Jeremiya 5
5
Kolo ya Jerusalema la Juda
1Nyukinduli lu esese wa Jerusalema,
Nyendi, nyeyi, nyuyangi lu ahuli wa
hwe,
Kana nyayutana untu omotshi
latutshaka ololo latekamaka lu mete,
Ku dimi lay udimanyia Jerusalema.
2Kuyanga vo watutshibaka vati:
Uku eli Latuyalaka la lumu!
Mete, anyanya mbatuwutshibaka.
3Latuyalaka li, ashu aye hawutenaka
mete?
We akasuya, keli vo kunyanga.
We akalanya, keli vo wakatuni
wetshelu.
Vo wakakikitsha dundji diawo wulu
uleki dive
Wakatuni nkadimula etema.
4Dimi lakati nti: Mete, asi wula
mbewo,
Akanga a dinginya.
Vo haweyi mbuka ka Latuyalaka,
kuyanga elembe wa Unyashungu awo.
5Dimi layutsho le antu a waki,
layutoteketa la wo,
Ne dia vo mbeyaka mbuka ka Latuyalaka
la elembe a Unyashungu awo.
Keli ndu vo tshe wakawediawedia
lokoho,
Wakahimbula ekodi.
6Diako mbayadiaka tambwe ka
lʼukunda,
Mbayalanya laundu la lʼusui wa
shenga,
Mbayahulanela koi lu esumba awo.
Wane tshe wayutumba uma loko,
wayundama,
Ne dia diakelu diawo diʼelembe diaya
efula,
La ehedia awo wambufulanela.
7Ukundi eyami nkudimanyia?
Anʼaye wakanseke, wakatshibela
ditemolatemola.
Lamʼakamaksha, vo wakaluti,
wakayakimo lu akambu wa luseka,
Wakamote elui lu mvudu yʼamantu
akanga a munanyi.
8Vo weko uku falasa yambuluta,
yatetetaka weteteta;
Vo tshe untu lʼuntu atokomiyaka wadi
a unyandi.
9Undi, dimi haluwalumbuya lu
akambu ane?
Dimi halosombweya utema ami wuhu
one wa wudja?
Mbambula Latuyalaka.
10Nyumbeli lu peli dia kumbu ya
Isariyele la Juda.
Nyudinyukuli, keli tanyulanyaki tshe
tshe.
Nyuhimbuli tahi yʼekodi yawo ya
vinyo,
Ne dia yo kema ya Latuyalaka,
11Ne dia khumbu ka Isariyele la
khumbu ka Juda wakampedia efula,
Mbata Latuyalaka.
12Vo wakangunela Latuyalaka vati:
Ndi hutsha nduku dikambu!
Elanyelu huya le su. Shu hatena
yombo kuyanga ndjala ka kasha.
13Amvutshi weko paka lopepe.
Nduku latuwatelaka aui.
Osoku mbayuwatshela.
14Diako mbata Latuyalaka, Unyashungu
Kanga lulimbilimbi, okone ati:
Ne dia wudja aye wakati osoku, dimi
layete aui ami lʼunyo aye uku dja,
La wudja one uku kunyi, ku dio
diayatshumba.
15Ulungi, we wudja wa Isariyele,
Dimi lutsha mbela wudja wʼuma lʼetali
dia ndjunyolosha, mbata Latuyalaka.
Vo weli wudja a wulu, wuija
wʼedjedja,
Wudja wahanyeyi oteketa awo,
kuyanga mana aui awo fundu.
16Ukulu awo wa pitu weko uku diumbu
dia hwe,
Vo tshe ahuka mbewo.
17Vo wayumana dinela dianyu, la mbu
yanyu ya nde.
Vo wayumana anʼanyu wʼapami la
wʼamantu.
Vo wayumana dungalunga dianyu la
ngombe yanyu.
Vo wayumana vinyo yanyu la fingu
yanyu.
Vo wayulanya esumba anyu a wulu,
watunyekamaka la tombo.
18Keli lu nshi sho, dimi halunyulanya tshe tshe, mbata Latuyalaka. 19Lamʼayumbula wudja aye vati: Dikambu kuna diambututshela Latuyalaka, Unyashungu asu, akambu ane tshe? Kakaluya diui wati: Uku akanyaseke Latuyalaka dia ntemola ditemolatemola diʼasi wedja lu kete yanyu, osoku mbayunyuyala lʼokongo wʼasi wedja, lu kete yaha yanyu.
20Nyuti lukumu lone le khumbu ka
Jakoba,
Nyulusanya lu Juda; nyuwateli nyati:
21Nyulungi dikambu ne, nyu wudja wa
dinginya, nyaha la ewu.
Nyu nyeko la ashu, keli hariyenyi;
nyu nyeko la atui, keli hanyuki.#5:21 Is. 6:9-10; Ezek. 12:2; Mak. 8:18.
22Undi, nyu hanyumbuki woma?
Hanyudidima la ntundu kami? mbata
Latuyalaka.
Dimi ako kakadjela ashi a waki
lokongo uku ulelu,
Lukumbu la pundju, lahaweyi
ndekana.
Kuyanga asukhu awo watusukasukaka,
vo haweyi lolembia.
Kuyanga vo watudikitaka, vo haweyi
lulekana.#5:22 Job. 38:8-11.
23Keli wudja one weko la etema wulu
la uhindudi;
Vo wakantombokwela, wakatshu.
24Vo hawututaka lʼetema awo vati:
Tuki Latuyalaka, Unyashungu asu,
woma.
Ako latoloshaka mvula kʼalohoki la
ka ndjihelu lu etena kayo,
Latutushikikelaka bingu ya dinela lu
tena diayo.
25Ehedia anyu mbakanyetwela akambu
ane,
La kolo yanyu mbakanyuhumbia
ololo one.
26Antu wa kolo wambutanema lʼatei a
wudja ami.
Vo watotongaka uku umambi a fudu
kamba tulunga.
Vo watambaka otei, watundaka antu.
27Uku atululaka lusasa too la fudu,
Mbatululaka mvudu yawo too la
lukesu.
Diako mbatuwuyalaka antu a waki
ndu engonyi.
28Vo watununaka, watuyalaka la alimba
wa lonyengo.
Vo watutshaka kolo ndeka yediko.
Vo hawutoteketelaka ana wa ditshiki
dia vo mpumo lukulu lʼolo.
Vo hawutusambwelaka ehumbi la
sambu kʼololo.
29Undi, dimi halasuya ne dia akambu
aso?
Dimi hasombweya utema ami le wudja
wa wuhu oso?
Mbata Latuyalaka.
30Akambu wa mamba wa wononyi
wambutshama lu kete.
31Amvutshi watutaka kashi lu akambu
wahatayi.
Elombedi watulelaka antu uku alangawo.
Ku wudja ami watongenangenaka
akambu aso.
Lʼekumelu kʼakambu ako, kayunyutsha
na?
Currently Selected:
Jeremiya 5: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
