Jeremiya 48
48
Etelu kʼAkambu Wahatayi lu Dikambu dia Moaba
1Lu dikambu dia Moaba,#48:1 Is. 15:1—16:14; 25:10-12; Ezek. 25:8-11; Am. 2:1-3; Zef. 2:8-11.
Latuyalaka Kanga lulimbilimbi,
Unyashungu wa Isariyele, kata ati:
Mananu le Nebo! ne dia to kambulanyema.
Kiriyatayima ambutsha sonyi, ambosama.
Misingabe ambutshama sonyi,
ambuhandjwama.
2Nemo dia Moaba diambushila.
Wambuwudjela sheki la Heshibona vati:
Nyeso, tutashili ushiki, diaha vo
ndjala wudja ntu.
Ndu we Madimena, we ayulanyema,
Yombo yayuyelana la ye.
3Nyuki, lundju loso lʼalelu uma la
Horonayima,
Elanyelu la ehandjwelu ka wuki.
4Moaba ambulanyema;
Alelu wa anʼawo wumbukema etali,
pulu ndu la Zoara,
5Ne dia vo wayulela lu edelu ka Luhita.
Ndu tukuku tʼelanyelu tayukema
lʼuhulula wa Horonayima.
6Nyulawo, nyuyashimbeli,
Nyuyali uku ekumbu lʼusui wa shenga,
7Ne dia nyu nyakekama elimu anyu
la waumbelu anyu,
Ndu nyu nyayotolama.
Kemoshe ayotolama utsha lu fumbi,
Kame la elombedi ato la ewandji ato.
8Unanyishi ayukuma lʼusumba lʼusumba,
Nduku usumba ayuhanda. Ukidi
ayulanyema,
Ndu usui wa bamubamu pupu, uku
akati Latuyalaka.
9Nyusha Moaba ahafu, dia ndi nfumbo
lufumbo.
Esumba andi wayuyala etongo atu,
waha la antu.
10Mananu kayali le one latutshaka ulimu wa Latuyalaka utshatsha. Mananu kayali le one latushimbaka yombo yandi ntundja dikila.
11Moaba akenaka olo umaka nshi
yandi ya dikenda,
Atatolama etali lu fumbi.
Ndi akadjase uku wanu ladiku
diʼekongo kawo.
Ndi konengwama uma lʼuhundi
omotshi utsha lʼuhundi ukina.
Mpe kandi keko pupu, sulu kandi
atakadimo.
12Nshi yayuyala, yayumutumela antu dia ntutshulula. Vo wayutshulula diango dieli lu puki yandi, wayula ehundi andi betshi betshi. 13Ku Moaba ayutshama sonyi lu dikambu dia Kemoshe, uku akutshama khumbu ka Isariyele sonyi lu dikambu dia Betele, lakawekamaka.
14Ukundi ukukinyu mvuta nyati:
Akanga a wulu mbesu, ahuka wukuki
ndo ta?
15Moaba ambulanyema, unanyishi
ambukuma lʼesumba andi,
Elongo wʼapami andi wuleki ololo
wambudiakema,
Mbata Khumʼekanga, lukanga lukumbu
la Latuyalaka Kanga lulimbilimbi.
16Elanyelu ka Moaba kutsha ndja.
Asui andi wambusukana esadi.
17Nyu tshe weli lʼutshimba andi,
nyuleli.
Nyu tshe wateyaka lukumbu landi,
Nyuti nyati: Yee, ukalimba andi wa
wulu ambuhimbo,
Danga dia lutumbu!
18We ona umuntu usi Dibona,
Uhulo uma lʼedjaselu ka lutumbu laye.
Udjase lu kete yambuma.
Unanyishi wa Moaba ambuya dia
ndjukolosha,
Ambulanya wembe aye wa ta.
19We ona umuntu usi Aroere,
Utemali lʼumamu a mbuka.
Endi, umbuli one layalawo,
La one layahandi wati: Kambutumba na?
20Moaba ambutshama sonyi, ne dia vo
wambulanyema.
Nyusekhumi lʼalelu, nyudi tukuku.
Nyusanya lukumu lʼumamu wa
Aronona nyati:
21Elumbwelu kambukuma lu kete ya bamubamu, la Holona, la Jaza, la Mefate, 22la Dibona, la Nebo, la Bete-Dibalatayima, 23Kiriyatayima, la Bete-Ngamulu, la Bete-Meona, 24la Keriyote, la Bozera, lu esumba tshe wa lu kete ya Moaba, wa lasuki ndu wʼetali. 25Wulu wa Moaba ambushila. Lunya landi lamboko, mbata Latuyalaka.
