ETUNDILO 26
26
1Otavernakulu o yi tunga lekui kolonanga viovalatanya lalinya onoloti la a vumbula la a kusuka kuenda vakeruvi; o vi tunga luloño. 2Usõvi wavio onanga onanga u kala akui avali kovikeya kovikeya ecelãla; upati wonanga ovikeya vikuãla; olonanga viosi oseteko yimuamue. 3Olonanga vitãlo va vi tongihinya pamosi, olonanga vitãlo va vi tongihinya pamosi. 4O kapa olongovela vionoloti konẽle yonanga yi kala konẽle yevi via litongihinya, haivio o kapa konẽle yonanga yi kala konẽle ya vikuavo via litongihinya. 5Akui atãlo kolongovela o tunga konanga eyi, akui atãlo kolongovela o tunga konẽle yonanga yoku tongihinya kuavali; olongovela viaco vi liloña. 6O tunga akui atãlo akuatelo ulu, hu pandeka pamosi olonanga lakuatelo aco, otavernakulu ha yi lingi yimosi.
7O tonga olonanga viovonya olohombo, ha vi lingi ombalaka yi sikĩlĩla otavernakulu; ekui liolonanga konanga o vi tonga. 8Osõvi wonanga u kala akui atatu kovikeya; upati wonanga ovikeya vikuãla; olonanga ekui lamosi vi kala loseteko yimuamue. 9O tongihinya olonanga vitãlo pamosi, lolonanga epandu pamosi; eyi yepandu o yi ketikila kovaso ombalaka. 10O tongela akui atãlo kolongovela konẽle yonanga yi kala konẽle yevi via litongihinya, lokonẽle yonanga yi kala konẽle ya vikuavo via litongihinya akui atãlo kolongovela.
11O tunga akui atãlo akuatelo osipi hu kapi akuatelo aco kolongovela oku tongihinya ombalaka ha yi lingi yimosi. 12Ocisupe kolonanga viombalaka cina ci nyoñama, omeyu yonanga ya supapo, ci nyoñamẽla konyima yotavernakulu. 13Ukeya konẽle eyi lukeya konẽle oyo evi via supapo kusõvi wolonanga viombalaka vi nyoñamẽla kolonẽle viotavernakulu, konẽle eyi lokonẽle oyo, oku yi sikĩlĩla. 14O tonga ocisikĩlĩlo combalaka lovipa violonupi va vi teka ci kusuka, kilu liaco ocisikĩlĩlo covipa violonjundu.
15O pasa avaya otavernakulu oviti viositimi, a tãi. 16Usõvi wevaya ekui kovikeya, upati wevaya ukeya komeyu. 17Kevaya levaya ku kala ovisisi vivali vi likuata; oco o panga avaya osi otavernakulu. 18O pasa avaya otavernakulu; akui avali kavaya okonẽle yo Sul. 19O tunga akui akuãla kotulukuki tuopalata tua sokuiwa vemẽhi liavaya aco akui avali; alukuki avali vemẽhi lievaya a kuata ovisisi vivali, alukuki avali vemẽhi lievaya likuavo a kuata ovisisi viaco vivali. 20Onẽle yavali yotavernakulu konẽle yo Norte, akui avali kavaya, 21lakui akuãla alukuki opalata, alukuki avali vemẽhi lievaya, alukuki avali vemẽhi lievaya. 22Onyima yotavernakulu ya imba ovaso kutakelo o yi pasela avaya epandu. 23O pasa avaya avali ovavindi otavernakulu a kala konyima. 24A pandekiwa kosi, haico kilu a tongihinyua locinunga cimosi; kavali kao haico; a avaya avindi avali. 25Ku kala avaya ecelãla, alukuki avo opalata, ekui lialukuki kalukuki epandu; alukuki avali vemẽhi lievaya limosi, alukuki avali vemẽhi lievaya likuavo.
26O pasa olombala viositimi, vitãlo viavaya onẽle yimosi yotavernakulu, 27lolombala vitãlo viavaya onẽle yikuavo yotavernakulu, lolombala vitãlo viavaya onẽle yotavernakulu, viokonyima yaco yokutakelo. 28Olumbala luovokati kavaya lu tunda konẽle toke konẽle. 29O laña avaya aco lulu; o tunga ovinunga viaco lulu mu pita olombala; o laña olombala lulu. 30O tunga otavernakulu ndoseteko yaco va ku lekisa vomunda.
31O tonga ongumbo yeyavailo, lalinya onoloti la a vumbula la a kusuka lovalatanya; va yi posuisa lavakeruvi. 32O yi nyoñamisa kolongunji vikuãla viositimi via lañiwa lulu; olonjolo viaco vi linga viulu; vi tãi, kalukuki akuãla opalata. 33O nyoñamisila ongumbo vemẽhi liakuatelo kuenje o kapa vokati kongumbo ocikasia covisila. Ongumbo yaco yi tepisa oko ku kola loku kuoku kola enene.
34O tumbika omangu yohenda kilu liocikasia covisila voku ku kola kuoku kola. 35O tumbika omesa kovaso yongumbo; ondiyelo yi lisuñame lomesa konẽle yotavernakulu yoko Sul; omesa o yi kapa konẽle yoko Norte.
36O tonga onanga yoku vindikiya uvelo wombalaka, lalinya onoloti la a vumbula la a kusuka lovalatanya, upange womesele yoku posuisa lalinya. 37O pasela onanga yaco olongunji vitãlo viositimi, o vi laña lulu; olonjolo viaco vi linga viulu. O vi yenguluila alukuki atãlo osipi.
Currently Selected:
ETUNDILO 26: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
