EFETIKILO 37
37
1Yakoba wa tumãla vofeka ya Kanana muna mua vongaila isiaye. 2Lilo olio esapulo liepata lia Yakoba.
Eci Yosefe a kala lanyamo ekui lepanduvali wa lisa lisa olomeme kumue la vahuvaye. Eye umãlehe kuenje wa kala kala lomãla va Biliha kuenda omãla va Silipa, akãi va isiaye; kuenje Yosefe wa sapowaila isiavo ovilinga viavo vivi. 3Ocili Isareli wa solapo ca lua Yosefe, omãla vaye vosi vakuavo ci sule, momo wo cita tupu kukongo. Wo tongisila ombinja yovoko. 4Vahuvaye va limbuka okuti isiavo u sole ca lua, vahuvaye vosi ci sule, kuenje vo suvuka; ka va tẽlele oku popia laye lombembua.
5Kuenje Yosefe wa lota onjoi; wa yi sapuila vahuvaye, kuenje va vokiyako vali oku u suvuka. 6Yu wa popia lavo hati Ndo yeveleli onjoi eyi nda lota. 7Etu tua kala loku kuta ovitungu vepia, kuenje ocitungu cange ca talama vilu; ovitungu viene via ñualako oku fendela ocitungu cange. 8Vahuvaye va popia laye vati, Ove nga o linga osoma yetu, o tu viala? Kuenje vo suvuka vali enene omo ka va solele olonjoi viaye lolondaka viaye. 9Yu wa lota onjoi yikuavo, wa yi sapuila vahuvaye. Wa linga hati, Nda lota vali onjoi, okuti ekumbi losãi lolombungululu ekui lamosi vi kasi loku fendela ame. 10Puãi eci a sapuilako isiaye kuenda vahuvaye, oco isiaye wo lemela hati, Onjoi wa lota ya soka ndati? Ame hẽ la nyoho la vahuvove tuiya hã ha tu wila posi loku ku fendela? 11Vahuvaye vo kuatela ukuse, isiaye puãi wa patekela eci a popia.
12Oco vahuvaye va enda ko Sekeme oku ka lisa oviunda via isiavo. 13Isareli wa popia la Yosefe hati, Vahuvove hẽ, ka va kasi loku lisila ko Sekeme? Enju, hu tume kokuavo. Eye wa kumbulula hati, Ame ulo. 14Oco a popia laye hati, Kuende, ka kulihise vahuvove kumue loviunda, oco wiye o sapuileko ondaka yaco. Oco wo tuma ha tundi kocimbota ca Hevirone, kuenje weya ko Sekeme. 15Ulume umue wo sanga oku tungayala vusenge; kuenje ulume waco wo pula hati, Nye o sandiliya? 16Eye hati, Ñasi loku sandiliya vahuvange; va sapuile oku va kasi oku lisila oviunda. 17Ulume yu wo sapuila hati, Palo va ilukapo, nda va yeva vati, Tu enda ko Dotane. Yosefe yu wa landula vahuvaye kuenje wa va sanga ko Dotane. 18Ovo vo muĩla kupãla, kuenje osimbu ka pitilile ocipepi lavo, vo tumbika ongombo yoku wipa. 19Ovo va livanguisa ovo muẽle vati, Tali ukualonjoi wiyo. 20Enjui, tu wipayi, tu wimbi vocitunu cimue ha tu popi tuti, Ocinyama ca tema co lia, oco tu tale eci ci linga olonjoi viaye. 21Ruvene wa ci yeva kuenje wo puluisa povaka avo; wa popia hati, Ka tu ka nyõli omuenyo waye. 22Ruvene wa popia lavo hati, Ko ka peseli osonde yaye, wimbi ño vocitunu eci palo vekalasoko, ko ka wimbili vali eka. Wa ci popela omo wa yongola oku u puluisa povaka ao loku u tiula ku isiaye. 23Oco, eci Yosefe a pitila ku vahuvaye, oco va lula Yosefe ombinja yovoko, 24kuenje vo kuata, vo lowisa vocitunu. Ocitunu caco cupulokoso, ka mua kaile ovava.
25Oco va tumãla oku lia ombolo. Eci va petula ovaso avo oku vanja oco va mõla endo lia va Isameli liolio, lia tunda ko Gileada, lolongamelo viavo vi ambata olosimbolua lulela lekokoto, lia lunga oku vi tuala ke Egito. 26Yuda yu wa popia la vamanjaye hati, Ci tu sumũluisa ndati oku ipa manjetu loku vundisa osonde yaye? 27Tu endi, tu ko landisi ku va Isameli, ovaka etu ka vo ko kuate lũvi. Ocili eye manjetu, ukuasitu yetu. Kuenje vamanjaye va tava kokuaye. 28Oco alume va Midiane vakuakufũla va pita. Vamanjaye vocitunu va sosamo Yosefe, kuenje vo landisa ku va Isameli lakui avali kolopalata. Oco vambata Yosefe loku enda laye ke Egito.
29Eci Ruvene eya vali kocitunu kuenje wa sanga okuti Yosefe vocitunu kemo, oco wa tola tola uwalo waye. 30Yu wa tiukila ku vamanjaye, wa va sapuila hati, Umãlehe ka mõleha, ame hẽ njila pi? 31Oco va ipaya ocitupi cohombo kuenje va nyañula ombinja ya Yosefe va yi yava vosonde yaco. 32Va tuma ombinja yaco yovoko ku isiavo vati, Eyi tua yalula. Va kulihise nda hẽ oyo ombinja yomõlove nda ndati. 33Eye wa yi limbuka hati, Ombinja yomõlange muẽle Ocinyama ca tema co lia. Ka ci pumbi okuti Yosefe wa nyanyõha. 34Oco Yakoba wa tola tola uwalo waye kuenje wa wala ocikelei kombunda yaye. Wa lila omõlaye oloneke vialua. 35Omãla vaye valume lomãla vaye vakãi, vosi va seteka oku u lembeleka; eye puãi ka tavele oku lembelekiwa, wa linga hati, Ocili omõlange ndu lila ño, lile, toke konjembo. Oco isiaye wo lila. 36Otembo yaco eyi, va Midiane vo landisa ale ve Egito; vo landisa ku Potifara, ukulu wa Fareo, kesongo liakuenje velombe.
Currently Selected:
EFETIKILO 37: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
