Jeremiya 23
23
Ekalwelu kʼAtshikadi
1Latuyalaka kata ati: Mananu kayali le alami wʼekoko, watudiakaka ndu watuhandjulaka ekoko ami watumuleshaka! 2Diako mbatami, dimi Latuyalaka, Unyashungu wa Isariyele, lu dikambu dia alami watuleshaka wudja ami nti: Nyu nyakahandjula ekoko ami, nyakawetshanya etali, nyu kumbelama ololo. Kakiane dimi lutsha nyela elanyelu ne dia etsha anyu wa kolo. 3Dimi layusanganya atshikadi wa ekoko ami, uma lʼahuli tshe wakamawatshanya, layakaluya lu ekutu awo. Ku vo wayutana, wayufulanela. 4Dimi layukitsha alami dia mbalamaka. Vo wayaleshaka; hawuyuka woma kuyanga mundama la sasi. Nduku otoi awo ayushisho, mbata Latuyalaka.
5Nyulungi, nshi yukuyala, yayumomongia Davidi dimonga diʼololo, ku dio diayuyala khumʼekanga. Ndi ayuyala khumʼekanga, ayongona, ayusambulaka ololo ndu usimbwi lu kete nye, mbata Latuyalaka. 6Juda ayushimbamela lu nshi yandi, ndu Isariyele ayuyala la lutui tshitshi. Ku vo wayuwetaka lukumbu lone vati: Latuyalaka ololo asu.#23:6 Jer. 33:14-16.
7Okone Latuyalaka kata ati: Nyulungi, etena kayuyala, kahutaka antu vati: Uku eli latuyalaka, lakatundja asi Isariyele uma lu kete ya Edjibitu la lumu! 8Keli wayutaka vati: Uku eli Latuyalaka, lakela tukanula ta khumbu ka Isariyele uma lu kete ya la ngelʼa kushi ndu uma lu kete tshe yakandawatshanya la lumu! Vo wayudjase lu kete yawo.
Latuyalaka Ambutuna Aui wʼAmvutshi wa Kashi
9Lu dikambu diʼamvutshi, sulu diami
diambate,
Weka ami tshe wusaka lukumba.
Dimi lambuyala uku untu lambudjo
wanu,
Uku untu lakandami la wanu,
Ne dia Latuyalaka ndu dia aui andi
wʼekila.
10Kete yambulula too lʼakanga a lukesu.
Yo yaya lʼutanda ne dia mananu.
Adiyu wa lʼusui wambulungula.
Vo watulawoka utsha lu kolo.
Wulu awo weko paka dia ntsha kolo,
11Ne dia ndu amvutshi ndu elombedi
wambusuwo.
Dimi lakatani kolo kawo ndu lu
luudu lami,
Mbata Latuyalaka.
12Diako mbayuyala mbuka kawo oselo
lu udjima.
Vo wayusukwama, wayoko loko,
Ne dia dimi layuwaela elanyelu lu
eleku kayumalumbuya,
Mbata Latuyalaka.
13Dimi lakenyi dikambu diʼenginya le
amvutshi wa la Samariya.
Vo wakataka akambu wahatayi lu
lukumbu la Bala,
Wakanganyia wudja ami Isariyele.
14Dimi lakenyi dikambu dia wononyi
Ndu le amvutshi wa la Jerusalema.
Vo watunanaka, watokendakendaka
lu kashi.
Vo watukikitshaka anya wʼatshi wa
kolo,
Wuhu waheyi untu nkalula untu uma
lu kolo kandi.
Vo tshe wambuyala le mi uku
Sodoma#23:14 Etat. 18:20. la asi Jerusalema uku Ngomora.
15Diako mbata Latuyalaka Kanga
lulimbilimbi,
Okone lu dikambu diʼamvutshi ati:
Nyuki; dimi layalesha kundju,
layanosha ashi wa lolengo;
Ne dia uma le wo, kambudiangana
eonywelo ka Unyashungu lu kete tshe.
16Latuyalaka Kanga lulimbilimbi kata okone ati: Tanyulungaki aui w amvutshi watunyutelaka akambu wahatayi. Vo watunyulungamiyaka akambu ulungamiyalungamiya. Vo watunyutelaka waenelo wʼuma lʼetema awo, aha wʼuma lʼunyo ami, dimi Latuyalaka. 17Vo watutelaka waku watutunaka vati: Latuyalaka kata ati: Nyu nyayuyala la ki. Vo watutelaka waku tshe watuyelaka saki yʼetema awo vati: Nduku kolo kayukuma le nyu.
