ETUNDILO 23
23
1Ka ci tava oku pitisa olombonde viesanda. Ka ci tava oku likuta londingaivi hu lingi ombangi yuhembi. 2Ka ci tava oku kuama owiñi oku linga evĩho. Ka ci tava oku kuama ño owiñi loku imba uvangi wuhembi u pengisa ondaka yesunga. 3Ondaka yosuke ku ka yamẽle.
4Nda o ñualẽhela longombe yunyali wove ya nyelẽla pamue ocimbulu caye, yi tuala muẽle kokuaye. 5Nda o mõla ocimbulu cu wa ku suvuka ca kupukila posi locitele ca ci lundika ka ci tava oku u siaño te u kuatisa oku ci pandulula.
6Ka ci tava oku pengisa esunga lia sesamẽla ondaka yosuke yove. 7Amẽla ocipãla londaka yuhembi. Ka ci tava oku ipaya u ka kuete ongole pamue ukuesunga omo ame si yowisa ale ondingaĩvi. 8Ka ci tava oku tambula ovitukiko omo ovitukiko vi kokela olonganji upeke, kuenje vi pengisa olondaka viava va kuete esunga.
9Ka ci tava oku talisa ukombe ohali, momo utima wukombe wo kulĩhi, omo lenevo wa kaili akombe vofeka ye Egito.
10Anyamo epandu vu lima osi yene loku ungula olomema viaco. 11Unyamo wepanduvali vu yi puyuisa okuti yi vonga, kuenje olosuke viofeka yene vi lia. Eci ovio via siamo oco ovinyama viovusenge vi ci lia. Haico o linga locumbo cove cayuva, locumbo coliveira.
12Oloneke epandu o linga upange wove. Eteke liepanduvali o puyuka oco ongombe yove locimbulu cove vi mõle epuyuko, kuenda omõla upika wove ukãi lukombe va kavuluke. 13Ovina viosi nda popia lene lunguki lavio. Ka ci tava oku tukula olonduko violosuku viñi. Ka vi ka yevalele vimẽla viene.
14Vu ndingila ofesta olonjanja vitatu kunyamo. 15Vu lingainga ofesta yombolo ka yi kuete etumbisa. Ndeci nda vu handeleka, haico vu linga okuti vu lialia ombolo ka yi kuete etumbisa oloneke epanduvali kotembo ya tukuiwa vosãi ya Aviva, omo oyo osãi wa tundi ke Egito. Lomue iya kokuange upolokoso. 16Vu linga ofesta yevi wonguli tete kupange wene woku lima. Vu lingavo ofesta yoku mala oku ungula ovaima a tunda kupange wene. 17Olonjanja vitatu kunyamo alume vene vosi veya ku Yehova Suku.
18Ka ci tava oku lumbila osonde yocilumba cange pamosi lombolo yi kuete etumbisa. Lulela wofesta yange ka u ka lale toke komẽle.
19Ovaima a tete a tunda vovapia ene vu a nena konjo ya Yehova Suku yene.
Ka ci tava oku teleka okahombo vasenjele a inaco.
20Tala, mitisa kovaso yene ungelo oku vu lava vonjila, loku vu tuala kocitumãlo nda wangiliyili. 21U yeveleli. Pokoli kondaka yaye. Ko ko ñualelipo omo ka ecela okulueya kuene; momo o kasi londuko yange.
22Puãi nda vu yevelela ocili kondaka yaye loku linga cosi ndu sapuili, oco ndinga unyali wovanyali vene. Ndingavo onjaki yolonjaki viene.
23Eci ungelo wange a vu pitila kovaso oku vu tuala ku va Amori, la va hiti, la va Perisi, kuenda va Kanana, la va Hiwi kuenda va Yevusi kuenje ndi va takisa, 24oco ka vu petamẽla kolosuku viavo ndaño oku vi vumba, ka vu setukula ovilinga viavo. Puãi vu va kupula muẽle, loku nyanyõla olongunji viavo vi kola. 25Vu vumba Yehova Suku yene, kuenje eye o sumũluisa ombolo yene lovava ene. Ndu wupi uvei. 26Vofeka yene ka mu kala u o pulumũla, ndaño u o linga osiũle. Suisa oloneke viene. 27Ndu pitisili kovaso ocinjoko cange. Vakualofeka viñi viñi ene vu vi katukila ame ndi va lulumisa. Ovanyali vene vosi ndi va imbisa kokuene olonyima. 28Mitisa kovaso yene alimbondo ha a lupuisa va Hiwi, la va Kanana la va Hiti va kasi loku vu tila. 29Si vu va hangisila vunyamo umosi, sanga ofeka yi linga ekalasoko kuenje ovinyama viusenge vi vu luila. 30Ndi vu va hangisila naito naito, toke vu licita ha vu kuata ofeka. 31Ndu setekeli ongave yene tunde ko Kalunga Kakusuka toke ko Kalunga ka va Filisiti, kuenje tunde kekango toke kolui Ferati. Ngeca povaka ene vakuafeka yaco kuenje ene vu va lupuisa. 32Ka vu lisila lavo ocisila ndaño lolosuku viavo. 33Ka va tungi vofeka yene sanga va vu lueyisa kokuange momo nda vu vumba olosuku viavo cu lingili onjanjo.
Currently Selected:
ETUNDILO 23: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
