EFETIKILO 43
43
1Elambu lia lua enene vofeka. 2Eci va mãla otiliku va kopile ke Egito, isiavo wa popia lavo hati, Tiukiliko, ka tu landeli vali kamue okakulia. 3Yuda puai wo kumbulula hati, Ulume waco wa tu toñamãile muẽle, hati, Ko mõli vali ocipala cange te nda weyi la manjene. 4Nda wa tava okuti tu enda la manjetu, tu lokilako, tu ku landela okulia. 5Puãi nda ku tava oku u weca, ka tu endi, momo ulume waco wa tu popia hati, Ko mõli vali ocipala cange te nda weyi la manjene. 6Isareli hati, Wa ndingili nye ũvi waco woku sapuila ulume waco okuti vu kasi vali la manjene? 7Ovo vati, Ulume wa tu pula pula ondaka yetu, londaka yoluse luetu hati, Isiene hẽ, haiko a kasi lomuenyo? Vu kuete vali manjene? Kuenje tuo sapuila ndomo a tu pula pula. Tu ci kulĩha ndati okuti o linga hati, Neni manjene kulo? 8Yuda yu wa popia la isiaye Isareli hati, Nyihe ño umãlehe, ngende laye, oco tu katuka, tu enda, okuti tu kala lomuenyo, ka tu fi vali, letu love lotumãla tuetu. 9Ame ndinga onjeke yaye, ove u silĩha peka liange. Nda siu nena vali loku weca peka liove, eko liaco li kale kokuange oloneke vi enda ño hũ. 10Momo nda ka tua talukile, nda tua tiuka ale, kuenje onjanja eyi nda yavali.
11Isiavo Isareli wa popia lavo hati, Nda oco ci kasi ocili, ya, lingi ndomo: Longeki volonjeke viene ovina vimue via kemãla kulo kofeka yetu, ndokuti okakokoto lokawiki, olosimbolua lulela, olonendo lomendua, ka vi tuali kulume waco ndombanjaile. 12Lolombongo va vi tiuwile kovimẽla violonjeke viene, tiukili lavio, mbi va lueya. Vokinyiko vali evi via lisoka lavio. 13Ambativo manjene, katuki, tiukili kulume waco. 14Suku Ukuonenewosi o muisi ohenda kulume waco ndokuti o ko panduluili manjene ukuavo la Benjamini. Nda nda nyẽhiwa omãla vange, sumua enene. 15Oco alume vambata ombanjaile yaco, lolombongo vina via tiuka levi via vokiyiwa, kuenda manjavo Benjamini. Va katuka, va lokila ke Egito, kuenje va pitila ku Yosefe.
16Eci Yosefe a mõla Benjamini kumosi lavo oco wa pañinya kalei konjo yaye hati, Iñisa ovalume vaco vonjo, va ipaila ocinyama. Pongiya okulia momo va lia lame ekumbi pongunji. 17Kalei wa linga ndeci co tuma Yosefe, kuenje wa tuala ovalume vonjo ya Yosefe. 18Alume va yokoka omo va va iñisa vonjo ya Yosefe, va popia vati, Omo onjanja yatete tua tiukilile lolombongo volonjeke vietu oco va tu iñisila. Cilo o kasi loku tu seselela ha tu undumũhila okuti etu tu linga apika vaye, lovimbulu vietu vi linga viaye. 19Oco va enda ku kalei konjo ya Yosefe, va popela laye puvelo wonjo, 20vati, Avoyo a cime cetu, onjanja vatete eci tueyile oku landa okulia, 21oku pitila kocilombo tua kutulula olonjeke vietu kuenje tua sanga olombongo vievi kolomẽla violonjeke vietu, omunu omunu, viosi via suapo ndomo via kaile. Cilo tua vi nena vali. 22Tua ambatavo olombongo vikuavo vioku landa okulia. Ka tua kulĩhile u wa kapele olombongo volonjeke vietu, nda helie nda helie. 23Eye hati, Kali lombembua, ko ka yokoki ño. Ka ci pumbi okuti Suku yene, haeye Suku ya isiene, eye wa kapa olombongo volonjeke viene. Ame nda tambuile olombongo viene. Oco wa nena Simeone, wo weca kokuavo. 24Kalei wa iñisa alume vonjo ya Yosefe, kuenje wa va iha ovava oku sukula olomãi viavo. Wa ecavo okulia kovimbulu viavo. 25Ovo muele va pongiya ombanjaile yoku eca ku Yosefe eci a tiuka ekumbi pongunji, momo va yeva ale okuti omo va lila okulia.
26Eci Yosefe eya konjo vo nenela ombanjaile vo wambatela, va petamẽla posi, vo fendela. 27Eye wa va pula ndomo va kasi hati, Isiene yo ciwa, ekongo lina wa tukuili? Haimo a kasilili lomuenyo? 28Ovo vo kumbulula vati, Ukuenje wove tate yu ciwa. Haimo a kasilili lomuenyo. Kuenje va petamako, vo fendela. 29Yu wa petula ovaso aye kuenje wa mõla manjaye Benjamini, omõla a inaye. Wa pula hati, Eye u epalanga liene wa nukuilili? Suku a ku linga ohenda, amõlange. 30Yosefe yu wa tundako lonjanga momo wa kala longeva la manjaye, kuenje wa sanda apa a lilila. Wa iñila vohondo yaye, wa lililamo. 31Noke wa pusa kocipala caye, kuenje wa tunda. Wa likandangiya ca lua kuenje hati, Kapi okulia komesa. 32Kuenje vo tumbikila okulia lika waye, lavovo lika liavo, la va Egito va lila lila vonjo yaye, lavovo lika wavo, momo va Egito ka va tẽla oku lila pamosi la va Heveru. Oku lila pamosi la va Heveru ku linga elaviso ku va Egito. 33Ovo va tumãla kovaso aye, nuñulu yaco, komangu yunuñulu la kuasula yaco komangu ya kuasula, kuenje ovalume va livanja loku komõha. 34Komesa ya Yosefe oko kua tunda ovilia via enda kokuavo, puãi okulia kua Benjamini kua lua ca soka lutãlo, kua vosi vakuavo ku sule. Oco va nyua muẽle kuenje vo sanjukila ca lua.
Currently Selected:
EFETIKILO 43: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
