EFETIKILO 46
46
1Oco Isareli wa katuka, wa enda la cosi a kala laco, yu weya ko Bereseva kuenje wa lumbila Suku ya isiaye Isake ovilumba. 2Suku wa popia la Isareli vovinjoinjoi viuteke hati, A Yakoba, a Yakoba! Eye hati, Ame ulo. 3Oco wa linga hati, Ame Suku, ndi Suku ya so. Ku ka yokokele oku lokila ke Egito, momo oko hu lingisila ofeka yinene. 4Ame ngenda love toke ke Egito, haime hu tiula vali; lovaka a Yosefe a viula ovaso ove. 5Yakoba yu wa tunda ko Bereseva. Omãla va Isareli vambatela isiavo Yakoba lotumãla tuavo lakãi vavo vakãlu Fareo a tuma oku wambatelamo. 6Vambatavo ovinyama viavo lukuasi va fukila vofeka ya Kanana; veya ke Egito, eye Yakoba lepata liaye liosi, okuti 7omãla vaye valume lolonekulu viaye vialume, lomãla vaye vakãi, lolonekulu viaye viakãi via citiwa lomãla vaye valume. Epata liaye liosi wa enda lalio ke Egito.
8Olonduko viomãla va Isareli veya ke Egito vievi, Yakoba lomãla vaye; Ruvene eye nuñulu ya Yakoba. 9Omãla va Ruvene vava; Hanoke, Falu, Hecirone la Karimi. 10Omãla va Simeone vava: Yemuele, Yaminu, Ohada, Yakina, Cohara la Saulu eye omõla ukãi u Kanana. 11Omãla va Lewi vava: Gerisiono, Kohata, la Merari. 12Omãla va Yuda vava: Ere, Onane, Sela, Perese la Seraye. Ere la Onane ovo va fila vofeka ya Kanana. Omãla va Perese ovo Hasoroni la Humuli. 13Omãla va Yisakare vava: Tola, Puva, Yovi, la Simironi. 14Omãla va Sevulono vava: Serede, Eloni la Yahilele. 15Ovo omãla va Lea valume a citila la Yakoba ketapi li Arama kuenda omõlaye ukãi Dina. Ovimuenyo viosi viomãla vaye valume lomãla vaye vakãi va tẽla akui atatu la vatatu. 16Omãla va Gadi vava: Sifoni, Hagi, Ecibone, Eri, Arodi, kuenda Areli. 17Omãla va Asiere vava: Yimena, Yisiba, Yisivi, Beriya, la Seraye mukãi wavo. Omãla va Beriya vava: Heveru, la Malakiyeli. 18Ovo omãla va silipa u Lavane a eca komõlaye Lea, avandeti wa cita ku Yakoba ekui lioviumenyo lepandu. 19Omãla va Rahele ukãi wa Yakoba, Yosefe la Benjamini. 20Yosefe kofeka ye Egito wa citilako Manase la Efarimi avandeti Asenate omõla a Potifera ocitunda ca Oni wa va cita laye. 21Omãla va Benjamini vava: Bela, Bekare, Asifele, Gera, Namana, Ehi, Rosi, Mupimi, Hupimi la Aride. 22Ovo omãla va Rahele va citiwa la Yakoba, ovimuenyo viosi ekui la vikuãla. 23Omãla va Dani vava: Husimi. 24Omãla va Nafitali vava: Yaciyele, Guni, Yesere, la Silemi. 25Ovo omãla va Biliha u Lavane a eca komõlaye Rahele, haivo a cita la Yakoba, vosi yavo epanduvali. 26Omanu vosi veya la Yakoba ke Egito, ava a licitila, okuti akãi volohueli vomãla va Yakoba havoko, omanu vaco vosi va tẽla akui epandu lepandu. 27Omãla va Yosefe, ava a citila ve Egito, vavali. Omanu vosi vonjo ya Yakoba veya ke Egito va tẽla akui epanduvali.
28Wa tuma Yuda okuti eye o livanga oku pitila ku Yosefe loku pula ndomo va enda ko Gosene; kuenje va pitila kofeka ya Gosene. 29Yosefe wa sokiya ekãlu liaye kuenje wa enda oku ka ñualehela la isiaye Isareli ko Gosene. Wa limõlehisa kokuaye, wa petamẽla kosingo yaye, wo kuata loku lila ca lua. 30Isareli yu wa popia la Yosefe hati, Cilo omo nda mõla ocipala cove, kuenje nda kuliha okuti haimo o kasilili lomuenyo, ndaño ndi fa, si fi vali lesumuo. 31Oco Yosefe wa popia la vahuvaye, lonjo yosi ya isiaye hati, Ngenda ha sapuila Fareo. Mopia laye siti, Vahuvange lonjo ya tate va kaile vofeka ya Kanana veya kokuange. 32Alume vaco ovangombo, ya lisa lisa ovinyama, veya lolomeme viavo lolongombe viavo la cosi cavo. 33Eci Fareo a vu kovonga, kuenje u puli hati, Upange wene we? 34ene vu kumbulula hoti, Akuenje vove vakuakulisa ovinyama tunde kutila wetu toke cilo, letu lolosekulu vietu, —okuti vu tunga vofeka ya Gosene; momo wosi ungombo o pembuiwa la va Egito.
Currently Selected:
EFETIKILO 46: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
