Ezekiyele 36

Elongoswelo ka Isariyele

1We onʼa untu, uti akambu wahatayi lu ekungu wa Isariyele, wati: Ekungu wa Isariyele, nyulungi diui dia Latuyalaka! 2Khumadiondjo Latuyalaka kata ati: Ne dia utunyi akati ati: Nʼhi! ndu ati: Ahuli wʼedjedja waya wasu hita. 3Okone uti akambu wahatayi wati: Khumadiondjo Latuyalaka kata ati: Ne dia, ee, ne dia wakanyete tongo tu; wakanyomene esudia lu beke tshe, dia nyu ndjala ukito wʼatshikadi a wedja ndu engo ka wunandu lʼelomo wʼateketshi, ndu engo ka mvutaka kumu ya kolo ka wedja. 4Ekungu wa Isariyele, nyulungi diui dia Khumadiondjo Latuyalaka; Khumadiondjo Latuyalaka katela ekungu la akuna, minga la ekidi, ahuli wʼelanyelu la esumba wakasekama, wakayala engo ka dimbu la ka tola le wedja tshe wadingi. 5Diako mbata Khumadiondjo Latuyalaka ati: Mete, lu dja ya kandjema kami, mbakamateketela atshikadi a wedja, la Edome tshe, wakayasonwela kete yami dia ndjikita lʼongenongeno ndu la dionyo diaki lʼetema awo; dia ndjikita ndu ndjete engo ka dimbu. 6Okone uti akambu wahatayi ne dia kete ya Isariyele, uteli ekungu la akuna, minga la ekidi wati: Khumadiondjo Latuyalaka kata ati: Mete, dimi lakateketa lu kandjema kami ndu lʼududu ami, ne dia nyu nyakutshama sonyi le wedja. 7Okone mbata Khumadiondjo Latuyalaka ati: Dimi lakatshibi nti: Wedja tshe wunyudingi, wayuyaembela sonyi kawo vame.

8Keli nyu, ekungu wa Isariyele, nyayutundja tahi yanyu, nyayotwela wudja ami wa Isariyele elua anyu, ne dia vo waya ka ndja. 9Enda, dimi layuyala la nyu, layukalula le nyu. Nyu nyayukambaka kete, nyayune diango. 10Dimi layunyukitshiya ului a wuki wʼantu, nyu khumbu ka Isariyele tshe. Antu wayulala lu esumba, wayuhika mvudu lu ahuli wʼelanyelu. 11Dimi layunyufudiya antu la nyama; vo wayufulanela, wayutana. Dimi layunyuladia lʼantu uku akinyu ntundu, ndu layunyutshela ololo uleki one wa lʼetatelu; ku nyu nyayeya nyati: Dimi keli Latuyalaka. 12Ee, dimi layokendjakendja antu ladiku dianyu, nyu wudja ami Isariyele. Vo wayunyukundja, nyu nyayuyala engo kawo ka sangu; nyu hanyuwahumbia anʼawo pundju. 13Khumadiondjo Latuyalaka kata ati: Ne dia antu watunyutelaka vati: Nyu nyeli kete yatolekaka antu, ndu nyakahumbia wedja anʼawo. 14Okone we hole antu ntu, kuyanga mpumbia wedja anʼawo ntu, mbata Khumadiondjo Latuyalaka. 15Dimi halukutsha sonyi ka wedja, kuyanga nkete dionyo diʼantu; we hutakanya wudja aye pundju, mbata Khumadiondjo Latuyalaka.

16Diui dia Latuyalaka diakayi le mi ntu ati: 17Onʼa untu, lamʼakadjashi khumbu ka Isariyele lu kete yawo hita, vo wakayisanya uma lu mbuka yawo la etsha awo. Mbuka yawo yaki la ntundu kami uku mindu ya umuntu lu nshi yandi yʼenelo kandi ka dikila. 18Okone dimi lakatshulwela ududu ami, ne dia dikila diakawatshulula lu kete, ndu ne dia vo wakayisanya la dikishi. 19Dimi lakahandjula lʼatei a wedja, ku vo wakadiangana lu kete tshe. Dimi lakalumbuya uku mbuka yawo ndu uku etsha awo. 20Vo wakakumi lu wedja wakawatshu. Vo wakalanya lukumbu lami lʼekila, ne dia antu wakati dikambu diawo vati: Vo weko antu wa Latuyalaka, wane wakatshanyema uma lu kete yandi. 21Keli dimi lakendaka lukumbu lami lʼekila, lakasuwula khumbu ka Isariyele lʼatei a wedja wakawatatshokaka.

