Ezekiyele 6

Etelu kʼAkambu Wahatayi lu Dikambu dia Ekungu wa Isariyele

1Diui dia Latuyalaka diakayi le mi ati: 2Onʼa untu, ediya elundji kaye utsha lʼekungu wa Isariyele; uti akambu wahatayi lu dikambu diawo, wati: 3Nyu ekungu wa Isariyele, nyulungi diui dia Khumadiondjo Latuyalaka. Khumadiondjo Latuyalaka kata lu dikambu diʼekungu la akuna, dia ekedi la ekidi ati: Enda, dimi lutsha mbela yombo dia ndo la nyu, layulanya alunga anyu. 4Diakelu dianyu diayulanyema, la difanelu dianyu diayulanyema, la difanelu dia unya diayatshatshema. Dimi layukadja andjakemi anyu la ntundu ka dikishi dianyu. 5Dimi layukitsha edu wʼasi Isariyele la ntundu ka dikishi diawo. Dimi layudianganya weka anyu lʼetshimba wa diakelu dianyu. 6Lu ahuli tshe wudjashinyu, esumba anyu wayuyala atongo, la alunga anyu wayulanyema, dia diakelu dianyu mpandjwama, dia dikishi dianyu mbatshatshema la nanyema, la dia difanelu dianyu dia unya nyukwama, la dia elimu anyu nanyema pundju. 7Antu wayudiakema, wayukalema kalakala lʼatei anyu. Ku nyu nyayeya nyati: Dimi keli Latuyalaka.

8Keli dimi layutshika antu amotshi lʼatei anyu, wayutuhanda yombo lamʼayunyudianganyema lʼatei a waulelu. 9Wane wayutshikala lʼatei anyu, wayutumbuho lʼatei a wedja wayuwotolama fumbi lamʼayumata etemʼawo wa kolo wakawanganyia uma le mi, ndu lamʼayumula ashu awo wakawaetoya dia vo ntemola dikishi. Vo wayutuyahetsha dia kolo yakawatshaka, ndu ne dia akambu awo tshe wa wononyi. 10Ku vo wayeya vati: Dimi keli Latuyalaka. Dimi kumvuta diui dia mbatshela kolo kene utata.

11Khumadiondjo Latuyalaka kata ati: Nyuhumi shole, nyuhumeli lukulu. Nyuti nyati: Yee, lu akambu wa kolo wa wononyi wakatshaka khumbu ka Isariyele, ne dia vo wayudiakema la yombo, ndjala ka kasha la elandu! 12One leli etali, ayuvo lʼelandu; la one leli lasuki, ayudiakema la yombo; la one lambutshikala ndu lambuhanda, ayuvo la ndjala ka kasha. Osoku mbayumushidiya ududu ami le wo. 13Lamʼayukalema edu wasi-kawo wambudiakema lʼatei a dikishi diawo, lʼetshimba wa diakelu diawo, lʼote wa dikuna tshe diʼutali, lʼete wʼekungu tshe, la tshina diʼutamba wʼuyuyu, ndu la tshina diʼuwamba wa mpukaa tshe, ndu lʼahuli wakawalambulaka dikishi diawo malashi, nyu nyayeya nyati: Dimi keli Latuyalaka. 14Dimi layusimbula lunya lami dia ndo la wo, layete kete elanyelu, atongo atu lʼatei wʼadjaselu awo tshe uma lʼusui pulu ndu la Ribila. Ku vo wayeya vati: Dimi keli Latuyalaka.

Currently Selected:

Ezekiyele 6: TLL

Highlight

Copy

Compare