Jeremiya 11
11
Sheki Yakalanyema
1Diui diakayi le Jeremiya uma le latuyalaka ati: 2Uki aui wa sheki nye, otekete le asi Juda ndu le asi Jerusalema. 3Uwateli wati: Latuyalaka, Unyashungu wa Isariyele, kata ati: Mananu kayali le untu lahalungi aui wa sheki nye! 4Sheka yakamadiela washenyu, lu lushi lakamatundja uma lu kete ya Edjibitu uma lu khuka ka mbulu, nti: Nyuhukami aui ami, nyutshi akambu tshe wanyutelami, ku nyu nyayuyala wudja ami, la dimi layuyala Unyashungu anyu; 5dia dimi nshikike daka diakamatshibela washenyu, dia mbasha kete yuludi too lʼawele la usanga, uku wenanyu elo. Ku dimi lakûkaluya diui nti: latuyalaka li, ayali osoku!
6Latuyalaka akamvutela ati: Udianganya aui ane tshe lu esumba wa Juda ndu lu esese wa li Jerusalema wati: Nyulungi aui wa sheki nye, nyatshi. 7Dimi lakewulaka washenyu lʼutema otoi, umaka lushi lukamatundja uma lu kete ya Edjibitu edja ndu elo. Dimi lakawaewulaka pindju tshe nti: Nyukitanyia aui ami: 8Keli vo kunkitanyia kuyanga mpuke atui. Vo tshe wakayelaka saki yʼetema awo wa kolo. Diako mbakamashidiya aui tshe wa sheki nye, yakamawadjangela dia nama, keli vo kumbalama.
9Latuyalaka akamvutela ati: Asi Juda wambontombokwela, ndu asi Jerusalema pupu. 10Vo wakakadimo utsha lu kolo ya washewo wa ntundu, wakatunaka aui ami. Vo wambuyela ditemolatemola dia ditemola. Khumbu ka Isariyele ndu ka Juda wakalanya sheki yami, yakamadji la washewo. 11Diako mbata Latuyalaka ati: Dimi layuwaela elanyelu kahaweya mpanda. Vo wayundelelela, keli dimi haluwaukela. 12Ku esumba wa Juda la asi Jerusalema wayutulelela ditemulatemola diatuwutshumbelaka malashi. Keli dio hadiuwashimbela nduku yema lu etena kawo kʼelanyelu. 13We Juda, uku eli efula kʼesumba anyu, mbeli efula ka ditemolatemola dianyu! Uku eli efula kʼesese wa la Jerusalema, mbakanyatshela engo kene ka sonyi diakelu, diakelu dia ntshumbela Bala malashi.
14Okone toteketelaki wudja one. Tasengesengelaki kuyanga mbalombela, ne dia dimi haluwaukela lamʼayuwundelela lu dikambu diʼelanyelu kawo. 15Kakona katsha ulangimi ami lu luudu lami ntu, lamʼambundutsha kolo yaheyama wuhu one? Alokoloko la elambu wa lutshumba mbeyaka nyushimbela uma lʼelanyelu kanyu ka wuhu one? Lamʼayuya elanyelu kami, nyu nyayongenangena? 16Etena kemotshi, Latuyalaka akakole lukumbu ati: Uweli wʼuyuyu, wuludi too la elua wʼololo. Keli la dikita dia lumbi la dja la wulu mbayundutshumba, la tahi yawo yayowelewele. 17Latuyalaka Kanga lulimbilimbi lakakune, ambuketele elanyelu, ne dia kolo ka khumbu ka Isariyele la khumbu ka Juda, kakawatshi dia mbutsha kele lamʼakawatshumbela Bala malashi.
Sheki ya Ndjaka Jeremiya
18We Latuyalaka akanimbitshiya sheki
yawo, ku lakayimani fundu.
We akamenya sangweyu diawo dia
kolo.
19Dimi laki uku onʼokoko latawalombola
utsha lʼediakelu.
Dimi kumbeya sheki yakawambidjela vati:
Tulanya utamba kame la elua awo!
Tuwunya uma lu kete ya wasena,
Diaha antu mbuho lukumbu landi
ntu.
20Keli we Latuyalaka Kanga lulimbilimbi,
Latusambulaka akambu ololo,
latedikaka etema la tukanyi tʼantu,
Omenya esombweyo kaye le wo,
Ne dia lambushula dikambu diami
le ye.
21Okone Latuyalaka la diui dimotshi lu dikambu diʼasi Anatota, ane watuyangaka lumu lami, wata vati: Tutaki akambu wahatayi lu lukumbu la Latuyalaka, we utukuvo lu anya asu. 22Okone Latuyalaka Kanga lulimbilimbi kata lu dikambu diawo ati: Mete, dimi layasuya, elongo wʼapami wayudiakema la yombo, anʼawo wʼapami la anʼawo wʼamantu wayuvo la ndjala. 23Nduku otoi lʼatei awo layuhanda, ne dia dimi layela elanyelu le asi Anatota lu eleku kayumasuya.
Currently Selected:
Jeremiya 11: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