18Akona lʼatei awo akemala lʼului ami
wa sheki,
Dimi Latuyalaka, dia mbuka la
mpukama aui ami?
Akona akahuke tui lu aui ami,
akawauki?
19Nyuki, ngimbi ka Latuyalaka,
Ududu andi, ambudiangana,
Luhunga la wulu layokomola lu ete
wʼantu wa kolo.
20Kele ka Latuyalaka hukitakita,
Edja ndu lamʼayundushidiya kene tshe
Kakandasanguya lʼutema andi.
Nyu nyayumana dikambu ne fundu
lu nshi yayayi.
21Dimi kuntuma amvutshi ane, keli vo
wakatshu.
Dimi konteketa la wo, keli vo wakataka
akambu wahatayi.
22Utunduyala vo wakemala lʼului ami,
Vo wutukia wudja ami aui ami,
Wutakaluya uma lu mbuka kawo ka
kolo
Ndu uma lʼetsha awo wa kolo.
23Undi, dimi leko paka Unyashungu weli lasuki, aha ndu Unyashungu wa etali? mbambula Latuyalaka. 24Latuyalaka kambula ati: Untu mbeyaka ndjashe lu ahuli w usheshe, wahameyi mbena uka? Undi, dimi handudi too ndu lʼulungu ndu la kete? mbambula Latuyalaka. 25Dimi lakuki aui wʼamvutshi wakataka akambu wahatayi wa kashi lu lukumbu lami, wata vati: Dimi lakenyi do! dimi lakenyi do! 26Edja ndu etena kakona kayukimo amvutshi ane mvuta akambu wahatayi wa kashi, mvuta akambu wahatayi wa lukesu uma lʼetema awo? 27Vo watukanaka dia mbuhiya wudja ami lukumbu lami lu alu watuwusakwanelaka, uku akuhela washewo lukumbu lami dikambu dia Bala. 28Umvutshi lakenyi do, asakuli do diako, keli one lakuki diui diami, ataki diui diami la kolamelu. Okoko wana wasohanyawo puhudi la epunga? mbambula Latuyalaka. 29Latuyalaka kambula ati: Undi, diui diami aha uku dja mbedio, aha uku uhumo wata dive? 30Okone dimi kema kame la amvutshi watuvaka aui ami, untu lʼuntu uma le unyandi, mbata Latuyalaka. 31Latuyalaka kata ati: Nyulungi, dimi kema kame la amvutshi watusutshasutshaka nimi yawo wata vati: Latuyalaka kata. 32Nyulungi, dimi kema kame la amvutshi wʼalo wa kashi watasakulaka, watunganyiaka wudja la kashi yawo, ndu la ndjasema yawo yʼanyanya. Dim, kumbatuma, kuyanga mbatela diui. Vo hawukimanyia wudja one nduku yema, mbata Latuyalaka.
33Lamʼayukumbula usi wudja one, umvutshi, kana olombedi ati: Kakona keli endelu ka Latuyalaka? Kakaluya diui wati: Nyu mbeli endelu kako Dinu layunyukadja, mbata Latuyalaka. 34Naka umvutshi, olombedi kana usi wudja ayuta ati; Endelu ka Latuyalaka, dimi layusuya pami kako ndi la wa lu luudu landi. 35Dieli la nyu dia mumbwana, untu la unyandi, untu la onangu nyati: Diui diakona diakakukalusha Latuyalaka? Aui akona wakandatshi? 36Tanyutaki ntu nyati: Endelu ka Latuyalaka, ne dia endelu kako kambuyala diui dia untu tshe. Nyu nyambufutanya aui wa Unyashungu a lumu, Unyash: ngu asu, Latuyalaka Kanga lulimbilimbi. 37Dieli la ye dia mumbula umvutshi wati: Diui diakona diakakukalusha Latuyalaka? Aui akona wakandatshi? 38Latuyalaka kata okone ati: Ne dia nyu nyambuta diui ne nyati: Endelu ka Latuyalaka, diakamanyutumela diui nti: Tanyutaki ntu nyati. Endelu ka Latuyalaka. 39Diako mbayu-munyuhela, mbayumunyukadja nyu la usumba one wakamanyusha, nyu la watshenyu, uma la ntundu kami. 40Dimi layunyela dionyo dia pundju, ndu sonyi ka pundju wuhu wahuhameki.
Currently Selected:
Jeremiya 23: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
