Ezekiyele 3

1Ndi akamvutela ati: Onʼa untu, uli kene kambuyukundja, uli wombo uku wa buku, utshu, ototekete la khumbu ka Isariyele. 2Dimi lakafula unyo, ku ndi akandesha wombo. 3Ndi akamvutela ati: Onʼa untu, ulutsha dikundju diaye, uludia esohi aye la wombo ako wamumunyusha. Dimi lakadile, ku dio diaki mpe uku usanga lu unyo ami.#3:3 Eny. 10:9-10.

4Ku ndi akamvutela ati: Onʼa untu, uneli, utshu le khumʼekanga ka Isariyele, utuwateli aui ami. 5Ne dia dimi hakutumi utsha le wudja wʼoteketa wa kana, kana wahayeyi, keli utsha le khumbu ka Isariyele — 6aha le wedja efula wʼoteketa wa kana ndu wa wulu, wahayukaka aui awo. Utunduyala dimi nkutumi le wo, tshiki wutukukela. 7Keli khumbu ka Isariyele hawukukela, ne dia vo hawumbukela. Khumbu ka Isariyele tshe weko la ete wulu ndu la etema wulu. 8Ulungi, dimi lutsha mbete elundji kaye wulu utsha le dundji diawo, la ote aye wulu utsha le ete awo. 9Dimi lutsha mbete elundji kaye wulu, uku dive dia wulu diuleki akina. Tuwaukaki woma, tateki asulu dikambu dia waendelu awo, kuyanga mbewo khumbu kʼatomboki. 10Ndi akamvutela ati: Onʼa untu, udji aui ami tshe wayumukutela lʼutema aye, uhuke atui ololo. 11Uneli, utshu le waku weli lu lohombo, asi wudja aye, utotekete la wo. Kuyanga vo wayulunga kana hawulunga, kuwateli wati: Khumadiondjo kata okone ati:

12Nyuma ka Unyashungu akambedia, ku lamʼakunela lutumbu la Latuyalaka uma lu dihuli dialo, dimi lakuki lundju la wulu la kete yadidima lʼokongo ami. 13Dimi lakuki luhelu lʼahafu wa difanelu dia nyama nye lamʼakawasakanaka, la luhelu la etshimbi laki lasuki ladio. Lo laki uku luhelu la kete mbadidima. 14Ku Nyuma ka Unyashungu akambedia, akamembe. Dimi lakatshu la wutshu ndu la kele lʼutema. Lunya la Latuyalaka lakambahema wulu. 15Dimi lakakumi la Tele-Abiba le afumbi wakadjashi lʼumamu wʼokedi wa Kebara. Dimi lakadjase lʼatei awo nshi esambeli laamba.

Ulami le Isariyele

(Ezek. 33:1-9)

16Lamʼaketi nshi esambeli, diui dia Latuyalaka diakayi le mi ati: 17Onʼa untu, dimi lambukudja undakanyi wa khumbu ka Isariyele. Okone ulungi aui wʼuma lʼunyo ami, uwaewuli la aui ami. 18Naka dimi lambutela untu a kolo nti: Mete we ayuvo, ndu naka we hutedi untu a kolo kuyanga mbewula uma lu mbuka kandi ka kolo, ndu dia nshimbela lumu landi, untu ako a kolo ayuvo lu kolo kandi. Keli dm layukolomba dikila diandi. 19Naka we ayewula untu a kolo, ku ndi hakadimo uma lu kolo kandi, kana uma lu mbuka kandi ka kolo, ndi ayuvo lu uhedia andi ku we ayushimbela lumu laye. 20Ntu, naka untu ololo ambetola uma lu ololo andi, ambutsha kolo, la dimi lambukitsha utamba a ntakanya la ntundu kandi, ndi ayuvo, ne dia we kumbewula. Ndi ayuvo lu kolo kandi, la akambu andi wʼololo wakandatshaka wayuhamela. Keli dimi layukolomba dikila diandi. 21Keli naka we ambewula untu ololo diaha ndi ntsha kolo, ku ndi hatshi kolo, ndi ayulumba, ne dia ndi aketawo aui aye, ku we ayushimbela lumu laye.

Umvutshi Ambuyala Lumi

22Lunya la Latuyalaka lakambahema ntu leko. Ndi akamvutela ati: Uneli, utshu utsha lʼusui, ku dimi layutoteketa la ye leko. 23Dimi lakunela, lakatshu utsha lʼusui. Enda, lutumbu la Latuyalaka laki leko, uku lutumbu lakamenyi lʼumamu a Kebara, ku dimi lakako ekhukhumadi la kete. 24Ku Nyuma ka Unyashungu akambahema, akambetula, akameme. Ndi akamvutela ati: Tshoka tuyadihi lu luudu laye. 25Keli we onʼa untu, uki, vo wayukukeleka ekodi, ku we heya mbeteta lʼatei wʼantu. 26Dimi layumamanya lulimi lu kumbʼa lulimi dia we ndjala kanga lumi. Ku we heya ndjala undakanyi awo, ne dia vo weli khumbu kʼatomboki. 27Keli lamʼayumoteketa la ye, dimi layufula unyo aye. Ku we ayuwatela wati: Khumadiondjo Latuyalaka kata ati: One leli la atui uki, la one laha la atui tukaki, ne dia vo weli khumbu kʼatomboki.

Currently Selected:

Ezekiyele 3: TLL

Highlight

Copy

Compare