Jeremiya 17

Kolo ka Juda Kaheyi Nyimwama

1Kolo ka Juda kambufundama la luwulu la wulu, la sodi ka dive dia wulu dia pesopeso. To kambufundama lu pasi diʼetema awo, ndu lu seki ya lu diakelu diawo. 2Osoku mbatuhoka ndu anʼawo diakelu diawo la Wa-Ashera weli la tshina diʼetamba wʼeyuyu lu akuna wʼetali. 3Ekungu ami wa lʼusui li, dimi layukimo ukundji anyu la ongonyi anyu diango dia dimbu, ndu ahuli anyu wa ladiku lu kete yanyu tshe, ne dia kolo yanyu. 4Nyu nyayangana uma lʼetenyi kʼukito kakamanyusha. Dimi layunyukimo dia nyu nkambela atunyi anyu ulimu lu kete yahanyeyi, ne dia nyu nyakatshutshiya kele kami. To kayohetaka pundju.

5Latuyalaka kata ati:

Mananu kayali le untu latekamaka

untu,

Lateteka umunyi usuko andi,

Latetoyaka utema andi uma le

Latuyalaka.

6Untu ako ayuyala uku ukumbu lʼusui

wa shenga,

Vo hawenyi ololo lama uyiwo.

Keli vo watutanemaka lu ahuli

wambuma lʼusui wa shenga,

Lu kete ya leho, yahadjashi untu.

7Untu latekamaka Latuyalaka eli la

otshoko;

La Latuyalaka eli elungamelu kandi.

8Ndi ayuyala uku utamba wakawune

lʼumamu wʼashi,#17:8 Esam. 1:3.

Watotolaka ediu awo utsha lʼokedi.

Vo hawutukaka woma lamʼatuyakaka

luhaladi.

Akatshi awo watutshikalaka eleselese.

Vo hawutukananaka lu eleku kʼowo,

Hawutukimoka nto elua.

9Utema ndeka diango tshe lukesu,

Vo weko kolo efula.

Akona ayeya mbulimbitela?

10Dimi Latuyalaka latendaka tukanyi,

latedikaka wongo,#17:10 Eny. 2:23.

Dia nfuta untu lʼuntu uku ditshelu

diandi,#17:10 Esam. 62:12.

Uku elua wʼetsha andi.

11Uku engwe kudami lu ekeli wakito

kumumba,

Osoku mbeli untu latukundjaka

Ekundji uma lu mbuka ka kolo.

Ndi ayetshika lʼatei a nshi yandi,

Ku lʼekumelu, ndi ayuyala paka

enginya.

12Dihuli diʼotemwelo asu eli kiti ka

lutumbu,

Kakediama umaka etatelu.

13Latuyalaka, we keli elungamelu ka

Isariyele.

Waku tshe watukosekaka, wayutshama

sonyi.

Waku wambangana uma le ye,

Wayufundama kumbu la kete,

Ne dia vo wambukoseka we Latuyalaka,

eteko kʼashi wa lumu.

14We Latuyalaka, onkonoya, ku dimi

layokono.

Unshimbeli, ku dimi layushimbamela,

Ne dia we keli lutumbu lami.

15Enda vo watumvutelaka vati:

Lendʼeli diui dia Latuyalaka,

dio diashidiyami kakiane.

16Dimi kunkohenyahenya dia ntuma

kolo esadi.

Dimi kunanga lushi lʼelanyelu nduku

yema.

We mbeyaka dikambu so.

Aui tshe wakamataka waki la ntundu

kaye.

17Tuyalaki engo ka woma le mi,

We eshamelu kami, lu lushi lʼelanyelu.

18Waku watunsuyaka, wutshami sonyi,

Keli dimi tambutshamaki sonyi.

Vo wasaki lukumba,

Keli dimi tansakaki lukumba,

Uwaela lushi lʼelanyelu uwalanya

lʼasui a wulu.

Lushi la Mumuya Mpumbaka Ndjala Ekila

19Latuyalaka akamvutela ati: Tshoka, temali la suku dia Bendjamina, lene atotokaka ndu atutumbaka khumi ya dikanga ya Juda, ndu lu asuku tshe wa Jerusalema. 20Kutuwateli wati: Nyu khumi ya dikanga ya Juda, Juda tshe la asi Jerusalema tshe watotoka lu asuku ane, nyulungi diui dia Latuyalaka. 21Latuyalaka kata ati: Nyewo lu etema anyu. Tanyembaki wutshu lushi la mumuya, tanyuwotshiyaki lu asuku wa Jerusalema.#17:21 Neh. 13:15-22. 22Tanyutundjaki nduku wutshu uma lu mvudu yanyu lushi la mumuya. Tanyutshaki nduku ulimu. Keli nyukidia lushi la mumuya, uku akamadjangela washenyu.#17:22 Etum. 20:8-10; Euh. 5:12-14. 23Keli vo kununga, kumpuke atui, wakayala la ete wulu diaha mbetshama.

24Okone naka nyu nyayumbukela lʼutema otoi diaha mbotshiya wutshu lu asuku wʼusumba one lushi la mumuya, naka nyayukidia lushi la mumuya diaha ntsha nduku ulimu lushi lako, 25kukhumi ya dikanga yudjashi lu kiti ka diulelu dia Davidi la ewandji awo wayotoka lu asuku wʼusumba one wahemi ladiku dia pusupusu ndu lu falasa, vo la asi Juda, la asi Jerusalema. Ku usumba one ayuyalaki la antu pundju. 26Antu wayuya uma lʼesumba wa Juda, ndu uma lʼetshimba wa Jerusalema, uma lu kete ya Bendjamina, uma lʼekidi, uma lu leke lʼekungu, ndu uma la Nengebe, dia mbela elambu wa lutshumba, elambu wa nyama, elambu wa shima, malashi la elambu wʼeukelu ka lusaka uya la luudu la Latuyalaka. 27Keli naka nyu hanyumbukela dia nkidia lushi la mumuya, diaha memba nduku wutshu, kuyanga mboto lu asuku wa Jerusalema lushi la mumuya, dimi layohetsha dja lu asuku wʼusumba. Ku yo yayutshumba mvudu ya khumʼekanga ya la Jerusalema; yo hayudimala.

Currently Selected:

Jeremiya 17: TLL

Highlight

Copy

Compare