ETUNDILO 24

1Kuenje Yehova wa popia la Mose, hati, Lamanẽli ku Yehova, ove la Arone la Nadava la Avihu, kuenda akui epanduvali kovakulu va Isareli. Va kale kupãla oku fendela. 2Mose lika iya ocipepi la Yehova, vakuavo ka va keye ocipepi. Omanu ka va ka lamane laye.

3Oco Mose weya, wa sapuila omanu olondaka viosi via Yehova lovisila viaco viosi. Omanu vosi va kumbulula londaka yimosi vati, Olondaka viosi via popia Yehova tu vi linga. 4Mose yu wa sonẽha olondaka viosi via Yehova. Wa pasuka omẽle ociteketeke, wa tunga utala vepato liomunda. Wa tungavo olongunji ekui lavivali via lisoka lapata ekui lavivali a va Isareli. 5Wa tuma ipombokuenje via va Isareli. Wa lumba ovilumba vioku pia elisi. Wa lumbavo ovilumba viombembua violongombe ku Yehova. 6Mose wa nyañula onepa yosonde, kuenje wa yi kapa valonga. Onepa yikuavo yosonde wa yi nyila kutala. 7Wa nyañula elivulu liovisila, kuenje wa vi tangela omanu. Ovo va linga vati, Viosi via popia Yehova tu vi linga, tu pokola. 8Mose wa nyañula osonde yaco, wa nyila omanu, hati, Tala, eyi osonde yocisila Yehova a lisila lene lolondaka evi viosi.

9Oco Mose la Arone la Nadava la Avihu, lakui epanduvali kovakulu va Isareli va lamana. 10Va mõla Suku ya Isareli. Vemẽhi liolomai viaye huti ño mua yaliwa ohanda yosafira, okuyela kuaco kua soka ndilu. 11Ka kapele eka liaye kolombuale via va Isareli. Va mõla Suku, va lia, va nyua.

12Yehova wa popia la Mose hati, Lamana omunda. Enju kokuange. Talamela. Hu iha itale viovawe vi kuete ovihandeleko locikundi nda sonẽhako oku va longisa. 13Oco Mose wa votoka, eye la Yehosua oñuatisi yaye, kuenje mose wa lamanela komunda ya Suku. 14Wa sapuila ovakulu hati, Ene vu tu talamẽla kulo toke tu tiuka, Arone la Hure va kasi lene. Wosi o kuete ondaka a ende kokuavo.

15Oco Mose wa lamana komunda kuenje elende lia sitika omunda. 16Ulamba wa Yehova wa kala komunda Sinai, elende lia yi sitika oloneke epandu. Eteke liepanduvali eye wa kovongela Mose velende. 17Okumõlẽha kulamba wa Yehova kua soka ndondalu yelungulungu kilu liomunda kovaso ya va Isareli. 18Mose wa iñila vokati kelende, wa lamana komunda. Mose wa kala komunda yaco akui akuãla kovotanya lakui akuãla kovoteke.

Currently Selected:

ETUNDILO 24: EMB63

Highlight

Copy

Compare