26Nyuwudjuya wanu, ne dia ndi akasemanela la Latuyalaka, dia ndi mingito lu tuwoki yandi, dia ndi ndjala ndu engo ka tola! 27Isariyele kundjala engo ka dionyo le ye uka? Undi, ndi akandama lʼatei a evi mbatunyunyinginyiaka ote lamʼatuyoteketaka dikambu diandi?
28Nyu asi Moaba, nyumo uma lʼesumba,
Nyutudjase lʼatei wʼave.
Nyuyali uku inga, katutshaka kefu
kato lʼumamu a minga!
29Shu takuki lukumu lʼutaku wa Moaba —
Ndi eko la utak u efula —
Uma lu lahi landi, ndjalanga kandi,
la djawudi yandi, ndu lu ndjambiya
kʼutema andi.
30Dimi mbeyaka utaku andi, aui andi
wʼanyanya.
Ndjasema kandi hatshi nduku dikambu,
mbata Latuyalaka.
31Diako mbalelami Moaba,
Mbadami tukuku dikambu dia Moaba
tshe.
Wayutshela asi Kire-Herese utanda.
32We kalelami, we okodi wa vinyo wa
Sibima, uleki Jazere.
Tahi yaye yakakumi pulu la wedi
wʼashi a waki.
Yo yakakumi pulu ndu lʼashi a waki
wa la Jazere.
Unanyishi ambukhunguso dia mbosa
elua aye wʼowo la wanu aye.
33Ongenongeno, la ongenongeno a wuki
ambumo
Uma lʼesui wʼeteto wa lu kete ya
Moaba.
Dimi lambumia ashi wʼelua lu ahuli
watuwuhinaka.
Nduku uhinyi weli la ongenongeno.
Waelu kema waelu wʼongenongeno.
34Tukuku tʼalelu tʼuma la Heshibona tambukuma pulu la Elale. To tambukema edja ndu la Jahaza, uma la Zoara pulu ndu la Horonayima, edja ndu la Engelate-Shelishiya, ne dia ndu ashi wa la Nimirime wambulanyema. 35Dimi layushila one latulambulaka elambu lu alunga, one latutshumbelaka ditemolatemola diandi malashi lu Moaba ushiki, mbata Latuyalaka. 36Okone utema ami atukhumaka akhumu uku dikhumu dia pungi lu dikambu dia Kire-Herese, ne dia diango tshe diakawamotsha, diakashisho. 37Ete wʼantu tshe waya toholo tutu, ndedu yawo tshe yambunyema. Vo wakayakote puta lu anya awo, wakalote akutu lu kindi yawo. 38Ladiku dia ete wa mvudu ya Moaba ndu lu ahuli wa hwe, eko paka alelu atu, ne dia dimi lakuli Moaba uku mbaka kʼanyanya, mbata Latuyalaka. 39Ndi wuhu ambuwule li! Ndi akhumu wakhumawo li! Ndi wuhu wambukadimula Moaba okongo la sonyi li! Osoku mbambuyala Moaba engo ka tola la engo ka mbate asulu le waku tshe wa lʼutshimba awo.
40Latuyalaka kata ati:
Nyendi, utunyi utsha nfumbo uku
pungu;
Ayusimbula ahafu andi dia ndosha
Moaba;
41Esumba wutsha mpandjwama, ngeli
yutsha mbosama.
Unja oso, etema wʼandoshi wa ta wa
Moaba wutsha ndjala
Uku wa umuntu latata lono.
42Asi Moaba wayushila ushiki;
hawuyala wudja ntu,
Ne dia vo wakasemanela la Latuyalaka.
43We usi Moaba, woma a wuki, wawu,
la otei,
Weko la ntundu kaye, mbata Latuyalaka.
44One lalawo woma, ayutambela lu
wawu;
La one layutumba uma lu wawu,
ayundama lʼotei;
Ne dia dimi lutsha mbela eleku kʼasui
le Moaba! mbata Latuyalaka.
45Andawi wambutemala lu dedi dia
Heshibona waha la wulu,
Ne dia dja yambutumba uma la
Heshibona
La lumbi la dja uma lʼatei wa Sihona.
Yo yambutshumba emamu wa Moaba,
Ndu alembo wa kusu wa lʼete wʼakanga
a lundju.
46Yee, Moaba, mananu le ye!
Asi Kemoshe wambushila!
Anʼaye wʼapami wambotolama lu
fumbi,
La anʼaye wʼamantu lu lohombo!
47Keli dimi layukaluya asi Moaba
wakatolama lu fumbi
Lu nshi yayayi, mbata Latuyalaka.
Oso eli elumbwelu ka Moaba.
Currently Selected:
Jeremiya 48: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
