Ezekiyele 37

Ukidi wa Weka wa Weumu

1Lunya la Latuyalaka laki ladiku diami. Ndi akamembe lu Nyuma kandi, akatukitsha lʼukidi; ukidi ako waki too la weka. 2Ndi akambetshetsha lʼatei awo. Mete, vo waki efula ka wulu lʼukidi ako; vo waki weumu etu. 3Ndi akambula ati: Onʼa untu, weka ene mbeyaka ndjala la lumu? Ku dimi lakûkaluya diui nti: We Khumadiondjo Latuyalaka keya. 4Ndi akamvutela ntu ati: Usambisha weka ene; uwateli wati: Nyu weka wa weumu, nyulungi diui dia Latuyalaka. 5Khumadiondjo Latuyalaka katela weka ene ati: Nyulungi, dimi layu-nyufufa luwi, ku nyu nyayuyala la lumu. 6Dimi layunyudja eshisha, layunyumama emunyi, layunyukumba diuwu, layunyufufa luwi, ku nyu nyayuyala la lumu. Osoku nyu nyayeya nyati: Dimi keli Latuyalaka.

7Okone dimi lakasambisha uku akandambidjangela. Ku kʼamakamasambishaka, lundju la wulu lakukema, esaka nelu kakayala. Weka wakamotshama kame, weka la weka lu weka awo. 8Dimi lakendi, menyi ku eshisha ene waya ladiku dia weka, emunyi wambumamema loko, la diuwu diambekumba; keli luwi talaki loko. 9Ku ndi akamvutela ntu ati: Usambisha luwi, ulusambisha, we onʼa untu, wati: Khumadiondjo Latuyalaka kata ati: We luwi, uyi uma lu beke nei, oto lu edu ene wakadiakema, keli vo wayali la lumu. 10Okone dimi lakasambisha uku akandambidjangela, luwi lakoto lu alimba awo, ku vo wakayala la lumu. Vo wakemala lʼekulu awo,#37:10 Eny. 11:11. waki ului a wuki wʼantu.

11Ndi akamvutela ati: Onʼa untu, weka ene weli khumbu ka Isariyele tshe. Ku vo mvutaka vati: Weka asu wakumi, elungamelu kasu kakashili; shu takombiombiama tshe. 12Okone usambisha, uwateli wati: Khumadiondjo Latuyalaka kata ati: Nyulungi, dimi layufula waumbu anyu, nyu wudja ami, layunyutundja uma lu waumbu anyu; layunyela lu kete ya Israiyele. 13Nyu nyayeya nyati: Dimi keli Latuyalaka, lamʼayumufula waumbu anyu, ndu lamʼayumunyutundja lu waumbu anyu, nyu wudja ami. 14Dimi layunyudja Nyuma kami, ku nyu nyayuyala la lumu. Dimi layunyukitsha lu kete yanyu hita, ku nyu nyayeya nyati: Latuyalaka kakati dikambu diako ndu kakadishidiya, mbata Latuyalaka.

Kame ka Juda la Isariyele

15Diui dia Latuyalaka diakayi le mi ntu ati: 16We onʼa untu, ose utamba omotshi, ufundi wati: Ne dia Juda la asi Isariyele wambekesanela la ndi; ku ose utamba ukina, ufundi loko wati: Ne dia Josefu, utamba wa Efarayima, ndu ne dia khumbu tshe ka Isariyele wambekesanela la ndi. 17Ukakatanya etamba ako dia vo ndjala utamba otoi lu lunya laye. 18Lamʼayukumbula asi wudja aye vati: Undi, we hatulimbitshiya kitshimudi ya dikambu ne? 19Kakaluya diui wati: Khumadiondjo Latuyalaka kata ati: Layosa utamba wa Josefu (weli lu lunya la Efarayima) la wauhu wa Isariyele watekesanelaka la ndi. Dimi layumamanya kame la wo, kame la utamba wa Juda, ku dimi layuwete utamba otoi. Vo wayuyala utamba otoi lu lunya lami. 20Etamba wakayafundi loko, wayuyala lu lunya laye la ntundu ka ashu awo. 21Uwateli wati: Khumadiondjo Latuyalaka kata ati: Nyulungi, dimi layosa asi Isariyele uma lʼatei a wedja, lene akawatshu, la-yasanganya uma lu beke tshe, ku lakakaluya lu kete yawo. 22Dimi laka-waete wudja otoi lu kete, lu ekungu wa Isariyele; khumʼekanga otoi ayuwaulela vo tshe. Vo hawuyala wedja ehendi, kuyanga nkahanya lu waulelu ahendi ntu. 23Vo hawuyusana ntu la dikishi diawo, la akambu awo wa wononyi, kuyanga la ehedia awo. Keli dimi Uyatundja uma lʼahuli tshe wakawadjashi, lene akawatshaka akambu wa kolo. Dimi layuwaedia, ku vo wayuyala wudja ami, la dimi layuyala Unyashungu awo.

24Ukambi ami Davidi kayuyala khumʼekanga kawo.#37:24 Ezek. 34:24. Vo wayuyala la ulami otoi, wayuyela adjangu ami, wayulamaka elembe ami, wayetshaka. 25Vo wayudjase lu kete yakamasha ukambi ami Jakoba, lene akadjashi washewo. Vo wayudjase leko pundju, vo la anʼawo la ekana awo, ku ukambi ami Davidi ayuyala uwandji awo pundju. 26Dikambu dikina, dimi layudja la wo sheki ya ki. Yo yayuyala sheki ya pundju lʼasami la wo. Dimi layakitsha, layafudia, ndu layukitsha etemwelo kami pundju lʼatei awo. 27Edjaselu kami kayuyala lʼatei awo. Vo wayuyala wudia ami, la dimi layuyala Unyashungu awo.#37:27 2 Kor. 6:16; Eny. 21:3. 28Ku wedja wayeya vati: Dimi keli Latuyalaka, latukidiaka Isariyele, lamʼayuyala etemwelo kami pundju lʼatei awo.

Currently Selected:

Ezekiyele 37: TLL

Highlight

Copy

Compare