Ezekiyele 42

1Ku ndi akatumbi la mi utsha lu seke dia lʼetei dia lu leke la ngelʼa kushi. Ku ndi akantole utsha lu tundju takelanedi la seke dia etemwelo, ndu takelanedi la luudu lu leke la ngelʼa kushi. 2Utali wa luudu lu leke la ngelʼa kushi aki kubita lukama; la wekeki alo, kubita akumi itanu. 3La ntundu ka seke dia lʼetei, dia kubita akumi ahendi lu welelo wʼudihi wʼave wa lu seke dia lʼetei, kaki mbalasa kʼedihi esatu. 4La ntundu ka tundju kaki osese waki la wuki wa kubita dikumi, la utali kubita lukama. Asuku wa tundju wakeledi utsha la ngelʼa kushi. 5Tundju tʼudihi wa ladiku takaleki tundju tʼudihi wa lʼatei, ndu udihi wa lʼesi tshitshe lu wekeki; ne dia mbalasa kʼudihi wa ladiku kakaleki wuki. 6Tundju taki la edihi esatu, keli to kundjala la dikoho uku dikoho dia lu seke dia lʼandja, diako mbakasusama tundju ta ladiku uleki tundju ta lʼesi ndu ta lʼatei. 7Eheli ka lukumbu kakasimbimadi la tundju, kakelanedi la seke dia lʼandja la ntundu ka tundju tako, kaki utali wa kubita akumi atanu, 8ne dia utali wa tundju taki lu seke dia lʼandja waki kubita akumi atanu. Tundju takelanedi la etemwelo taki kubita lukama lʼutali. 9Lʼesi a tundju tako kaki eotwelo ka lu leke lʼehutwelu, lene akawotoka uma lu seke dia lʼandja, 10lenʼaki etatelu kʼeheli ka lʼandja.

Tundju takiko lu wuki wʼeheli ka lukumbu la seke ka lu leke la la diku dia kushi, lu welelo wa seke ndu wa luudu. 11Osese omotshi wakiko la ntundu ka tundju tako uku la ntundu ka tundju ta lu leke la ngelʼa kushi. Utali awo la wuki awo waki pupu uku ekina; aotwelo awo, elongoswelo kawo la kuki yawo waki pupu. 12Lʼesi a tundju ta lu leke la diku dia kushi kaki eotwelo lu wedi wa lu leke lʼehutwelu, lene akawotoka lu osese wa lʼatei wa tundju, ndu wakelanedi la eheli kaki lʼatei.

13Ku ndi akamvutela ati: Tundju ta lu leke la ngelʼa kushi la tundju ta lu leke la diku dia kushi telanedi la seke, teko tundju tʼekila, lene atusukanaka elombedi le Latuyalaka dia nde mbu ya nde yuleki ekila. Loko kayuwukitshaka diango diuleki ekila; elambu wa shima, nyama yʼelambu wʼekesanelu ndu yʼefutelu kʼunungu, ne dia dihuli dieko ekila. 14Lamʼayotoka elombedi lu dihuli diʼekila, vo hawutumbaka uma lu dihuli diʼekila, dia ntsho utsha lu seke dia lʼandja. Keli vo wayutakitshaki eloto watuwutshaka ulimu leko, ne dia eloto ako weko ekila. Vo wayutalotaki eloto ekina ntundu ka vo nsukana dia ndjutsha elimu wʼantu.

15Lamʼakandashili mbedika lʼetei a dihuli diʼetemwelo, ndi akantundja la suku diaki lu leke lʼehutwelu, ku ndi akayedika lukumbu utshimba tshe. 16Ndi akedika lukumbu lu leke lʼehutwelu la tshamba ya wedikelu. Utali wa leke lako tshe aki kubita kama tshanu. 17Ndi akedika lukumbu lu leke la ngelʼa kushi la tshamba ya wedikelu. Utali wa leke lako tshe aki kubita kama tshanu. 18Ndi akedika lukumbu lu leke la diku dia kushi la tshamba ya wedikelu. Utali alo aki kubita kama tshanu. 19Ndi akakadimo lu leke lʼedjelu, ku ndi akedika kubita kama tshanu la tshamba ya wedikelu. 20Ndi akedika eheli ka lukumbu lu beke diako nei lʼutshimba tshe. Utshimba wʼeheli kalo aki kubita kama tshanu lʼutali, la wekeki alo kubita kama tshanu pupu, dia mbatanya dihuli diʼekila la dihuli diaha ekila.#42:20 1 Khum. 6:1-38; 2 Ek. 3:1-9.

Currently Selected:

Ezekiyele 42: TLL

Highlight

Copy

Compare