EFETIKILO 41
41
1Kovaso yanyamo avali Fareo wa lota onjoi yokuti wa talama kolui Nilu. 2Kuenje volui mua tunda epanduvali liolongombe violomange, via posoka, haivio via neta, kuenje via lila kociyombo. 3Noke volui mua tunda vali epanduvali likuavo liolongombe violomange, ka via posokele, haivio via kopa, ovio via talama pamosi lolongombe vikuavo kocingeingei colui. 4Kuenje olongombe vina ka via posokele, haivio via kopa, via lia olongombe epanduvali via posoka, haivio via neta. Oco Fareo wa pasuka. 5Wa pekela vali, kuenje wa lota onjoi yikuavo yokuti apunga epanduvali a tunda kocisila cimosi a pindala, awa. 6Kuenda vali, apunga epanduvali a kupa, hao ovuka lofela yovonano, a tundila vemehi liana a posoka. 7Kuenje apunga a kupa a lia apunga epanduvali a pindala, awa. Oco Fareo wa pasuka, kuenje ca kala onjoi. 8Omele utima waye wa sakalala, yu wa tumila ovimbanda viosi vio ke Egito lolonoño viaco viosi, kuenje Fareo wa va sapuilako onjoi yaye, puãi ka kua kaile u wa ci tẽla oku vi lomboluila Fareo.
9Oco kalei ka vakuavinyu wa popia la Fareo hati, Etaili njivaluka ekandu liange. 10Eci Soma a temelele akuenje vaye, kuenje ame la kalei ka vakualombolo, wa tu kapele vokayike vonjo ya kesongo liakuenje velombe, 11oco, uteke waco kavali ketu tua leta olonjoi, omunu onjoi yaye, omunu onjoi yaye; onjoi lonjoi ya kala lelomboluilo liaye. 12Tua kalamo lumãlehe umue u Heveru, ukuenje wa kesongo liakuenje velombe. Eci tuo sapuilako olonjoi vietu, eye wa tu vi lomboluila. Wa tu lomboluila omunu ndonjoi yaye, omunu ndonjoi yaye. 13Ndeci a tu lomboluila haico ca pita; ame nda tiuka vali komangu yange; kalei kolombolo puãi wa nyoñamisua.
14Oco Fareo wa tumila Yosefe kuenje vokayike vo wupamo lokanyanyu. Eci a lipemũla loku lipongolola uwalo, wa enda ku Fareo. 15Fareo wa popia la Yosefe hati, Nda lota onjoi kuenje ka kuli u o yi lombolola. Nda yeva okuti ove nda wa yeva onjoi o ci tẽla oku yi lombolola. 16Yosefe wa tambulula Fareo hati, Ndimamãle. Suku eca etambululo liombembua ku Fareo. 17Oco Fareo wa lomboluila Yosefe hati, Konjoi yange ca kala okuti nda talama kocingeingei colui Nilu, 18kuenje volui mua tunda epanduvali liolongombe violomange, via neta, haivio via posoka; via lila kociyombo. 19Noke mua tunda vali epanduvali likuavo liolomgombe violomange, ovio puãi via sueka, via vĩha, haivio via kopa. Sia la mõla vofeka yosi ye Egito olongombe via vĩha ndovio. 20Kuenje olongombe via sueka, haivio via kokua, via ina epanduvali liolongombe via tetekela, havio via neta. 21Puãi eci via vi ina ka ca limbukiwile okuti via vi lia, momo via mõleha ño okuti via kokua ndeci kefetikilo. Oco nda pasuka. 22Nda mõla vali vonjoi yange, kuenje epanduvali liapunga a ima kocingenge cimosi; apunga aco a pama, hao a posoka; 23kuenda vali epanduvali liapunga a kukuta, hao a kupa, hao ovuka lofela yovonano, a tundila konyima yao. 24Kuenje apunga ovuka a ina apunga epanduvali awa. Nda sapuila ovimbanda, kuenje u o yi ndomboluila ka kua kaile.
