Jeremiya 49
49
Etelu kʼAkambu Wahatayi lu Dikambu diʼAsi Amona
1Lu dikambu diʼasi Amona.#49:1 Ezek. 21:28-32; 25:1-7; Am. 1:13-15; Zef. 2:8-11.
Latuyalaka kata okone ati:
Undi, Isariyele kema la ana apami?
Ndi kema la ukito uka?
Ya ukundi ambuyala Milikome kanga
Ngada,
La antu andi wambudjase lu esumba
andi?
2Nyuki, nshi yayuyala,
Yayumutsha Raba kʼasi Amona
lundju la ta.
To kayuyala tuta diʼelanyelu,
La ngelu ya lʼokongo awo
yayutshumbama.
Ku Isariyele wayulela waku
wakawaulelaka,
Mbata Latuyalaka.
3Yee, Heshibona, ndi tukuku,
Ne dia Ai ambulanyema!
Nyu ana amantu wa Raba, nyudi
tukuku,
Nyolote akutu, nyuleli,
Nyuyandjiyandja lʼumamu wa peli
dia lukumbu!
Ne dia Milikome utsha ntolama lu
fumbi,
To ndu elombedi ato la ewandji ato.
4We ona umuntu kanga uhedia, okoko
wana wayasemaye
Lu dikambu dia ekidi aye wutsha
nanyema?
We latekamaka engonyi aye wati:
Akona ayuya dia ndjolo la mi?
5Nyendi, dimi lutsha nyutumela woma
a wuki,
Mbata Khumadiondjo, Latuyalaka
Kanga lulimbilimbi.
Vo wayuya uma le waku tshe weli
lʼutshimba anyu,
Nyu nyayutshanyema nyu tshe, nduku
layusanganya andawi.
6Keli lʼokongo diku, dimi layukaluya
asi Amona
Wakatolama lu fumbi, mbata
Latuyalaka.
Etelu kʼAkambu Wahatayi lu Dikambu diʼAsi Edome
7Lu dikambu dia Edome.#49:7 Is. 34:5-17; 63:1-6; Ezek. 25:12-14;35:1-15; Am. 1:11-12; Ob. 1-14; Mai, 1:2-5.
Latuyalaka Kanga lulimbilimbi,
kambula ati:
Undi, yimba kema ntu lu Temana?
Elanyelu kʼakanga a tutshundju
kakashisho,
Ewu kawo kambushila uka?
8Nyu asi Dedana, nyukadimo,
Nyulawo, nyutushami lu minga!
Dimi lutsha mbela elanyelu le Esau,
Etena kʼelanyelu kandi.
9Naka akohodi wʼelua wambuya
lakaye,
Undi, vo hawutshika elua emotshi?
Naka evi wambuya lʼutshu,
Vo hawose paka etenyi kukukiwo
mbosa uka?
10Keli dimi lambokosola Esau kene
keli la ndi,
Lambukumbula ahuli andi watundushamaka;
ndi heyi ndjashe.
Anʼandi, anangu, la anyandi wayudiakema;
ndu ndi henama ntu.
11Utshiki anʼaye wa ditshiki. Dimi
layalumbia.
Wadi waki edu aye wekami le mi.
12Latuyalaka kata ati: Enda, wane wahahumbi no dikoho wayudino, ku we mbeyaka ntshikala aha nsuyama uka? We hutshikala aha nsuyama. Mete we ayudino. 13Dimi lambuyatshiba dime nti: Bozera ayuyala engo ka nkashimo, engo ka dionyo, engo kʼanyanya la engo ka mananu. Esumba tshe weli lʼokongo awo wayuyala etongo atu, mbata Latuyalaka.
14Dimi lakuki lukumu uma le Latuyalaka.
Ndi akatumela wedja tshe dikendji ati:
Nyuyasanganya kame, nyuneli utsha
lu ta, nyutolosha.
15Uki, dimi lutsha nkete tshitshe lʼatei a
wedja,
Omonywama lʼatei wʼantu.
16Lukanyi laye la utaku wʼutema aye
wamoukukesa,
We ludjashi lʼatei a weuku wʼave,
Latahemaka lu ote wa dikuna.
Kuyanga we ayututsha kefu kaye etali
ka hwa uku ka pungu,
Dimi layukuhatula uma leko, mbata
Latuyalaka.
