Ezekiyele 40

Enelo ka Etemwelo

1Lʼetatelu ka eleku kʼakumi ahendi lʼatanu ka lohombo lasu, lu lushi la dikumi la ngondo ka ntundu, lu eleku ka dikumi lʼanei lʼokongo wʼelanyelu kʼusumba; lushi lako, mbakambahe Latuyalaka lunya. 2Lu waenelo wa Unyashungu, mbakandambela lu kete ya Isariyele, mbakandambidjasha lʼote wʼukungu wʼutali, lene aki efanelu kʼusumba lu welelo ami.#40:2 Eny. 21:10. 3Lamʼakandatole leko, dimi lakendi, ku lakeny; pami kemotshi kaki leko. Efanelu kandi kaki uku ohotela. Ndi aki la ushinga wa linene la tshamba ya mbedika lu lunya;#40:3 Eny. 11:1; 21:15. ndi akemadi la suku. 4Ku untu ako akamvutela ati: Onʼ a untu, enda la ashu aye ndu uki lʼatui aye, udji tukanyi taye lu akambu tshe wayangami nkenya, ne dia we akayi lindu dia dimi ndjukenyawo. Kutusanyiya khumbu ka Isariyele akambu tshe wenaye.

5Eheli ka lukumbu kakadingi luudu tshe; untu ako akakimedi tshamba ya wedikelu lu lunya, tali ayo aki kubita shamalu. Ndi akedika eheli la yo; keka kato aki tshamba otoi, la utali ato tshamba otoi. 6Ku ndi akatshu utsha lu suku diakeledi lu leke lʼehutwelu ka unya, akambela lu kibandelu. Ndi akedika ukingo wa suku, tshamba otoi lu wuki; la lu suku dikina, tshamba otoi lu wuki. 7Luudu tshe lʼulami laki la utali wa tshamba otoi, la wekeki tshamba otoi pupu; dihuli dia lʼasa mvudu yʼalami diaki kubita tshanu. Ushingiti wa suku dia la mbalasa, lasuki la mbalasa ka la suku, waki tshamba otoi. 8Ndi akedika ndu mbalasa ka la suku utsha la luudu, tshamba otoi. 9Ku ndi akedika mbalasa ka la suku, to kaki kubita enanei, la dikoho diato kubita hyendi hyendi, mbalasa ka la suku kaki utsha la luudu. 10Mvudu yʼalami ya la suku dia lu leke lʼehutwelu ka unya, yaki shatu wedi, shatu wedi; mvudu shatu yaki yediko otoi; dikoho dia lu wedi la wedi diaki yediko otoi pupu. 11Wuki wʼeotwelo ka suku waki kubita dikumi. Wuki wa suku waki kubita dikumi la shatu. 12Dihuli dia la ntundu ka mvudu yʼalami diaki kubita otoi lu wedi omotshi la kubita otoi lu wedi ukina. Luudu la luudu lʼalami laki la kubita shamalu lu wedi omotshi, la kubita shamalu lu wedi ukina. 13Ndi akedika suku uma lʼote wa yindju motshi, utsha lʼote wa yindju kina; utali waki kubita akami ahendi la tshanu la wuki, kubita akumi ahendi la tshanu lʼasa asuku ahendi wʼelanedi. 14Ndi akedika ndu mbalasa ka la suku kubita akumi ahendi. Lʼutshimba wa mbalasa ka la suku aki seke. 15Uma la ntundu ka suku lʼeotwelo ka mbalasa ka lʼetei aki kubita akumi atanu. 16Ekalamandji waki lu adidishi wa la tundju ndu lu ahuli wa lʼasa yindju la yindju, ndu lu mbalasa lʼutshimba tshe lʼetei. Dikoho diakasangema esatu wʼatuku.

17Ndi akantole lu seke dia lʼandja, lene aki mvudu la seke diʼave lʼutshimba tshe. Tundju akumi asatu taki lʼudihi ako wʼave wa ladiku. 18Udihi wʼave waki lʼumamu wa suku; vo waki utali uku yediko yʼasuku. Oso aki udihi wʼave wa lʼesi. 19Ndi akedika wuki umaka la suku dia lʼesi edja ndu lu seke dia lukumbu dia lʼetei utsha lʼandja, aki kubita lukama.

Ku ndi akatshu la ntundu kami utsha la ngelʼa kushi. 20Ulungi, eotwelo kaki leko kakeledi utsha lu leke la ngelʼa kushi, kaki lu seke dia lʼandja. Ndi akedika utali la wuki wa suku diʼutsha lu seke dia lʼandja, diakeledi utsha la ngelʼa kushi. 21Tundju tʼalami tusatu taki lu wedi omotshi, la tusatu taki lu wedi ukina. Tediko ta dikoho diadio ta lu mbalasa yadio taki pupu la tediko ta lu suku dia ntundu kubita akumi atanu lʼutali, la kubita akumi ahendi la tshanu lu wekeki. 22Adidishi adio, mbalasa yadio la esatu adio wʼatuku waki pupu la tediko ta lu suku dia lu leke lʼehutwelu. Wakambelaka utsha leko lu bandelu esambeli; mbalasa kadio kaki la ntundu ka bandelu. 23Suku diakiko lu lukumbu la seke dia lʼetei, diakelanedi la suku dia lu leke la ngelʼa kushi, la dikina diakeledi utsha lu leke lʼehutwelu. Ndi akedika uma lu suku dimotshi utsha lu suku dikina, kubita lukama.

