Ezekiyele 7

Ekumelu Kambuya

1Diui dia Latuyalaka diakayi le mi ati: 2We onʼa untu, Khumadiondjo Latuyalaka katela kete ya Isariyele ati: Elanyelu kambukuma lu beke nei dia kete. 3Dianyu ku elo! Dimi layunyuka kele, layunyulumbuya uku etsha anyu, layunyahe akambu anyu tshe wa wononyi. 4Ashu ami hawunyuhandja. Dimi halunyuka ketshi, layunyutshela uku etsha anyu, la akambu a wononyi weli lʼatei anyu. Ku nyu nyayeya nyati: Dimi keli Latuyalaka.

5Khumadiondjo Latuyalaka kata ati: Nyendi, kolo ladiku dia kolo kuyayi. 6Ku elo! Ku elo! Nyendi, ekumelu kambuya esadi dia ndjolo la nyu. 7Elanyelu kambuya le nyu, nyu asi kete. Etena kambukuka, lushi laya suki, lushi lʼohenyohenyo. Waelu wʼongenongeno kema ntu lʼekungu. 8Dimi lutsha nyutshulwela ududu ami, edja ndu lambushidiya kele kami. Dimi layunyulumbuya uku etsha anyu, layunyahe akambu anyu wa wononyi. 9Ashu ami hawunyuhandja; dimi halunyuka ketshi. Dimi layunyutshela uku etsha anyu, la akambu anyu a wononyi weli lʼatei anyu. Ku nyu nyayeya nyati: Dimi Latuyalaka kanyusuya.

10Nyendi, lushi la kolo lutsha nkuka. Elanyelu kanyu kambukuka, kolo kanyu kamboto elua, utaku anyu wambomonga alembo. 11Akambu wa ngala wambuhama, wambuyala uku ohehela wa kolo. Nduku otoi lʼatei wʼului ayutshikala, kuyanga ongonyi awo; nduku layuyala la nemo lʼatei awo. 12Etena kambukuka, lushi laya suki. Usumbi tangenangenaki, usumbishi tanyangaki ne dia kele kambufulanela lʼatei wʼului awo tshe. 13Asundjishi hawukalula utsha lu diango diakawasundja, kuyanga vo weki la lumu. Enelo kene keko lu dikambu diʼului tshe wʼantu; to hukadimo. Nduku untu ayeya nshimbela lumu landi, ne dia kolo kandi. 14Vo wakadi amama, wakayalongosola, keli nduku untu akatshu utsha lu ta ne dia kele kami kambukuma le ului tshe. 15Lʼandja yombo, lʼetei elandu la ndjala ka kasha: one leli lʼusui, ayudiakema la yombo; la one leli lʼusumba, ayuvo la ndjala ka kasha la elandu. 16Naka amotshi lʼatei awo wayuhanda, vo wayuyala lʼekungu uku binga dia lʼekidi dialela dio tshe, untu lʼuntu ne dia kolo kandi. 17Anya awo wayuyala woduwodu, la adui awo wayolelo, wayuyala uku ashi. 18Vo wayolota akutu; woma wa mamba wayakumba; dundji diawo diayuyala sonyi ketu; la ete awo wayuyala ehombo etu. 19Vo wayukadja fesa yawo lʼesese, paunyi yawo yayuyala uku engo ka mindu. Fesa yawo la paunyi hayeya mbashimbela lu lushi la kele kami, dimi Latuyalaka. Vo haweyi nkutsha ehumba wa nyumu yawo la yo, kuyanga ndutsha akundju awo la yo, ne dia yo yambuyala utamba wa ntakanya lu dikambu diʼuhedia awo. 20Vo wakose elengalenga kawo ka dimena, wakakiete engo ka ndjasema. Vo wakatshi dikishi diawo dia wononyi la diango diawo diatumuhetshaka lato, diako mbayumukiete engo ka mindu le wo. 21Dimi layukikimo lʼanya wʼasi wedja uku diango diawo, ndu le antu wa kolo uku engo ka dimbu, ku vo wayukilanya. 22Dimi layukadimula elundji kami uma le wo. Vo wayulanya dihuli diami dia ngandji. Evi wayoto loko, wayudilanya, 23wayudiete elanyelu. Ne dia kete yambulula too la dikila diʼandjakemi, la usumba weko too lʼakambu wa ngala, 24diako mbayumela wedja wuleki kolo dia ndjahotola mvudu yawo. Dimi layukumia wulu awo wʼutaku. Ahuli awo wʼekila wayulanyema. 25Lamʼayuya asui, vo wayuyanga ki, keli to huyala. 26Asui wayahatana ladiku diʼasui, la lukumu la fono ladiku dia lukumu la fono. Vo wayuyanga enelo uma le umvutshi, keli elembe wayushisho uma lʼanya wʼelombodi, la alaku uma le dihansamendi. 27Khumʼekanga ayutundo la delu, uwandji ayate asulu, la anya wʼasi wudja wayudidima la woma. Dimi lavatshela uku etsha awo. Layalumbuya uku atuwulumbuyaka akina. Ku vo wayeya vati: Dimi keli Latuyalaka.

Currently Selected:

Ezekiyele 7: TLL

Highlight

Copy

Compare