Jeremiya 14
14
Akendji lu Dikambu Dia Langi
1Diui dia Latuyalaka diakayi le
Jeremiya lu dikambu dia langi ati:
2Juda aya lʼutanda, kuki yʼesumba awo
yambolemba.
Antu wambudjase la kete wolotshi
akutu.
Tukuku ta Jerusalema tambumbela.
3Ewandji watutumaka anʼawo lu ashi.
Vo watukumaka lu eshima, keli
hawututanaka ashi.
Vo watukalulaka mbaka tshu.
Vo watukaka sonyi, watukananaka,
watukumbaka ete awo.
4Ekambi wa dikambo watukaka sonyi,
watukumbaka ete.
Kete yatatateka ne dia mvula halo.
Diako mbatukaka ekambi wa
dikambo sonyi,
Matuwukumbaka ete.
5Lufumbo atutaka lʼusui,
Keli atosekaka anʼalo ne dia adiyu
kema.
6Mangana yatemalaka lu akuna wa
hwe hwe,
Yo yatawanaka uku mbulu;
Ashu ayo watuyalaka eungungi ne
dia adiyu kema.
7Kuyanga kolo yasu yambutamia,
we Latuyalaka,
Ukambeli lukumbu laye ulimu,
Ne dia ehedia asu weko efula.
Shu takakutshela kolo.
8We elungamelu ka Isariyele,
ushimbedi awo lu nshi ya pa,
Ukundi ukukiye ndjala uku
ongendangenda lu kete,
Ndu uku umbetshi a mbuka, letola
dia mpanga lushi otoi?
9Ukundi ukukiye ndjala uku untu
luka woma,
Uku dihuka diaheyi nshimbela antu?
Latuyalaka li, we eko lʼatei asu!
Watutetaka lu lukumbu laye:
tututshikaki!
10Latuyalaka kata lu dikambu dia
wudja one ati:
Vo wakalangi dia mbekeko,
hawushimbi ekulu awo.
Diako mbahamalungula dimi Latuyalaka.
Dimi layuho ehedia awo, layasuya ne
dia kolo yawo.
11Latuyalaka akamvutela ati: Tolombelaki wudja one dia vo mpumo lukulu lʼolo. 12Lamʼakilawo ma, dimi haluka esengosengo awo. Lamʼalambulawo elambu wa lutshumba la wa shima, dimi halelungula. Keli dimi layadiaka la yombo la ndjala ka kasha ndu la elandu.
13Dimi lakati nti: Yee! Khumadiondjo Latuyalaka! Mete, amvutshi wakawatela vati: Nyu hanyudiakema la yombo, kuyanga mvo la ndjala ka kasha. Keli Latuyalaka ayunyusha ki ka mete lu dihuli ne. 14Latuyalaka akamvutela ati: Amvutshi watutaka kashi lu akambu wahatayi lu lukumbu lami. Dimi kumbatuma, kumbalakanya, kuyanga nteketa la wo. Vo watunyutelaka akambu wahatayi uma lu enelo ka kashi, uma lʼesakelu ka diwulu, uma lʼengo kʼanyanya ndu uma lu lukesu lʼetema two. 15Okone lu dikambu diʼamvutshi ako watutaka akambu wahatayi lu lukumbu lami, wakimi kuntuma, ndu watutaka vati: Yombo la ndjala ka kasha hawuyala lu kete nye, mbatami dimi Latuyalaka nti: Amvutshi ako wayudiakema la yombo la ndjala ka kasha. 16Ndu antu watuwutelaka akambu wahatayi, wayukadjema lu esese wa Jerusalema dikambu dia ndjala ka kasha la yombo. Nduku untu ayuyala leko dia mbakhunde: vo, wadiewo, anʼawo wʼapami kuyanga anʼawo wʼamantu. Dimi lajakaluya kolo yawo lu ete awo.
17Uwateli diui ne wati:
Ashu ami wakediaki asoi ndu la yanyi
ndu lʼutshu.
Tawuhimboki nkela
Ne dia ona umuntu a wudja ami
lʼemuma
Ambuhumo puta ka wuki, puta ka
wulu kahangone.
18Naka lambutsho lʼusui,
Menyi ku edu wʼantu a waku
wakadiakemi la yombo;
Naka lamboto lʼusumba,
Menyi ku antu wambushila la ndjala,
Ne dia ndu umvutshi ndu olombedi
watetetaka lu kete
Ku waha la ewu.
19Undi, we ambutuna Juda pundju?
Utema aye ambenga Siona diengekhu?
Ukundi akayatokomola wuhu wahateyi
nkono?
Shu takalungamela ki, keli ololo
kundja;
Ndu etena kʼekonwelo, ku woma wa
mamba wambutunda.
20Latuyalaka li, shu tambushula kolo
yasu
Ndu ehedia a washesu,
Ne dia shu takakutshela kolo!
21Tutengaki diengekhu ne dia lukumbu
laye,
Tulanyaki nemo dia kiti ka lutumbu laye.
Uho sheki yaye le su, tuyilanyaki.
22Lʼatei a ditemolatemola dia lu wedja,
Kemotshi mbeyaka ndosha mvula?
Ulungu mbeyaka ntuma mvula?
One latsha akambu ane, aha we
Latuyalaka, Unyashungu asu?
Shu tatukitshaka elungamelu kasu
le ye,
Ne dia we katutshaka akambu ane
tshe.
Currently Selected:
Jeremiya 14: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
