Jeremiya 6
6
Dianyelu dia Jerusalema la Juda
1Nyu asi Bendjamina, nyumo uma
lʼatei wa Jerusalema,
Nyuyashimbeli, nyutudi amama la
Tekoa.
Nyuteme djimbitelu ya mbewula antu
la Bete-Hakereme!
Ne dia elanyelu lu ndjayi uma la
ngelʼa kushi, elanyelu ka mamba.
2Dimi layulanya ona umuntu a Siona,
Leli dimena la elundji ka yooyoo.
3Alami wayuya la dungalunga diawo
uya le ndi.
Vo wayuyeme mvudu yawo yʼapema
lʼutshimba andi.
Vo tshe wayulesha dungalunga diawo
untu lʼuntu lu dihuli diandi.
4Nyuyalongosole dia ndo la ndi!
Nyuyeti tutshu, tututateli ta unya
lʼatei ote.
Ndi dikambu dia lunyangu le su li!
ne dia unya ambeta.
Aledi wa dikolo wambutalo.
5Nyeso tutshu lʼutshu, tutuhandjuli
mvudu yandi ya khumʼekanga.
6Ne dia Latuyalaka Kanga lulimbilimbi
kata ati:
Nyunyukuli etamba awo; nyutshimeli
Jerusalema ngeli.
Dieli la usumba one nsuyama.
Wengiya utu mbeli lʼatei awo.
7Uku atutundjaka eteko ashi ato,
mbatuwutundjaka kolo yawo.
Kumu ya ndjaudi la yʼelanyelu yatukemaka
lʼatei awo.
Kandji la puta yatenamaka la ntundu
kami tena tshe.
8Jerusalema li, ulungi wetshelu;
Utema ami atukumamitwana la ye!
Dimi ntukukete tongo tu, aha lʼuntu.
9Latuyalaka Kanga lulimbilimbi kata
okone ati:
Nyokonole atshikadi wa Isariyele,
Uku atuwokonolaka elua wa vinyo.
Uwahe lunya laye ntu, uku atunyinginyaka
umumbi wʼelua ekodi.
10Le na ayumoteketa, ndu ayumudja
omenyi dia vo mpukama?
Atui awo watalongoswama, vo haweyi
mbuka.
Diui dia Latuyalaka diambuyala engo
ka dionyo le wo;
Vo hawudingenangena.
11Diako mbamumulula too la ududu wa
Latuyalaka,
Handjeya mbukike ntu.
Utshululi ladiku diʼana weli lʼosese,
Ladiku diʼelongo wʼapami wusanganyi
kame,
Ne dia umi la wadi wayosama kame,
Ndu ekumanyi la usumbi wa lukusumbi
kame.
12Mvudu yawo, dikambo diawo,
La wadiewo wayukimwama le akina,
Ne dia dimi layusimbula lunya lami
Ladiku dia kete nye, mbata Latuyalaka.
13Ndu wa tshitshe ndu a waki,
Vo tshe weli akanga a lukaki.
Ndu umvutshi ndu olombedi,
Vo tshe watutshaka lukesu.
14Vo watombaka puta ya wudja ami
yema tshitshe,
Ku vo mvuta vati: Ambushila, ambushila!
ku to katashili.#6:14 Ezek. 13:10.
15Vo wakuki sonyi lamʼakawatshi
akambu wa wononyi?
Kema, vo konombo, kumbuka sonyi
nduku yema!
Diako mbayuwoko lʼatei a waku
watokokaka.
Vo wayolemba lamʼayumasuya, mbata
Latuyalaka.#6:15 Jer. 8:10-12.
16Latuyalaka kata okone ati: Nyemali
lu mbuka, nyendi,
Nyumbuli mbuka yʼedjedja lenʼeli
mbuka kʼololo.
Nyokendekende loko, ku nyu
nyayutana ki lu etema anyu.#6:16 Mat. 11:29.
Keli vo wakakaluya diui vati: Shu
hatokendakenda loko.
17Dimi lakakitsha alami lasuki la wudja
aye nti:
Nyuhukami lundju la dimama!
Keli vo wakakaluya diui vati: Shu
hatuhukama.
18Okone nyu wedja nyuhukami.
Nyu ului wʼantu, nyulungi kene
kayuyala le wo!
19Kete li, uhukami!
Ulungi, dimi lutsha mbela elanyelu le
wudja one,
Ulua wa tukanyi tawo,
Ne dia vo kumpukama aui ami.
Vo wakonyola elembe ami.
20Uhumba akona weli la mi wa diango
diʼepumu uma la Sheba,
La malashi uma lu kete yʼetali?
Dimi halungula elambu anyu.
La elambu anyu wa lutshumba
hawongenyangenya.
21Diako mbata Latuyalaka ati:
Enda, dimi layukitsha etamba wa
ntakanya la ntundu ka wudja one.
Loko kayuwutakanaka, ndu washi
ndu ana kame;
Usukanyi ndu ongenyi wayulanyema.
22Latuyalaka kata ati:
Nyulungi, wudja omotshi wuyayi uma
lu kete ya la ngelʼa kushi;
Wudja a wuki wambunela uma lu
kuma ka kete.
23Vo watukimelaka uta la dikonga,
Vo weli akanga wʼusihi, waha la
ketshi.
Aui awo watudikitaka uku ashi a
waki.
Vo watahemaka la diku dia falasa,
Watuyalongosolaka uku untu otoi
katatshu utsha lu ta,
Dia ndjukolosha we ona umuntu a
Siona.
24Lamʼakatuki lukumu loso, anya asu
wakakomo,
Sasi dia woma diakatundi, kandji
uku umuntu latata lono!
25Tanyutshokaki utsha lu dikambo,
tanyetaki lu mbuka,
Ne dia yombo yʼutunyi la woma wa
mamba weko lʼutshimba tshe.
26We ona umuntu a wudja ami, olote
akutu, ukidimo lʼutuku;
Uleli utanda uku wʼona pami etoi,
okedia asoi wʼokei,
Ne dia unanyishi ayuya shashimuya
le su.
27Dimi lambukete etangelu la lungeli
lʼatei a wudja ami,
Dia we mbalimbitela la mbedika
ditshelu diawo.
28Vo tshe weli akanga wʼuhindudi,
watengolaka la amamanyishi.
Vo weko ohotela la luwulu,
Vo tshe watutshaka kolo.
29Wambufufa khuka wulu, luwulu
lambutshumbama.
Vo wambena pa anyanya dia ledia,
Keli akedi hawumo.
30Watuwaetaka vati: Fesa yʼanyanya,
Ne dia Latuyalaka akatuni.
Currently Selected:
Jeremiya 6: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
