EFETIKILO 38
38
1Poloneke viaco ca pita okuti Yuda wa tunda pokati ka vakuvaye kuenje weñila vonjo yulume umue u Adulama, onduko yaye Hira. 2Omo Yuda a muĩla omõla ufeko wu Kanana umue, onduko yaye Siuwa, wo kuẽla kuenje wa litokeka laye. 3Yu we mina, wa cita omõla ulume, wo luka Ere. 4Yu we mina vali, wa cita omõla ulume, wo luka Onane. 5Yu wamako vali, wa cita omõla ulume, wo luka Sela. Wa kala ko Kesivi eci o cita. 6Yuda yu wa kuẽlela nuñulu yaye Ere ukãi, onduko yaye Tamare. 7Puãi Ere, nuñulu ya Yuda, ondingaivi ku Yehova, oco Yehova wo lia. 8Yuda yu wa popia la Onane hati, Kuende, ka kuẽle ukãi wa huvove uminganjo, ka litokeka laye hã hu amisako ombuto yahuvove. 9Onane puãi wa ci kũliha okuti ombuto yaco ka yi lingi yaye, oco eteke a litokeka lukãi wa huvaye wa talamẽla posi okuti ka eci ombuto ku huvaye. 10Kuenje Yehova wa suvuka eci a linga, yu wo liavo. 11Oco Yuda wa popia la ndatembo yaye Tamare hati, Kala umbumba vonjo ya so toke omõlange Sela o kola, momo wa soka hati, Sanga eye o favo ndeci vahuvaye. Oco Tamare wa enda, wa kala vonjo ya isiaye.
12Eci pa pita oloneke oco ukãi wa Yuda, omõla a Siuwa, wa fa. Eci Yuda a lembelekua oco wa lamanẽla kolomemũli viocunda caye ko Timinate, eye lukuavo Hira u Adulama. 13Eci va sapuila Tamare vati, Ndatembo yove yo, o lamanẽla ko Timinate ha pemũla ocunda caye, 14oco Tamare wa lula uwalo waye wumbumba, wa lisikilĩla lonanga, wa tumãla kombundi ya Enama konjila yoko Timinate. Momo wa limbuka okuti Sela wa kula ale, kuenje lopo eye ka eciwile kokuaye ha lingi ukãi waye. 15Eci Yuda o mõla wa soka hati, Omopisi, omo wa lisikilĩla kopolo yaye. 16Wo pambukila konele yonjila, wo peya hati, Linga, ndi litokeke love, momo ko limbukile okuti eye ndatembo yaye. Eye hati, O nyiha nye nda o litokeka lame? 17Eye wa linga hati, Hu tumisa okamõla kohombo kovocunda. Eye hati, O nyiha onjeke toke o ka tumisa? 18Eye hati, Onjeke ye hu iha? Eye hati, Onẽla yove lukolo wove kuenda ombueti o kasi layo peka. Yu wo vi avela, kuenje wa enda, wo minisa. 19Oco Tamare wa katuka, wa enda, kuenje wa lula onanga yaye, wa wala uwalo wumbumba.
20Eci Yuda a tuma okamõla kohombo peka liumue u Adulama, oku ka tambula onjeke yaco peka liukãi, u wa tumiwa ko sangele. 21Oco wa pula ovalume vofeka yaco hati, Omopisi ya kaile ke Enama konele yonjila yi kasi pi? Ovo vati, Kulo ka kuli omopisi. 22Yu wa tiukila ku Yuda, wo sapuila hati, Sio sangele, kuenje ovalume vofeka va popiavo vati, Kulo ka kuli omopisi. 23Yuda wa kumbulula hati, Kala lako ño, sanga va tu yola epembe. Cinene nda tumile okahombo kohuminyo, ove puãi kuo sangele.
24Eci pa pita olosãi vitatu oco va sapuila Yuda vati, Tamare, ndatembo yove, wa linga ukahonga, kuenje kukahonga waco we mina. Yuda hati, U tundisi, a yokiwe. 25Eci vo tundisa eye ufeko wa tuma ondaka ku ndatembo yaye hati, Imo ñasi lalio liulume ukuavina evi. Wa popiavo hati, Va limbuke ño ovina evi, onẽla, lukolo, lombueti, vielie? 26Yuda wa vi limbuka, wa linga hati, Eye ukuesunga, ame hameko, momo sio wihile omõlange Sela. Kuenje ko kulĩhile vali.
27Eci eteke liaye lioku cita lieya, vimo liaye mua kala olonjamba. 28Oco eci ca keya poku cita kua tunda eka. Ucitisi yu wa kuata eka liaco wa kutako ukolo u kusuka, hati, Ulo eye wa tunda tete. 29Oco eci a ka tiula eka, mua tunda manjaco. Ucitisi hati, Wa tepako ndati? Kuenje onduko yaye ya lukiwa Perese. 30Noke mua tunda manjaco lukolo u kusuka peka liaye, kuenje wa lukiwa Sera.
Currently Selected:
EFETIKILO 38: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