24Ndi akantole utsha lu leke la diku dia kushi, lene aki suku dia lu leke la diku dia kushi. Ndi akedika dikoho diadio la mbalasa yadio, ku tediko tadio taki wuhu ako. 25Ekalamanaji waki lu adidishi la mbalasa yadio lʼutshimba tshe, uku adidishi wa lu asuku akina. Utali kubita akumi atanu; wekeki kubita akumi ahendi la tshanu. 26Wakambelaka utsha leko lu bandelu esambeli. Mbalasa kadio kaki la ntundu ka bandelu diako. Esatu wʼatuku waki lu wedi la wedi lu dikoho diadio. 27Suku diakiko lu seke dia lʼetei lu leke la diku dia kushi. Ndi akedika utali uma la suku dimotshi utsha la suku dia lu leke la diku dia kushi, kubita lukama.

28Ndi aketi la mi lu suku dia lukumbu utsha lu seke dia lʼatei. Ndi akedika suku dia lu leke la diku dia kushi; die diaki yediko pupu uku asuku akina. 29Tundju tadio, dikoho aiadio la mbalasa kadio, waki tediko pupu uku tʼasuku akina. Dio diaki la adidishi la mbalasa lʼutshimba tshe; utali adio waki kubita akumi atanu; la wekeki adio, kubita akumi ahendi la tshanu. 30Mbalasa kaki utali wa kubita akumi ahendi la tshanu; la wekeki kubita tshanu. 31Mbalasa kadio kakelanedi la seke dia lʼandja. Esatu wʼatuku waki lu dikoho diadio. Edelu kadio kaki la bandelu enanei.

32Ndi akantole utsha lu seke dia lʼatei dia lu leke lʼehutwelu; ndi akedika suku, tediko tadio taki pupu la tediko ta akina. 33Tundju tadio, dikoho diadio la mbalasa kadio waki tediko pupu, uku tediko ta akina. Dio diaki la adidishi la mbalasa lʼutshimba tshe. Utali adio aki kubita akumi atanu, la wekeki adio kubita akumi ahendi la tshanu. 34Mbalasa kadio kakelanedi la seke dia lʼandja. Esatu wʼatuku waki lu dikoho dia lu wedi la wedi. Edelu kadio kaki la bandelu enanei.

35Ndi akantole utsha lu suku dia la ngelʼa kushi, ku nui akadiedika. Tediko tadio taki pupu, uku tediko ta akina 36tundju tadio, dikoho diadio la mbalasa kadio. Ekalamandji waki lʼutshimba tshe. Utali adio waki kubita akumi atanu; wekeki adio, kubita akumi ahendi la tshanu. 37Mbalasa kadio akelanedi la seke dia lʼandja. Esatu wʼatuku waki lu dikoho diadio dia lu wedi la wedi. Edelu kadio kaki la bandelu enanei.

38Yindju motshi yakiko, yakawotoka uma lu mbalasa ka la suku. Loko kakawasulaka elambu wa lutshumba. 39Lu mbalasa ka la suku kaki mesa ehendi lu wedi la wedi, wakawadiakaka nyama yʼelambu wa ekesanelu, la yʼelambu wa efutelu kʼunungu ladiku diawo. 40Mesa ehendi waki lʼandja a mbalasa, la eotwelo ka suku dia lu leke la ngelʼa kushi. Ndu mesa ekina ehendi waki lu wedi ukina wa mbalasa ka la suku. 41Mesa enei waki lʼetei lʼumamu wa suku, la mesa enei waki lʼandja lʼumamu wa suku. Mesa enanei mbakiko, ladiku diawo kakawadiakaka nyama yʼelambu. 42Mesa enei wakatshama lʼave wa losela, wakiko dikambu dia elambu wa lutshumba. Mesa la mesa aki la utali wa kubita otoi la etenyi; wekeki, kubita otoi la etenyi; la wemema, kubita otoi. Lu mesa ako kakawakitshaka dihumo diakawadiakaka nyama yʼelambu wa lutshumba ndu yʼelambu wa nyama vakawadiakaka. 43Tokoho taki la utali wa wuki wʼetambi ka lunya, takahikama lu eheli lʼutshimba tshe. Funda ya nyama yakahumbaka nkitshama lu mesa.

44Ku ndi akambotshiya uma lʼandja, utsha lu seke dia lʼetei, ku lakenyi tundju tuhendi taki lu seke dia lʼetei: motshi yaki lu wedi wa suku wa lu leke la ngelʼa kushi, yakeledi utsha lu leke la diku dia kushi; la kina yaki lu wedi wa suku wa lu leke la diku dia kushi, yakeledi utsha lu leke la ngelʼa kushi. 45Ndi akamvutela ati: Yindju nye yeledi utsha la diku dia kushi, yeko dikambu dia elombedi weli la okende wʼetemwelo; 46ku yindju yeledi utsha la ngelʼa kushi, yeko dikambu dia elombedi weli la okende wʼediakelu. Vo weko ana apami wa Zadoka, lakaleki ana akina wa Lewi nsukana le Latuyalaka, dia mbukambelaka ulimu. 47Ndi akedika seke: kubita lukama lʼutali, kubita lukama lu wekeki; dio diaki beke nei diedimi. Ediakelu kaki la ntundu ka etemwelo.

48Ku ndi akantole utsha lu mbalasa kʼetemwelo. Ndi akedika dikoho dia mbalasa: kubita tshanu lu leke lomotshi, la kubita tshanu lu leke lukina. Wuki wa suku waki kubita dikumi la nyei. Peli dia la suku diaki kubita shatu lu wedi la wedi. 49Utali wa mbalasa waki kubita akumi ahendi, la wekeki, kubita dikumi la hyendi. Wakambelaka utsha leko lu bandelu dikumi. Dikoho dia mbalasa diaki lu wedi la wedi wa dikoho dia lu eheli.

Currently Selected:

Ezekiyele 40: TLL

Highlight

Copy

Compare