EFETIKILO 42
42
1Eci Yakoba a yeva okuti ke Egito kuli otiliku, oco wa popia lomãla vaye hati, Nye vu livanjeli ño? 2Yu wa linga hati, Ocili nda yeva okuti ke Egito kuli otiliku, lokiliko, ka tu landeliko, okuti tu kala lomuenyo, ka tu fi vali. 3Oco vahuva ekui va Yosefe va lokila ke Egito oku landa otiliku. 4Puãi Bejamini, manja a Yosefe, Yakoba ko tumile la vahuvaye hati, Sanga cimue cĩvi cu kuata. 5Omãla va Isareli va endela kumosi lomanu vakuavo oku ka landa otiliku, momo vofeka ya Kanana mua kalavo elambu.
6Yosefe, ukulu wofeka, eye wa landaisa komanu vosi vakuafeka. Oco vahuva a Yosefe veya, kuenje wa petamela posi, vo fendela. 7Yosefe oku mõla vahuvaye wa va limbuka, puãi wa liviaviaya ndu ka va kũlĩhile. Wa popia lavo lukãlu hati, Wa tundi pi? Ovo vati, Tua tunda kofeka ya Kanana. Tueyilila oku landa okulia. 8Oco Yosefe wa limbuka ocili vahuvaye, ovo puãi ka vo limbukile. 9Yosefe yu wa ivaluka olonjoi a va lotaila, kuenje wa popia lavo hati, Ene vulondavululi, weyilili oku vanja usuke wofeka yetu. 10Ovo vo kumbulula vati, Hacoko a cime cetu. Ovakuenje vove veyilila oku landa okulia. 11Etu vosi tumãla vulume umosi. Tuvakuacili muẽle, ovakuenje vove halondavululiko. 12Eye wa popia lavo hati, Kotoko, wiyilili muẽle oku vanja usuke wofeka yetu. 13Ovo vati, Etu tuakuenje vove tu kasi ekui la vavali, tumãla vulume umosi vofeka ya Kanana. Kuasula wa siala la tate, ukuavo keko. 14Puãi Yosefe wa va kumbulula hati, Ci kasi muẽle ndeci nda popia okuti ene vulondavululi. 15Oco vu setekiwa ndomo: Ndi lisinga lomuenyo wa Fareo okuti ko tundi palo te manjene Kuasula weya. 16Tumi umue pokati kene, a kope manjene, vakuavo va siala olohute. Oco olondaka viene vi setekiwa nda hẽ viocili nda ndati. Nda hacoko, ndi lisinga lomuenyo wa Fareo okuti vulondavululi. 17Kuenje wa va kapa vosi yavo pamosi vokayike oloneke vitatu.
18Eteke liatatu Yosefe wa popia lavo hati, Lingi eci kuenje vu kala lomuenyo, omo ame nda sumba Suku. 19Nda wakuacili, umosi pokati kene a kale ño vokayike, vakuavo va ende, va ka tuale otiliku kolonjo viene omo elambu lia lua. 20Puãi wiyi vali keunje vu nenela manjene, Kuasula, oco olondaka viene vi linga viocili, kuenje ko fi. Oco va ci linga. 21Kuenje va livangula pokati vati, Ocili muẽle ondaka ya manjetu tua pia, tua muĩle ndomo co vala kutima cina a tu lipilikila kuenje ka tuo yevelele, oco muẽle ongongo eyi ya tu vetela. 22Ruvene wa va tambulula hati, Sia ci popele lene siti, Ko ka lingi ño ekandu kumãlehe, keunje ka wa njeveli? Oco cilo osonde yaye ya pilikiwa. 23Ovo puãi ka va kulĩhile okuti Yosefe o va yevite, momo kapitiya wa kala pokati kavo. 24Yu wa litepa lavo, wa lila, noke wa tiukila kokuavo, kuenje wa vangula lavo. Yu wa kuata simeone pokati kavo, kuenje wo kutila kovaso avo. 25Kuenje Yosefe wa handeleka oku yukisa olonjeke viavo lotiliku, kuenda oku va tiuwila olombongo viavo, omunu vonjeke yaye, omunu vonjeke yaye, loku va iha ongaso yovonjila. Oco ca lingiwila.
26Ovo va tuika otiliku yavo kovimbulu kuenje va tundako. 27Eci umue a kutulula konjeke yaye oku eca okulia kocimbulu caye kocilombo, oco a mõla olombongo viaye vievi komẽla vonjeke yange. 28Yu wa popia la vievi mũlo vonjeke yange. Kuenje ovitima viavo via suangala. Va lipula pokati loku luluma vati, Eci nye Suku a tu ci lingila?
29Eci va pitila ku isiavo Yakoba, kofeka ya Kanana, oco vo sapuilako cosi ca pita lavo, vati, 30Ulume waco, ukulu wofeka wa tu kelõhaila, wa tu lundila hati, Vulondavululi viofeka. 31Etu tua popia laye tuti, Tulondingesunga muẽle, hatulondavululiko. 32Tu kasi omanu ekui la vavali ku tate, umosi keko, Kuasula kuetu wa siala la tate vofeka ya Kanana. 33Ulume waco ukulu wofeka, yu wa popia letu hati, Kondaka yilo mopia ndeti oko ndimbukila okuti wakuacili. Silipo umue pokati kene. Vakuavo va ende, va ka tuale otiliku kolonjo viene omo elambu lia lua. 34Eci wiyi, neneli manjene Kuasula, oco ndimbuke okuti havulondavululiko puãi wakuacili. Ndu wihi vali manjene kuenje vu pavola vofeka.
35Eci va sukumũla olonjeke viavo, oco omunu lomunu vonjeke yaye wa sangamo ocikutila caye colombongo. Poku mõla ovikutila violombongo viavo volonjeke, oco ovo muẽle kuenda isiavo vosi va yokoka. 36Isiavo Yakoba wa popia lavo hati, Wa mumbisi muẽle omãla vange. Yosefe keko, Simeone layevo wa siala, cilo vu yongola oku enda la Banjamini. Ovina evi viosi via mbeta. 37Ruvene yu wa popia la isiaye hati, Nda sio nenele vali kokuove, ove ipa omãla vange valume vavali. U kundika ño peka liange kuenje ame ndu tiula vali kokuove. 38Yakoba puãi wa popia hati, Omõlange ka endi muẽle lene, momo huvaye wa fa, eye lika wa sialapo. Nda cimue cĩvi cu veta vonjila wendi, owele wange vu wiñilisi lesumuo vonjembo.
Currently Selected:
EFETIKILO 42: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
