuila olondaka viosi Yosefe a popia lavo, leci a mõla akãlu Yosefe a tuma oku wupa, oco utima wa isiavo Yakoba wa petuka. 28Kuenje Yakoba, haeye Isareli, wa popia hati, Ci tẽla. Omõlange Yosefe o kasi lomuenyo. Ngenda ho vanja osimbu sia file.
Currently Selected:
EFETIKILO 45: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
