ETUNDILO 25
25
1Yehova wa popia la Mose hati, 2Sapuila va Isareli okuti va ndumbila ovilumba. Komunu omunu o kasi lutima waco ci tava oku nambuila ocilumba. 3Ocilumba wu tambula kokuavo ceci: ulu, opalata, osipi, 4olonanga vionoloti, levi vi vumbula, levi vi kusuka, ovalatanya lovonya olohombo, 5ovipa violonupi via nyeñisua, ovipa violohombo, oviti viositimi, 6ulela wondiyelo, olosimbolua viulela woku wava, levi vinsensu vi pepa, 7otuvawe tuasardonika, lotuvawe tuolomota, tuefonde lotu tuonjeke yoponete. 8Va nungila ocitumãlo ci kola okuti ñala pokati kavo. 9Ndeci hu lekisa osetako yotavernakulu loseteko yovikuata viaco haico wu vi tunga.
10Va tunga ocikasia cositimi, usõvi waco ovikeya vivali komeyu, upati waco ukeya komeyu, okulepa kuaco kilu ukeya komeyu. 11O ci laña lulu wa fina, vokati lokosamua o ci laña. Komẽla o pamisako longenge yulu. 12O ci yenguluila ovinunga vikuãla viulu oku vi kapa kolongonjo viaco vikuãla, konele ovinunga vivali, konele ovinunga vivali. 13O tungavo olomuangaluwa viositimi loku vi laña lulu. 14O pitisa olomuangaluwa viaco kovinunga viokolonele viocikasia, oku ambata lavio ocikasia. 15Olomuangaluwa vi kala vovinunga viocikasia, ka vi tundimo. 16O seleka vocikasia ovawe ovihandeleko huiha. 17O tunga onuviko haiyo omangu yohenda. O yi tunga lulu wa fina. Usõvi wayo ovikeya vivali komeyu, upati wayo ukeya komeyu. 18O tunga vakeruvi vavali vulu; o va tunga loku tela, va kala vovinyulu viomangu yohenda. 19O tungila ukeruvi kocinyulu, ukeruvi kocinyulu. Vakeruvi va teliwa ocivela cimosi komangu yohenda kovinyulu viaco vivali. 20Vakeruvi va linga ndoku oluĩla kilu avava avo, okuti va sitika lavava omangu yohenda. Va limba ovaso. Ovipala viavakeruvi vimba ovaso komangu yohenda. 21O tumbika omangu yohenda kilu liocikasi; vokati kocikasia o solekamo ovawe ovihandeleko huiha. 22Oko ñualẽhela love. Kilu liomangu yohenda, pokati kovakeruvi vavali va kasi kocikasia covisila, oko mbanguila love ovina viosi huiha ndovihandeleko viomanu va Isareli.
23O tunga omesa yositimi, usõvi wayo ovikeya vivali, upati ukeya, okulepa kuaco kilu ukeya komeyu. 24O yi laña lulu wa fina, o yi ñualisa longenge yulu. 25O yi ñualisavo ocimbimbi cupati weka, locimbimbi caco o ci ñualisa longenge yulu. 26O yi pangela ovinunga vikuãla viulu loku kapa ovinunga viaco kavindi akuãla a kasi kolongonjo viaco. 27Ovinunga vi kala ocipepi locimbimbi, omu mu yakuila olomuangaluwa vioku ambata omesa. 28O songa olomuangaluwa viositimi loku vi laña lulu ha vambata lavio omesa. 29Lalonga aco lolonguto lasanga latiyela va itaila lao, viosi o vi tunga lulu wa fina. 30Komesa o kapa kapa hũ, oku ñapaela ame, ombolo yoku tala.
31O tunga ondiyelo lulu wa fina; ondiyelo yaco yoku tela; omangu yaco, longunji, lovilindo lapumbu lolonẽlẽho, cosi ci tungiwa ocivela cimosi. 32Ku kale ovimanganjumba epandu vi tunda kolonẽle viaco, ovimanganjumba vitatu viondiyelo konẽle, ovimanganjumba vitatu viondiyelo konẽle. 33Otuvilindo tutatu tua lisoka ndolomendua tu kala kocimanganjumba cimosi kumosi lepumbu lonẽlẽho, otuvilindo tutatu, tua lisoka ndolomendua, tu kala kocimanganjumba cikuavo, kumosi lepumbu lonẽlẽho; haico kovinmanganjumba viaco epandu vi tunda kongunji yondiyelo. 34Vondiyelo mu kala otuvilindo tukuãla tua lisoka ndolomendua, kuenda apumba aco lolonẽlẽho. 35Ku kala epumbu kombuelo yovimanganjumba vivali, viosi ocivela cimosi, epumbu kombuelo yovimanganjumba vivali, viosi ocivela cimosi, epumbu kombuelo yovimanganjumba vivali, viosi ocivela cimosi, kovinmanganjumba viaco epandu vi tunda kondiyelo. 36Apumbu aco lovimanganjumba viaco vi linga laco ocivela cimosi; cosi muẽle cimosi va ci tela lulu wa fina. 37O tunga olovela viaco epanduvali; kuenje va mĩha olovela viaco ha vi tuila ocitumãlo caco. 38Otuayola tuaco lotualonga tuovinene tu kala tulu wa fina. 39Yi tungiwa lotalendo yulu wa fina, okuti ondiyelo lovikuata viayo viosi. 40Patekela okuti o vi tunga ndoloseteko va ku lekisa komunda.
Currently Selected:
ETUNDILO 25: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
