Jeremiya 9
9
1Utunduyala ote ami waluli too lʼashi,
La ashu ami wayali teko diʼasoi,
Tshiki dimi lutulelaka andjakemi
wʼona umuntu a wudja ami
Ndu la yanyi ndu lʼutshu.
2Dimi lambukumbula luudu
lʼamengodi lʼusui wa shenga,
Dia dimi ntshika wudja ami, la
mangana la wo etali,
Ne dia vo tshe weli akanga a luseka,
Ului wʼakanga a lukesu.
3Vo watukutulaka nimi yawo uku eta
dia mbuka kashi;
Aha uma lu mete kambuwuyala la
wulu lu kete.
Vo watutshokaka uma lu kolo utsha
lu kolo,
Hawumbeyi, mbata Latuyalaka.
4Nyu tshe untu lʼuntu ewo unyandi,
Ndu untu lʼuntu tekamaki onangu,
Ne dia onangu ayukesaka, la ongenyi
ayumamanyiya unyandi.
5Vo tshe wayukesanaka, hawuti a
kambu wa mete.
Vo watekiyaka nimi yawo dia mvuta
kashi,
Watuyatshutshiyaka dia ntsha kolo.
6Edjaselu kaye keko lʼatei a lukesu.
Uma lu lukesu lawo, mbatuwutunaka
mbeyami, mbata Latuyalaka.
7Okone Latuyalaka Kanga lulimbilimbi
kata ati:
Enda, layaedika, layahimba.
Na dikambu dikina dieyami ntsha
dikambu dia wudja ami?
8Nimi yawo yeli akuwa wa lolengo.
Vo watoteketaka akambu wa lukesu.
Vo watoteketaka aui wʼololo lʼasukanyi
awo,
Keli lu etema awo, vo watambaka
tulunga.
9Undi, dimi haluwalumbuya lu
akambu aso?
Dimi halosombweya utema ami wuhu
one wa wudja?
Mbata Latuyalaka.
10Dimi layulela, layuda tukuku
dikambu diʼekungu,
Layuyandjayandja la delu lu dikambu
diʼusui wa shenga,
Ne dia vo wambulungula; nduku
untu leta leko.
Nduku lawi la ngombe lukema;
Fudu ya lʼulungu la nyama yakalawo,
yakamo leko.
11Dimi layete Jerusalema tuta
diʼelanyelu, edjaselu ka wambulu.
Dimi layete esumba wa Juda atongo
atu, waha lʼantu.
Ambuwanela Dia Mbalanya la Mbatola lu Lohombo
12Untu akona eli kanga yimba lukuki nimbitela dikambu ne? One lakatela Latuyalaka, adisanya. Okoko wana wambulanyema kete, wambuyutshumbama uku usui wa shenga, lene ahatetaka untu? 13Latuyalaka kata ati: Vo wakaseke elembe ami, wakamakitsha la ntundu kawo. Vo kumbetawo aui ami kuyanga nkendakenda loko. 14Keli vo wakayelaka saki yʼetema awo, ndu wakayelaka Wa-Bala uku akawaetshaka washewo. 15Diako mbayumulesha wudja one kundju, mbayumanosha ashi wa lolengo, mbata Latuyalaka, Unyashungu wa Isariyele, Kanga lulimbilimbi. 16Ndu dimi layadianganya lʼatei a wedja waki washewo kumbeya, layutuma yombo lʼokongo awo edja ndu lamʼayumashila ushiki.
17Latuyalaka Kanga lulimbilimbi kata ati:
Nyuki, nyeti amantu watulelanaka,
vo wayi!
Nyutumi diui dia nteta amantu,
akanga a ngengu, keli wayi!
18Wasamanya, wayututshimeli djuwa,
Dia ashu asu nkedia asoi,
Dia toki yasu mbasedia!
19Ne dia tukuku tʼalelu tambukema
uma le Siona.
Yee! tambushila, tambukumbama la
sonyi,
Ne dia shu takaseke kete, ndu ne dia
vo wakalanya mvudu yasu!
20Nyu amantu, nyuki diui dia
Latuyalaka,
Nyuhuke atui lu aui watandi,
Nyetsha anʼanyu wʼamantu kimbu
yʼutanda.
Nyu tshe untu lʼuntu etsha unyandi
djuwa,
21Ne dia nyoi kambumbela lu adidishi
asu.
To kambuyoto lu mvudu yasu ya
khumʼekanga.
To katushilaka akenda lu aseke,
la elongo wʼapami lu esese.
22Uti wati: Latuyalaka kata okone ati:
Edu wʼantu wayukalema uku tumi
lʼusui,
Uku washa lʼokongo wʼumunyi, ku
nduku layatongona.
Yimba ya Unyashungu Eko Lutumbu lʼUntu
23Latuyalaka kata ati: Kanga yimba tayasemaki dia yimba yandi. Kanga khudu tayasemaki dia khudu kandi. Kanga ongonyi tayasemaki ne dia ongonyi andi. 24Keli one lalanga ndjasema, ayaseme dia ndjala la ewu la dia nimbitelami,#9:24 1 Kor. 1:31; 2 Kor. 10:17. dia mbeya ati: Dimi keli Latuyalaka. Dimi leli Latuyalaka, latutshaka akambu wa mamba, sambu kʼololo la akambu wʼusi-mbwi lu kete, ne dia lu akambu ako mbatumongenangenaka, mbata Latuyalaka.
25Enda, nshi yayuyala, yayumusuya waku tshe wakahema uhekeli, waki kundjakidia lʼutema, mbata Latuyalaka. 26Edjibitu, Juda, Edome, asi Amona, la Moaba, la waku wudjashi lʼusui wa shenga, watunyaka avu awo aketo, la antu tshe uma lu khumbu ka Isariyele wahayakidia lʼutema.
Currently Selected:
Jeremiya 9: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
