Ezekiyele 39

1We onʼa untu, uti akambu wahatayi lu dikambu dia Ngongo wati: Khumadiondjo Latuyalaka kata ati: Enda, dimi lutsha mendana la ye, we Ngongo, uwandji a wuki wa la Mesheke ndu wa la Tubala. 2Dimi layukukutula, layukolombola, layukutundja uma la kuma ka lu leke la ngelʼa kushi. Dimi layukukumia lu ekungu wa Isariyele. 3Dimi layokola uta aye uma lu lunya laye la lomoso, layokosha pitu yaye la pami. 4We ayoko lu ekungu wa Isariyele, we la wane tshe watukuyelaka ndu wane weli kame la ye. Ku dimi layunyukimo le wehu tshe wa fudu yatuhatulaka, ndu le nyama ya lʼukunda dia nyu ndjala mbu yawo ya nde. 5Nyu nyayutuvo lʼusui wa tshekelee, ne dia dimi lambuta, mbata Khumadiondjo Latuyalaka. 6Dimi layutuma dja lu Mangongo, ndu le waku wudjashi la lutui tshitshi lu emamu wʼashi; ku vo wayeya vati: Dimi keli Latuyalaka.

7Dimi layulimbitshiya wudja ami, Isariyele, lukumbu lami lʼekila, dimi handjetawo lukumbu lami lʼekila mbisanema ntu; ku wedja wayeya vati: Dimi keli Latuyalaka, lʼEkila lʼIsariyele. 8Enda, akambu ako wutsha ndja; vo wayutshama, oso eli lushi lakamataka, mbata Khumadiondjo Latuyalaka.

9Wane wudjashi lʼesumba wa Isariyele wayutumba, wayete dihumo kunyi, dingawu dia tshitshe ndu dia waki, eta la pitu, ndu esongo la akonga, wayuditshumba. Vo wayudidjaka lu dja deku esambeli. 10Vo hawunaka kunyi uma lʼusui, hawunyukula etamba wa lʼukunda, ne dia vo wayongonyaka kunyi ya dihumo. Vo wayusuya waku wakasuyaka. Vo wayohotola diango uma le waku wakahotola diango, mbata Khumadiondjo Latuyalaka.

11Lu lushi lako, dimi layusha Ngongo dihuli diʼekhundelu lu Isariyele, lʼukidi watetetaka antu lu leke lʼehutwelu ka unya lʼuduwa. Dihuli diako diʼekhudelu diayudihela ambetshetshi mbuka. Leko kayuwukhunde Ngongo la ului andi tshe wʼantu. Vo wayetaka dihuli diako vati: Ukidi wa Hamona-Ngongo (kitshimudi ati: Ukidi wʼului wʼasi Ngongo). 12Khumbu ka Isariyele ayakhunde ngondo esambeli, dia mbedia kete. 13Antu tshe wa lu wudja wayuwakhundeka, ku vo wayuyala la nemo lushi layumutumbwama, mbata Khumadiondjo Latuyalaka. 14Vo wayosonola antu wayukambaka nshi tshe lʼulimu one wa mbeteta lu kete la nkhunde waku wambutshikala ladiku dia kete, dia yedia. Ku lʼokongo a ngondo esambeli etundu, vo wayuyangiayangia. 15Vo wayukindula lu kete, ku lamʼayena untu omotshi dikandja diʼuntu, ndi kadji djimbitelu laawo, edja ndu lamʼayudikhunde akhundanyi lʼUkidi wa Hamona-Ngongo. 16(Usumba wa Hamona weko ndu vo leko.) Wuhu oso mbayuwedia kete.

17Khumadiondjo Latuyalaka kata ati: We onʼa untu, uteli wehu tshe wa fudu la wa nyama wati: Nyomote, nyusangani uma lu beke tshe; nyuyi lʼulambu wayangami nyulambula, ulambu a wuki ladiku diʼekungu wa Isariyele, dia nyu nde emunyi la no dikila. 18Nyu nyayole emunyi wʼahuka, nyayono dikila diʼewandji wa la kete, ekoko a waumi, ana wʼekoko, mbudi, esongo wa ngombe; yo tshe enunyu etu uma la Bashana. 19Nyu nyayole wata edja ndu nyambuluta, nyayono dikila edja ndu nyu nyambudjo lʼulambu wamumunyulambula. 20Nyu nyayuluta lʼemunyi wa falasa, wʼambahemi wa falasa, wʼahuka ndu wa wehu tshe wʼalimbi, uma lu mesa ami, mbata Khumadiondjo Latuyalaka.#39:20 Eny. 19:17-18.

21Dimi layukitsha lutumbu lami lʼatei a wedja, ku wedja tshe wayena elumbwelu kami kayumutsha, ndu lunya lami layumukitsha ladiku diawo. 22Umaka lushi loso edja ndu lu nshi yayayi, khumbu ka Isariyele wayeya vati: Dimi keli Latuyalaka, Unyashungu awo. 23Wedja wayeya vati: Khumbu ka Isariyele wakatolama lu fumbi ne dia uhedia awo. Vo wakantombokwela, mbakamashe elundji kami uma le wo, ndu mbakamakimo lu anya wʼatunyi awo, dia vo tshe ndjakema la tombo. 24Dimi lakatshela uku mindu yawo la ehedia awo, lakashe elundji kami uma le wo.

25Okone Khumadiondjo Latuyalaka kata ati: Dimi lutsha nkaluya Jakoba uma lu fumbi, lambuka utundu wa khumbu ka Isariyele tshe ketshi. Dimi layuyala la kandjema uma lu lukumbu lami lʼekila. 26Vo wayuhela sonyi kawo, la ehedia awo tshe wakawampediaka, lamʼayuwudjase la lutui tshitshi lu kete yawo; nduku lahenyahenya. 27Lamʼayumakaluya uma lʼatei a wedja, lamʼayumasanganya uma lu kete yʼatunyi awo, dimi layukidiama lʼatei lu ashu wa wedja efula. 28Vo wayeya vati: Dimi leli Latuyalaka, Unyashungu awo, ne dia dimi lakatole lu fumbi lʼatei a wedja, ndu lambasanganya lu kete yawo hita. Dimi halutshika nduku otoi awo lʼatei a wedja. 29Dimi halushe elundji kami uma le wo ntu, ne dia dimi lambahe khumbu ka Isariyele Nyuma kami, mbata Khumadiondjo Latuyalaka.

Currently Selected:

Ezekiyele 39: TLL

Highlight

Copy

Compare