EFETIKILO 44
44
1Oco wa sapuila kalei konjo yaye hati, Yukisi olonjeke vialume lovilia viosi va tẽla oku ambata. Kapa olombongo viomunu omunu komẽla yonjeke yaye. 2Lokopo yange, yina yopalata, yi kapa komẽla yonjeke yumãlehe, lolombongo viotiliku yaye. Yu wa linga ndeci Yosefe a popia. 3Eci kua ca alume va katuiwa, ovo muẽle lovimbulu viavo. 4Eci ka va endele kupãla enene limbo, oco Yosefe wa popia la kalei konjo yaye hati, Katuka, landula alume vaco. Eci o va sanga, popia lavo huti, Nye wa fetuluinyili uwa lũvi? 5Nye wa ivili okopo yange yopalata? Siti oyo ya nyuila nyuila cime cange, haiyo o tãha tãha layo? Eci wa lingi cĩvi muẽle.
6Eci a va landula oco a popia lavo olondaka evi. 7Ovo vo kumbulula vati, A cime cetu, nye wa popela olondaka evi? Ci kola muẽle kakuenje vove oku ci linga. 8Ocili olombongo vina tua sangele kimẽla violonjeke vietu, tuaile lavio ko Kanana, tua vi tiula vali kokuove. Oco hẽ, ci tava ndati okuti tu iva vonjo ya cime cove opalata pamue ulu? 9U wosi pokati kakuenje vove o sangiwa layo a fe, letu le tu linga apika va cime cange. 10Eye wa linga hati, Ci lingiwe ndomo wa popi. U wosi o sangiwa layo, eye o linga upika wange. Vakuavo va linga omãla vamãle. 11Oco va yayulako, va tulila posi kuenje va kutulula, omunu onjeke yaye, omunu onjeke yaye. 12Yu wa tingusolamo, wa fetikila kukulu toke wa pitila kumãlehe, kuenje okopo ya sangiwa vonjeke ya Benjamini. 13Oco va tola tola uwalo wavo; va tuika ovimbulu viavo, omunu omunu, kuenje va tiukila vimbo.
14Eci Yuda la vamanjaye va pitila konjo ya Yosefe, eye haiko a kala, kuenje va wila posi, vo fendela. 15Yosefe wa popia lavo hati, Eci wa lingi oco nye? Ko ci hẽ okuti ulume ndame o tẽla oku tãha? 16Yuda wo kumbulula hati, Tu popia ndati la cime cange? Tu vangula nye? Tu liyovuisa ndati? Suku wa sanga ohole yakuenje vove. Ocili vosi, letu lu wa sangiwa lokopo peka, tua linga apika va cime cange. 17Eye puãi wa linga hati, Ci kola ame oku linga ndoco. Ulume wa sangiwa lokopo peka eye o linga upika wange; ene puãi ku endi ño lombembua ku isiene.
18Oco Yuda weya kokuaye, wa popia laye hati, A cime cange, ci tave okuti va yevelela eci ci popia ukuenje wove; ka va ka teme ño lukuenje wove, momo ove wa lisoka la Fareo. 19Cime cange wa pula akuenje vaye hati, Vu kasi la isiene pamue manjene ale? 20Etu tua sapuila cime cange tuti, Tu kasi la tate, ekongo, kuenda omõla a cita lukongo waye, eye kuasula, huvaye wa fa, eye lika wa siala omõla a inaco. Isiaye u sole. 21Kuenje wa popia lakuenje vove huti, U neni kokuange okuti nda mõla lovaso ange. 22Etu tua sapuila cime cange tuti, Umãlehe ka tẽla oku sia isiaye, momo nda u sia isiaye o fa. 23Ove wa popia lakuenje vove huti. Nda manjene kuasula keya kulo lene, ko mõli vali ocipala cange. 24Eci tua tiukila kukuenje wove, tate, oco tuo sapuilako olondaka via cime cange. 25Leci tate a popia letu hati, Tiukili, ka tu landeliko vali okakulia, 26etu tuo kumbulula tuti, Ka tu tẽla oku lokilako. Nda manjetu umãlehe enda letu tu lokilako; momo ka tu tẽla oku mõla ocipala culume waco te nda manjetu kuasula o kasi letu. 27Oco ukuenje wove, tate, wa popia letu hati, Vu ci okuti ukãi wange wa nyitila omãla vavali valume; 28umosi wa nyehiwa kuenje nda linga siti, Ka ci pumbi okuti wa nyanyoha, kuenje toke cilo sio muĩle vali. 29Nda vu njupa vali undeti, kuenje cimue cĩvi cu veta, owele wange u wiñisi lesumuo vonjembo. 30Oco cilo nda mitila kukuenje wove, tate, lumãlehe ka kasi letu, omo utima waye wa lipandeka lutima wumãlehe waco, 31eci a mõla okuti umãlehe keko, o fa muẽle kuenje akuenje vove va iñisa owele wukuenje wove, tate, konjembo loku sumua. 32Momo ame, ndukuenje wove, nda likapa onjeke yumalehe ku tate, siti, Nda siu nena vali loku weca peka liove eko liaco li kale kokuange oloneke vi enda ño hũ. 33Oco ukuenje wove a kale upika pomangu yumãlehe wa cime cange; umãlehe a ende kumue la vahuvaye. 34Momo ame mitila ndati ku tate nda umãlehe sia ile laye? Ñuete ohele la tate sanga ohali yaco yu luila enene.
Currently Selected:
EFETIKILO 44: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