25Yosefe yu wa kumbulula Fareo hati, Onjoi ya Fareo yimosi. Eci Suku a soka oku linga oco a molẽhisa ku Fareo. 26Olongombe epanduvali via pindala, ovio alima epanduvali; lapunga epanduvali a posoka, laovo alima epanduvali; onjoi yaco yimosi. 27Olongombe epanduvali via sueka, haivio via viha, via kuama konyima yavio, ovio alima epanduvali, kuenda epanduvali liapunga a kupa hao ovuka lofela yonano, o-o alima epanduvali elambu. 28Oco eci nda popia la Fareo haico ci kasi okuti, Suku wa lekisa ku Fareo eci a sima oku linga. 29Ku kala epanduvali lianyamo elau lia lua kofeka yosi ye Egito. 30Konyima yao ku kala epanduvali lianyamo elambu, ndokuti elau liosi livaliwa vofeka ye Egito, kuenje elambu li nyõla ofeka. 31Ka va kuliha vali elau vofeka, momo elambu li kuamako li piãla. 32Kuenje onjoi yaco ya lotiwa olonjanja vivali la Fareo momo ondaka yaco ya kolisiwa la Suku, kuenje Suku o yayulako oku ci linga. 33Cilo Fareo a vanje ulume wa lunguka, ukualondunge, ho kapi ukulu wofeka ye Egito. 34Fareo a fetike oku nõla vakapusu kofeka ha va tepa onepa yatãlo kofeka ye Egito pokati kanyamo epanduvali elau. 35Vongolole ovilia viosi vianyamo elau a laika oku iya, loku soleka olomema, ndondaka ya Fareo, oku vi seleka okuti vi linga okulia kuovaimbo. 36Ovilia evi vi linga eteku lianyamo epanduvali elambu ana a laika oku iya kofeka ye Egito, ndokuti ofeka ka yi nyolẽha lelambu.
37Ondaka yaco ya sunguluka ku Fareo lo kakuenje vaye vosi. 38Fareo wa popia lakuenje vaye hati, Tu sanga hẽ ulume wa sesamẽla omangu yaco ndokuti Espiritu lia Suku li kasi laye? 39Fareo yu wa popia la Yosefe hati, Omo suku wa ku lekisa ovina evi viosi, ka kuli umue wa loñoloha pamue ukualondunge te ove. 40Oco ove o viala konjo yange, lomanu vange vosi va pokola kokuove. Kuviali lika ame hu velapo. 41Kuenje Fareo wa popia la Yosefe hati, Tala, nda ku vialeka kofeka yosi ye Egito. 42Kuenje Fareo wopa onẽla komuine waye, wa yi kapa komuine wa Yosefe; wo walisa uwalo wombini yovalatanya; wo kapa elienge liulu posingo yaye, 43kuenje wo londisa vekãlu liavali a kala lalio. Vo kalukila vati, U kekamẽli. Oco wo vialeka kofeka yosi ye Egito. 44Fareo wa popiavo la Yosefe hati, Ame Fareo, vofeka yosi ye Egito lomue omunu o kuata ocipango coku linga cimue pamue oku enda kumue te omoko yaco ya tunda kokuove. 45Fareo yu wa luka Yosefe onduko hati, Safenati-Panehi, kuenje wa wiha ukãi Asenate, omõla a Potifera, ocitunda ca Oni. Oco Yosefe wa ñuala ñuala vovikanjo viosi vie Egito.
46Yosefe wa tẽla akui atatu kanyamo eci a fetika upange waco wa Fareo, osoma ye Egito. Oco Yosefe wa tunda lomoko ya Fareo ha ñuala ñuale kovikanjo viosi vie Egito. 47Pokati kanyamo epanduvali elau osi ya ecaeca okulia kua lua. 48Oco wa konguisa ovilia viosi vianyamo aco epanduvali eci vofeka ye Egito mua kala okulia kua lua. Wa solekisa ovilia vovaimbo. Vovaimbo osi, imbo limbo, wa solekamo ovilia via tunda vovapia avo. 49Yosefe yu wa soleka otiliku yakahandangala, huti ño eseke liokalunga, toke wa tokoka oku yi yonga, omo olonjongo ka vi tendiwa vali.
50Osimbu unyamo welambu ka weyile, Yosefe wa cita omãla vavali valume. Wa va cita la Asenate, omõla a Potifera, ocitunda ca Oni. 51Yosefe wa luka nuñulu yaye hati, Manase, momo hati, Suku wa njivalisa upongo wange wosi kuenda vakuanjo ya tate vosi. 52Omõla wavali wo luka Efarimi hati, Momo Suku wa nyimisila epako vofeka yohali yange.
53Alima epanduvali elau lia kala vofeka ye Egito a pita, 54kuenje alima epanduvali elambu a fetika, ndeci ca popele Yosefe. Kolofeka viosi kua kala elambu, te kofeka ye Egito lika oko kua kala okulia. 55Eci elambu lia pitila kofeka yosi ye Egito, oco va pinga okulia ku Fareo. Fareo wa sapuila ve Egito vosi hati, Kuendi ku Yosefe, ka lingi eci a ko sapuila. 56Eci elambu lia kala volofeka viosi oco Yosefe wa yulula olosila viosi, kuenje wa landisa ku va Egito, momo vofeka ye Egito elambu liaco lia piãla vali enene. 57Olofeka viosi vieya ke Egito, ku Yosefe, oku landa otiliku momo elambu lia piãla volofeka viosi.
Currently Selected:
EFETIKILO 41: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
