EFETIKILO 39
39
1Yosefe vo wambata, va enda laye ke Egito. Potifara, ukulu wa Fareo, kesongo liakuenje velombe, u Egito, wo landa peka lia va Isameli ava veya laye. 2Yehova wa kala la Yosefe kuenje wa linga ukuesumũluho. Wa kala vonjo ya cime caye u Egito. 3Cime caye wa limbuka okuti Yehova wa kala laye, kuenje cosi a linga, Yehova wa ci sumũluisila peka liaye. 4Oco Yosefe wa sanga ohenda kokuaye kuenje wo vumba; yu wo kapa ukalei vonjo yaye, wo kundika ovina viaye viosi. 5Oco tunda keteke liaco eci o kapa ukalei konjo yaye kovina viaye viosi, Yehova wa sumũluisa onjo yu Egito omo Yosefe wa kalamo; esumũluho lia Yehova lia kala kovina viaye viosi viovonjo lokovapia. 6Kuenje wa sia cosi caye peka lia Yosefe; ka kulĩhile vali cimue caye, te lika okulia a lia.
Eye Yosefe osõsi haiye onumbu. 7Kovaso yoloneke vimue ukãi wa cime caye wa vanja Yosefe, yu wo peya hati, Pekela lame. 8Yosefe puãi wo likala, wa popia lukãi wa cime caye hati, Tala, tunda a ñapa kupange cime cange ka kulĩhile vali eci ci kasi vonjo. Cosi caye wa ci kundika peka liange. 9Ndaño eye, ka mbelelepo vonjo yilo, eye ka nemẽlele cimue te ove, momo ove wukãi waye. Oco ame ndinga ndati evĩho eli, hã si kuata ekandu ku Suku? 10Oco ndaño ukãi wa yonja yonja Yosefe eteke keteke, haimo ka tavele oku u yeva loku pekela laye, ndaño oku kala ocipepi laye. 11Puãi eteke limue, eci Yosefe a iñila vonjo oku linga upange waye, kuenje vonjo ka mua kaile omunu ukuavo, 12oco ukãi wo kuata kocikutu caye, wa popia hati, Pekela lame. Yosefe wa sia ocikutu caye peka liukãi kuenje wa tila, wa tundila posamua. 13Oco eci ukãi a mõla okuti wa sia ocikutu peka liaye, kuenje wa tila, 14oco wa kovonga alume vokonjo yaye, wa popia lavo hati, Tali, wa tu nenela u Heveru ha tu lavisa; weya kokuange oku pekela lame kuenje nda vilikiya londaka ya lua. 15Eci a yeva ndomo nda kaluka oku vilikiya, oco wa sia ocikutu caye kokuange, wa tila kuenje wa tundila posamua. 16Ukãi wa kapa ocikutu caco ocipepi laye toke cime caye weya vonjo. 17Eci eya olondaka viaco haivio vimosi o sapuila hati, Ukuenje u Heveru una wa tu nenela, weya kokuange oku ndavisa; 18puãi tuli nda kaluka loku vilikiya, eye wa sia ocikutu caye peka liange kuenje wa tila.
19Eci cime caye a yeva olondaka viukãi waye ndomo o sapuila hati, Oco ca ndinga ukuenje wove, oco onyeño yaye ya wenguka. 20Cime ca Yosefe yu wo kuata, wo yika vokayike omu mua yikiwa olomandekua viosoma. Wa kala muẽle vokayike. 21Puãi Yehova wa kala la Yosefe, wo kuatisa locisola caye ka ci pongoloka, kuenje kalei kokayike wo sola. 22Oco kalei kokayike wa kundika peka lia Yosefe olomandekua viosi viovokayike; kuenje cosi va lingainga eye wa ci lingisa. 23Kalei kokayike ka vanjele vali cimue ca kala peka lia Yosefe, omo Yehova wa kala laye kuenje cosi a linga, Yehova wa ci sumũluisa.
Currently Selected:
EFETIKILO 39: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