17Edome ayuyala engo ka nkashimo. Untu tshe layeta laawo, ayukashimoka, ayutshodiaka ne dia asui awo tshe. 18Vo wayuyala uku elanyelu ka Sodoma la Ngomora, la esumba waki lasuki la wo.#49:18 Etat. 19:24-25. Nduku untu ayuyala loko, mbata Latuyalaka. 19Nyuki, atunyi awo wayutumba uma lʼukunda wa la Jorodana uku Umbwe katatshu utsha lʼukutu a wulu wʼekoko. Ku dimi layuwatshanya shastumuya uma lʼEdome. Dimi layukitsha one layumosonola ladiku diandi. Akona edimi la mi? Akona ayonsonwela etena? Ulami wʼekoko akona ayemala la ntundu kami? 20Uma lu dikambu so, nyulungi tukanyi ta Latuyalaka tambundukana lu dikambu dia Edome, ndu sangweyu diambundusanguya lu dikambu diʼasi Temana ati: Vo wayakutula ushidi uku ana wʼekoko, wayulanya edjaselu kawo. 21Kete yambudidima la lundju lʼekwelo kawo. Tukuku tawo tambukema pulu ndu lʼUduwa a Tilili. 22Nyuki, utunyi ayuya uku pungu kayafumbo, ayasimbi ahafu andi dia ndosha Bozera. Lushi lako, etema wʼahuka wa Edome wayuyala uku utema wa umuntu latata lono.
Etelu kʼAkambu Wahatayi lu Dikambu dia Damaseke
23Lu dikambu dia Damaseke.#49:23 Is. 17:1-3; Am. 1:3-5; Zek. 9:1.
Hamata la Arapada wambukanana,
Ne dia vo wambuka kumu ya kolo.
Vo wambusaka lukumba;
Watusukasukaka uku ashi a waki,
haweyi nembohala.
24Damaseke ambokomo, ambukadimo
dia ndawo,
Ndi ambundama la lukumba.
Sasi la lunyangu wambuwunda, uku
umuntu latata lono.
25Ndi wuhu wambukalema usumba wa
lukumu,
Usumba wʼongenongeno li!
26Uma lu dikambu so, mbayoko elongo
awo wʼapami lu esese,
Ndu mbayuvo alimbi awo tshe lushi lako,
Mbata Latuyalaka Kanga lulimbilimbi.
27Dimi layohetsha dja lu peli dia
Damaseke.
Yo yayutshumba mvudu ya khumʼekanga
Bene-Hadada.
Etelu kʼAkambu Wahatayi lu Dikambu dia Kedara la Hazora
28Lu dikambu dia Kedara la waulelu wa Hazora, wakalembia Nebukadineza, khumʼekanga ka Babilona.
Latuyalaka kata okone ati:
Nyuneli, nyutshu utsha la Kedara.
Nyutudiaki antu wa lu leke lʼEhutwelu.
29Antu wayutohotola mvudu yawo
yʼapema la dungalunga diawo,
Wayutosa apema awo, diango diawo
tshe, la kamelo yawo.
Vo wayutahangohangwela lu beke
tshe dia mbautsha woma.
30Nyu asi Hazora, nyulawo,
nyudiangani etali.
Nyutushami lu minga,
Ne dia Nebukadineza, khumʼekanga
ka Babilona,
Eko la kanyi ya nyutshela kolo,
Ambusanguya nyolosha, mbata
Latuyalaka.
31Nyuneli, nyutshu la ntolosha wudja
wuyalaledi, weli la ki
Ndu la lutui tshitshi, waha la kuki
kuyanga tukingiti,
Mbata Latuyalaka.
32 Kamelo yawo yayumbama,
La nyimba yawo ya dungalunga
yayuyala diango dia dimbu.
Dimi layuhandjula waku watunyaka
avu aketo
Lu beke tshe dia kete.
Dimi layuwaela elanyelu uma
lʼetshimba awo tshe,
Mbata Latuyalaka.
33Hazora ayuyala edjaselu ka wambulu,
tongo pundju.
Nduku untu ayudjase leko, nduku
untu ayulala leko.
Etelu kʼAkambu Wahatayi lu Dikambu Dia Elame
34Diui dia Latuyalaka diakayi le umvutshi Jeremiya lʼetatelu ka diulelu dia Zedekiya, khumʼekanga ka Juda, lu dikambu dia Elame, ati:
35Latuyalaka Kanga lulimbilimbi kata ati: Nyendi, dimi lutsha mbokola uta wa Elame, engo kawo kuleki wulu. 36Dimi layutumela Elame pepe nyei uma la kuma nyei yʼulungu. Dimi layahandjula la pepe sho tshe. Nduku wudja wayuyala, wahukuma andawi wʼuma lʼElame. 37Dimi layusakia asi Elame lukumba la ntundu kʼatunyi awo, la ntundu ka waku watuyangaka mbadiaka. Dimi layuwaela elanyelu, kele kami ka wulu. Dimi layayela la yombo, edja ndu lamʼayumashila ushiki, mbata Latuyalaka. 38Dimi layushikike kiti kami ka diulelu lu Elame. Dimi layudiaka khumʼekanga la ewandji wa leko, mbata Latuyalaka.
39Keli lu nshi yayayi, dimi layukaluya asi Elame wakatolama lu fumbi, mbata Latuyalaka.
Currently Selected:
Jeremiya 49: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
