Ezekiyele 4

Edingelu ka Jerusalema Kambusanguyama

1We onʼa untu, ose etshi ka lukinga, ukikitsha la ntundu kaye. Usanguli usatu wa Jerusalema loko. 2Udingi, utshi wumbe, utshimi lungeli dia ndo la wo. Ukitsha lalu lʼutshimba tshe, ukitsha ndu dihumo dia ta. 3Ose panu ka luwulu, ukikitsha uku eheli ka luwulu lʼasaye la usumba. Ediya elundji kaye utsha leko, udingi usumba dia vo nyingama kwi. Dikambu ne diayali djimbitelu le khumbu ka Isariyele.

4Etami lu luhandju la lomoso. Dimi lutsha nkahela kolo ka khumbu ka Isariyele. Uku efula ka nshi yayuyetama lu luhandju lako, mbayuyuwaembela koloyawo, 5ne dia dimi lambukosonwela nshi kama shatu la akumi divwa yedimi la efula ka deku diʼasui awo. Osoku mbayuyembela khumbu ka Isariyele asui awo. 6Lamʼayuyushidiya akambu ane, ketami lu luhandju la pami, ku we ayembela khumbu ka Juda asui awo nshi akumi anei. Dimi lambukosonwela lushi otoi lʼote wʼeleku otoi. 7Ediya elundji kaye utsha lʼusatu wa Jerusalema, usimbuli lunya laye laha la dihondo, utaki akambu wahatayi dikambu diʼusumba. 8Enda, dimi lutsha nkukeleka ekodi, we hukadimo uma lu luhandju lomotshi utsha lu luhandju lukina, edja ndu lamʼayuyushidiya nshi yʼedingelu kaye kʼusu-mba.

9Ose epunga wa menge, wa yelela, la konde, djese, asami, la ahoho, uwadji tshe lu puki otoi. Udiete mbu ya nde yukuki efula ka nshi yayuyetama lu luhandju. Nshi kama shatu la akumi divwa mbayuyudile. 10We ayolekaka ma yediko ya wutshu wa toshekele akumi ahendi la lushi la lushi. Kolekaki etena otoi la lushi la lushi. 11We ayonokaka ashi yediko ya etenyi otoi kʼasamalu ka hina la lushi la lushi. Konokaki etena otoi la lushi la lushi. 12We ayolekaka ma diako uku ekati wʼepunga wa menge. We ayekateka la ntundu kʼantu lu dja yohetshami la tumi tʼantu. 13Latuyalaka ikati ati: Ukuku mbayolekaka asi Isariyele ma diawo mindu lʼatei a wedja wayumuwatshanya. 14Ku dimi lakati nti: Hai, Khumadiondjo, Latuyalaka! enda, dimi latayalanya. Umaka nshi yami ya dikenda, dimi latali nyama kambuvo usena, kana nyama kambundama le nyama ka ngala. Unatshi wa wononyi watoto lu unyo ami. 15Ku ndi akamvutela ati: Enda, dimi lutsha nkusha tumi ta ngombe lu dihuli dia tumi tʼantu, dia we nkate ekati aye ladiku diato. 16Ndi akamvutela ati: Onʼa untu, enda, dimi lutsha nanya ekundjelu ka ma lu Jerusalema. Vo wayolekaka ma paka yediko ya tshitshe, wuludi to la woma. Vo wayonokaka ashi lu tediko ta tshitshe, wasaka lukumba. 17Dimi layutsha dikambu ne dia vo mpumba ma la ashi, la dia vo mendana wasaka lukumba, ndu dia vo monda la uhedia awo.

Currently Selected:

Ezekiyele 4: TLL

Highlight

Copy

Compare