Delu dia Jeremiya 3
3
Elungamelu kʼEkimanyelu Keko lu Ketshi ka Unyashungu
1Dimi leli one lakadienaka
La ohehela wa ududu andi.
2Ndi akanombola, akankumia
Lu udjima waha la usasi.
3Mete, ndi atusimbulaka lunya landi
Dia ndi ndo la mi yanyi tshe.
4Ndi ambondja emunyi ami la diuwu
diami,
Ambotetshatetsha weka ami.
5Ndi ambunyinga, ambomomba
Lʼasui la toshoko.
6Ndi ambumbidjasha lu ahuli wa
udjima
Uku wane wambuvokaka.
7Ndi ambunyinga la lukumbu
lahameyi ntumba;
Ambumbidja molola wa wutshu.
8Lamʼatumulelaka, lamʼatumuwetaka
dia ndi nkimanyiami,
Ndi atushimbaka dombelo diami.
9Ndi ambundjihela mbuka yami la ave
wa losela.
Ambete mbuka yami akutu akutu.
10Ndi eko le mi uku laundu luhulami,
Uku tambwe lu dihuli dia wushamu.
11Ndi akambetoya mbuka yami;
Akahatula emunyi ami tufunda
tufunda;
Akambete anyanya.
12Ndi akaleme uta andi, akankitsha
uku pole
Ya mbukaka pitu.
13Ndi akatsheta utema ami la pitu
Yʼuma lʼukulu andi.
14Dimi lambuyala engo ka tola le antu
ami tshe,
Limbu lawo la dionyo nshi tshe.
15Ndi akandudia la lunyangu,
Akandutsha lʼukayi.
16Ndi akamungula anyu lʼave,
Akakumbi la utuku.
17Ndi akanya ki uma lʼutema ami,
Dimi lambuhela nshi ya ongenongeno.
18Okone dimi lakati nti: Wulu ami
wambushila,
Ndu elungamelu kami le Latuyalaka.
19Uho asui ami la pa yami,
Lunyangu lami ndu okei.
20Utema ami atuwauhoka nshi tshe,
Atutshutshumalaka.
21Keli dimi latuhoka dikambu ne,
Mbemi la elungamelu:
22Ngandji ka shikaa ka Latuyalaka
hatushilaka,
Ketshi kandi kema la ekumelu.
23Yo ndjalaka eyuyu pindju tshe,
Kolamelu yaye yeli dikambu dia
mamba.
24Latuyalaka keli etenyi kami kʼukito,
mbata utema ami,
Diako mbayumulungamelaka le ndi.
25Latuyalaka atutshelaka wane
watukungelaka ololo,
Ndu one latuyangaka.
26Ololo untu nungamela,
La nkunga panda ka Latuyalaka.
27Ololo untu memba lokoho
Lu nshi yandi yʼolongo a pami.
28Ndi ayadjaseli ndame la ki
Lamʼawahewolo.
29Ndi akayakitshakitsha, afushafusha
elomo andi lu ditshu,
Kana elungamelu kekiko.
30Ndi akakadimuli tama le one
latokomolaka,
La etewo dia ndi ntengamaka,
31Ne dia Khumadiondjo hatukadjaka
untu pundju,
32Kuyanga ndi ambunyangia untu,
ndi ayuwuka ketshi,
Uku weli wuki wa ngandji kandi ka
shikaa,
33Ne dia ndi hatulangaka nsuya antu,
Kuyanga mbanyangia.
34Khumadiondjo hetawo mpotshahotsha
Asi lukanu tshe wa la kete.
35Ndi hetawo antu mpotola untu
sambu kʼololo
La ntundu ka KhumʼUlungu.
36Khumadiondjo hetawo antu nanya
untu
Ulanyalanya lu elumbwelu kandi.
37Akona eya mvuta diui, ku dikambu
ntshama,
Lamʼahataditi Khumadiondjo?
38Undi, ololo la kolo hawututumbaka
Uma lʼunyo wa KhumʼUlungu?
39Dikambu kuna diatukiyanaka untu
Lamʼatundusuyamaka dikambu dia
kolo yandi?
40Nyeso, tushishimi mbuka yasu,
tuyediki;
Tukaluli le Latuyalaka.
41Tedia etema asu la anya asu
Utsha le Unyashungu leli lʼulungu.
42Shu takakuhedia, takakotombokwela,
We atatudimanyia.
43We akayaombe la kele, akayelana
la su,
Akatudiaki, aha la ketshi.
44We akayaombe la dingi
Wuhu wahakuki dombelo nkuma
le ye.
45We akatete engo kʼanyanya,
Engo ka ndjetete lʼatei a wedja.
46Atunyi asu tshe wambase enyo
Dia ntonyola.
47Woma la nyoi wambutunda,
Lundju la elanyelu.
48Ashu ami wambokedia akeledu wʼasoi,
Ne dia elanyelu ka ona umuntu a
wudja ami.
49Ashu ami watokediaka asoi,
Hawukimo nkela kuyanga yema
tshitshe,
50Edja ndu Latuyalaka ambuka su,
Ambenda uma lʼulungu.
51Ashu ami watunyangiaka utema ami
Dikambu diʼelanyelu ka ana amantu
wʼusumba ami.
52Waku watumpetshaka uhetshahetsha,
Wakanyangi wulu uku fudu.
53Vo wakantambiya lu difuku,
Wakambuki ave.
54Ashi wakanditsha:
Dimi lakati nti: Lambushisho!
55Latuyalaka li, dimi laketaka lukumbu
laye
Umakʼesi a difuku.
56We akuki osengosengo ami,
Tudihaki tui lu delu diami diʼosengosengo.
57We akasukana lamʼakamaketi,
We akati wati: Tukaki woma.
58Khumemi li, we akasambula dikambu
diami ololo,
Akashimbela lumu lami.
59Latuyalaka, we akenyi kolo kakawantshela,
Usambuli dikambu diami.
60We akenyi esombweyo kawo tshe,
Sangweyu tshe diakawasanguya
ntshelami.
61Latuyalaka li, we akuki tengo yawo,
Sangweyu diakawasanguya ntshelami,
62Aui la tukanyi ta waku
Watondoshaka yanyi tshe.
63Uwaendaki lamʼudjashiwo ndu
lamʼunelawo,
Dimi leli usambu awo wa dionyo.
64Latuyalaka li, we ayafuta
Uku eli ulimu wʼanya awo.
65We ayuwasha etema a wutshu;
Mananu kaye kayuyala le wo.
66Latujalaka li, we ayuyelana la wo lu
kele kaye,
Ayashila ushiki uma lʼesi ulungu.
Currently Selected:
Delu dia Jeremiya 3: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
