Jeremiya 16
16
Elumbwelu ka Latuyalaka le Wudja
1Diui dia Latuyalaka diakayi le mi ati: 2We hutshuka wadi, ndu huyala la ana apami la ana amantu lu dihuli ne. 3Latuyalaka kata okone lu dikambu dia ana apami la ana amantu wayuto lu dihuli ne, lu dikambu dia anyengewo la washewo wayuwauta lu kete nye ati: 4Vo wayuvo la elandu a wulu, hawuwalela kuyanga mbakhunde. Vo wayuyala uku tumi ladiku dia kete. Vo wayudiakema la tombo la ndjala ka kasha. Edu awo wayuyala ma dia fudu ya lʼulungu la dia nyama ya la kete.
5Totoki lu luudu lʼutanda, tutshoki leko dia ntulela, tuyandjayandjaki kame la wo, ne dia dimi lakanya ki kami, ngandji kami ka shikaa, la ketshi kami, uma le wudja one, mbata Latuyalaka. 6Antu a waki ndu wa tshitshe wayuvo lu wudja one. Hawuwakhunde, hawuwalela, hawuwakotela puta, ndu hawuwanyela divu. 7Antu hawuwasha ma lʼutandadia mbasamba ne dia one lambuvo. Vo hawuwasha dikoho diʼesambelu lu dikambu dia shewo kana dia nyengewo. 8Totoki lu luudu la dambu dia mbidjase kame la wo, dia nde la no, 9ne dia Latuyalaka Kanga lulimbilimbi, Unyashungu wa Isariyele, kata okone ati: Dimi layukumiya waelu wʼongenongeno, waelu wʼongenongeno a wuki, kimbu yʼutshuki ndu kimbu yʼutshukami#16:9 Jer. 7:34; 25:10; Eny. 18:23. la ntundu kanyu lu nshi yanyu lu kete.
10Lamʼayuyutela wudja one aui aso tshe, vo wayukumbula vati: Okoko wana wambuta Latuyalaka aui aso tshe wa kolo lu dikambu diasu? Na unedia asu? Kolo kakona kakatatshela Latuyalaka, Unyashungu asu? 11Ku we ayakaluya diui wati: Latuyalaka kata ati: Ne dia washenyu wakanseke, wakayelaka ditemolatemola, wakaditemolaka, la waka-dikhuselaka adui. Vo wakanseke, kunkitanyia elembe ami. 12Keli nyu nyakatshi kolo ndeka washenyu, ne dia nyu tshe untu lʼuntu akayelaka saki kʼutema andi a kolo. Nyu kumbukelami. 13Diako mbayumunyutshanya uma lu kete nye, utsha lu kete yahanyeyi ndu yaki washenyu kumbeya. Nyu nyayutotemolaka ditemolatemola leko ndu la yanyi ndu lʼutshu, ne dia dimi halunyenya olo.
14Latuyalaka kata ati: Etena kayuyala, kahutaka antu vati: Uku eli Latuyalaka lakatundja asi Isariyele uma lu kete ya Edjibitu la lumu! 15Keli, wayuta vati: Uku eli Latuyalaka lakela asi Isariyele uma lu kete ya la ngelʼa kushi la uma lʼahuli tshe wakandawatshanya, la lumu! Dimi layakaluya ntu uya lu kete yakamasha washewo.
16Enda, dimi layeta amundji wa nsi, ku vo wayuwanda. Ndu layeta minginga efula, ku vo wayuwatsha lu ekungu tshe, lu akuna tshe ndu lʼatei a weuku wʼave, mbata Latuyalaka. 17Ashu ami menaka mbuka yawo tshe. Vo haweyi ndjashe uma la ntundu kami, ndu ehedia awo haweyi mbishama lu ashu ami. 18Dimi layosomboya kolo kawo tena pendi, ne dia vo wakalanya kete yami la ditemolatemola diawo dia kolo, diaha la lumu Vo wambuludia etenyi kami kʼukito lʼakambu awo wa wononyi.
19We Latuyalaka keli wulu ami, lungeli
lami,
Eshamelu kami lu nshi ya pa!
Wedja wayuya le ye uma la kuma ya
la kete.
Vo wayuta vati: Washesu wakakiti
paka kashi,
Ditemolatemola diʼanyanya,
diahawasha waho.
20Undi, untu mbeyaka ndjatshela
ditemolatemola?
Dio dieko anyanya.
21Ulungi, dimi layalimbitshiya, layuwaenya lunya lami la wulu ami etena kene ketu. Ku vo wayeya vati: Lukumbu lami leli Latuyalaka.
Currently Selected:
Jeremiya 16: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
