Ezekiyele 38

Etelu kʼAkambu Wahatayi lu Dikambu Dia Ngongo

1Diui dia Latuyalaka diakayi le mi ntu ati: 2Onʼa untu, ediya elu-ndji kaye utsha le Ngongo, lu kete ya Mangongo,#38:2 Eny. 20:8. uwandji a wuki wa lu Mesheke ndu wa la Tubala, uti akambu wahatayi lu dikambu diandi. 3Uwuteli wati: Latuyalaka kata ati: Ulungi, dimi layendana la ye, we Ngongo, uwandji a wuki wa la Mesheke ndu wa la Tubala. 4Dimi layukukadimula, layukokohe todi lu manga yaye. Dimi layukutundja, we la ului aye wʼalimbi tshe, falasa la ambahemi aye, wane tshe wolotshi eloto wa ta. Ului a wuki wʼantu wayemba dingawu dia waki ndu dia tshitshe, vo tshe wayosome tombo lu kindi. 5Asi Peresiya, asi Kusha la asi Puta weko kame la wo, vo tshe untu lʼuntu eko la engawu la lufule la luwulu. 6Ngomere la dengalenga diandi tshe; Bete-Tongarama, lu beke dia ngelʼa kushi la dengalenga diandi tshe — wedja efula wayuyala kame la ye. 7Uyalongosole, ee, uyalongosole we la antu aye tshe watusanganaka la ye; uyali ulami awo. 8Lʼokongo wa nshi efula, dimi layuya le ye. Ku lu deku diayayi, we ayutsho dia ntolosha wudja wakasanganyema uma lu wedja, lu ekungu wa Isariyele wakatetemala nanyema. Keli wakawaela uma lu wedja, vo tshe wayudjase la lutui tshitshi. 9We ayumbela, ayuya uku ngimbi We ayukumba kete uku dingi, we la dengalenga diaye tshe, ndu wedia efula kame la ye.

10Khumadiondjo Latuyalaka kata ati: Lu lushi lako, tukanyi tayuya lu yimba yaye, ku we ayusanguya esangweyu ka kolo. 11Ku we ayuta wati: Dimi layumbela lu ngelu yaha la kumbu ya peli. Dimi layutsho le wane weli la mumuya, wudjashi la lutui tshitshi, le wane tshe waha adjaselu awo la peli, ndu waha la tukengeti kuyanga kuki. 12Dimi layutsho dia ntosa diango dia dimbu, ndu dia ntosa diango dia lohotola. Dimi layukadimula lunya lami dia ntolosha ahuli wakalanyema wimbulala antu kakiane, ndu dia ntolosha antu wakasanganyema uma lu wedja, wakakundja dungalunga la diango, wudjashi kʼatei a kete. 13Sheba, Dedana la ambetshetshi wʼukanda wa la Tarashishi, kame la elongo wʼapami awo tshe wayunyumbula nyu asi Ngongo, vati: Undi, dia ndjumba diango mbuyenyu? Nyu nyambuya dia ndjohotola, mbakanyayasanganya ului a wuki? dia ndjotola fesa la paunyi mbuyenyu; dia ndjosa dungalunga la ekundji, dia ndjumba diango efula efula?

14Okone we onʼa untu, uti akambu wahatayi, uteli Ngongo wati: Khumadiondjo Latuyalaka kata ati: Lu lushi lako, lamʼayudjase wudja ami Isariyele la lutui tshitshi, we ayeya dikambu so. 15Nyu la wedja efula nyayutumba uma lu dihuli dianyu dia la kuma ka leke la ngelʼa kushi, tshe wayahemi lu falasa, ului a wuki wʼantu, limba la wuki lʼalimbi. 16Nyu nyayuya dia ndjolosha wudja ami Isariyele, uku dingi diutsha nkumba kete. Lu nshi yayayi, dimi layunyela dia nyu ndjolo la wudja ami, dia wedja tshe nimbitelami lamʼayumukidiama lʼatei anvu, nyu asi Ngongo, lu ashu awo. 17Khumadiondjo Latuyalaka kambula ati: Aha lu dikambu dianyu mbakataka ekambi ami amvutshi wa Isariyele lu nshi yʼedjedja, lamʼakawataka lu nshi sho deku efula vati: Dimi layunyela dia nyu ndjalosha? 18Lu lushi lako, lamʼayuya asi Ngongo dia ndjolosha wudja wa Isariyele, ududu wayutumba uma lʼehembe ami, mbata Khumadiondjo Latuyalaka. 19Ne dia lu kandjema kami la dja ya kele kami mbatami nti: Edidimelu ka wulu kayuyala lu kete ya Isariyele lu nshi yako. 20Okone nsi ya lu ashi a waki, fudu ya lʼulungu, nyama ya lʼukunda, diango tshe diayakutula lu kete, ndu antu tshe weli la kete, wayudidima la ntundu kami. Ekungu wayukungokungo, peli diʼave wa lʼekungu diayunyukwama; la peli tshe dia lukumbu diayunyuko. 21Dimi layusanganya weuhu tshe wa woma wa mamba dia ndosha Ngongo, mbata Khumadiondjo Latuyalaka. 22Dimi layalumbuya la elandu la dikila. Dimi layalosha, vo, elui awo, la wedja efula weli kame la wo, ngimbi ka wulu ka mboko, dja la tsho. 23Dimi layenya wedja efula wuki ami la ekila kami. Dimi layuyaenya le wo, ku vo wayeya vati: Dimi keli Latuyalaka.

Currently Selected:

Ezekiyele 38: TLL

Highlight

Copy

Compare