Jeremiya 18
18
Ukingi la Diwumba
1Diui diakayi le Jeremiya uma le Latuyalaka ati: 2Uneli, utshu utsha lu luudu lʼukingi a puki. Dimi layutukukia aui ami leko. 3Lamʼakamakumi lu luudu lʼukingi a puki, lakutani atsha eshingito wa diwumba. 4Lamʼakatate mbaka lu anya wʼukingi, ndi akose diwumba diako, akatshi kekina kakayuyala ololo lu ashu andi.
5Diui dia Latuyalaka diakayi le mi ati: 6Nyu khumbu ka Isariyele, dimi haleyi nyutsha uku akatshi ukingi a puki one? mbata Latuyalaka. Nyu wudja wa Isariyele nyulungi, uku eli diwumba lu anya wʼukingi, mbenyu lu anya ami. 7Etena tshe kayumuta diui dikambu dia wudja kana diulelu, dia dinya, dihandjula, kana dilanya, 8naka wudja ako wakamataka aui wayukadimo uma lu kolo yawo, dimi layolemba utema dia kolo kakamasanguya mbatshela. 9Etena tshe kayumuta diui dikambu dia wudja kana diulelu, dia mbuhika la mbushikike, 10naka wudja ako wayutsha kolo la ntundu kami, diaha nkitanyia aui ami, dimi layukadimo uma lʼololo wakamasanguya mbatshela. 11Okone, kakiane otekete lʼasi Juda la wane wudjashi la Jerusalema wati: Latuyalaka kata ati: Nyulungi, lambolongosola elanyelu dikambu dianyu. Dimi lambusanguya dia nyutshela kolo. Nyukaluli untu lʼuntu uma lu mbuka kandi ka kolo, nyolongosole mbuka yanyu la ditshelu dianyu.
12Keli vo mvutaka vati: Dikambu so anyanya! Shu tayuyelaka paka tukanyi tasu, shu tshe tayutshaka uku saki yʼetema asu wa kolo.
13Diako mbata Latuyalaka okone ati:
Nyumbuli wedja, akona wakuki
akambu wa wuhu oso?
Usekaseka wʼemuma Isariyele akatshi
dikambu dia kolo kuleki.
14Lungi lʼekama la tshitshi la Lebanona
nshilaka lu ave lʼekungu wa Heremona?
Ashi watokelaka lu ekedi wʼuma
lʼekungu wʼetali mumaka uka?
15Wudja ami wambumbuhela,
Wambutshumbela ditemolatemola
malashi.
Vo wakatakana lu ditshelu diawo
Lamʼakawakendakendaka lu mbuka
yʼedjedja.
Vo waketetaka lu tuwuka, lu mbuka
yahatalongoswama.
16Wakete kete yawo engo ka woma.
Engo ka mpongwela soi pundju.
Wane tshe watetetaka loko,
watukashimoka,
Watutshindjaka ete.
17Dimi layadianganya la ntundu
kʼutunyi awo
Uku la lopepe lʼuma lʼehutwelu.
Dimi layuwauka okongo, haluwaenda
lu nshi yawo ya pa.
Tuseki tʼAntu la Dombelo Dia Umvutshi
18Vo wakatanela vati: Nyeso, tudjeli Jeremiya sheki, ne dia elembe hawushisho le elombedi, alaka le akanga a yimba, kuyanga aui le amvutshi. Nyuyeti, tutudiaki lʼaui, tatulungaki aui andi nduku yema.
19Latuyalaka li, umpukami,
Ulungi aui a waku wama la mi.
20Undi, kolo ayuyala difutu lu akambu
wʼololo?
Vo wakatshimi difuku dia ndjakami.
Uho uku akamemalaka la ntundu kaye
Dia mbateketela akambu wʼololo,
Dia nkadimula kele kaye uma le wo
21Okone ukimo anʼawo dia vo mvo la
ndjala ka kasha.
Akimo dia vo ndjakema la yombo.
Wadiewo wayali aha la ana, ndu wadi
waki edu.
Waumewo wadiakemi, elongo awo
wʼapami wadiakemi la yombo lu ta.
22Alelu watumbi uma lu mvudu yawo,
Lamʼayuwayela andoshi wa ta
shashimuya dia mbalosha,
Ne dia vo wakatshimi difuku dia
mundami,
Wakashe tulunga ta munda ekulu ami.
23Latuyalaka li, we mbeyaka tuseki
tawo tshe ta ndjakami.
Tadimanyiaki ehedia awo,
Kuyanga minya kolo yawo uma la
ntundu kaye.
Vo walanyemi la ntundu kaye.
Uwalumbuya paka lu etena kaye ka
kele.
Currently Selected:
Jeremiya 18: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