22Okone uteli khumbu ka Isariyele wati: Khumadiondjo Latuyalaka kata ati: lu dikambu dia nyu, nyu khumbu ka Isariyele, mbatshami okone. Keli lu dikambu dia lukumbu lami lʼekila, lakanyasuwula lʼatei a wedja wakanyatshu. 23Dimi layukidia lukumbu lami la wuki lakasuwama lʼatei a wedja, lakanyasuwula lʼatei awo. Ku wedja wayeya vati: Dimi keli Latuyalaka, lamʼayumukidiama le nyu lu ashu awo, mbata Khumadiondjo Latuyalaka. 24Dimi layunyutundja uma lʼatei a wedja, layunyusanganya uma lu kete tshe, ku layunyukaluya lu kete yanyu hita. 25Dimi layunyutela ashi wa pudipudi, ku nyu nyayediama. Dimi layunyedia uma lu mindu yanyu tshe, ndu uma lu dikishi dianyu tshe. 26Dimi layunyusha utema wʼuyuyu, ndu layudja nyuma kʼuyuyu lʼetema anyu. Dimi layunya utema a dive uma lu alimba anyu, ku layunyusha etema wʼemunyi. 27Dimi layunyudja Nyuma kami, layunyokendjakendja lu elembe ami, ku nyu nyayulamaka adjangu ami, la mbatshaka. 28Nyu nyayudjase lu kete yakamasha watshenyu. Nyu nyayuyala wudja ami, dimi layuyala Unyashungu anyu.#36:28 Ezek. 11:19-20. 29Dimi layunyushimbela uma lu mindu yanyu tshe. Dimi layela wehu, layuwefudia, keli halutuma ndjala ka kasha lʼatei anyu ntu. 30Dimi layufudia elua wa lʼetamba la tumbatumba dia lu dikambo, diaha nyu ndjala la sonyi lu dikambu dia ndjala ka kasha lʼatei a wedja. 31Ku nyu nyayuho mbuka yanyu yaki kolo, la etsha anyu waki kundjala ololo. Kolo kanyu la akambu anyu wa wononyi wayunyuhekuya.

32Nyeyi nyati: Aha lu dikambu dianyu mbatshami dikambu ne, nyu khumbu ka Isariyele; nyutshami sonvi, nyukitshakitshami dia etsha anyu, mbata Khumadiondjo Latuyalaka. 33Khumadiondjo Latuyalaka kata ati: Lu lushi layumunyedia uma lu kolo yanyu tshe, dimi layuladia antu lʼesumba ntu, ahuli wakalanyema wayolongoswama. 34Kete ya-kalanyema yayukambema dikambo, ne dia yo yakenama shenga lu ashu wʼantu tshe waketaka leko. 35Ku vo wayuta vati: Kete yako yakalanyema, yayuyala uku ekambo ka Edena; esumba awo wakalanyema, wakahandjo; wakatshikala atongo wambuhikama ntu, antu wambudjase loko. 36Wedja wakatshikala wa lʼetshimba anyu, wayeya vati: Dimi Latuyalaka kakahiki ahuli wakanyuko, ndu kakune diango lu ahuli wʼelanyelu Dim. Latuyalaka kateketa, layutsha osoku.

37Khumadiondjo Latuyalaka kata ati: Dikambu dikina, dimi layetawo dia khumbu ka Isariyele mumbulami dia dimi mbatshela dikambu ne: dimi layafudia antu uku nyimba yʼekoko. 38Uku aki limba lʼekoko wʼulambu, ndu uku aki limba lʼekoko wa Jerusalema wakawasonola lu nshi ya waki, osoku mbayulula esumba wakalanyema lʼatoi wʼantu. Ku vo wayeya vati: Dimi keli Latuyalaka.

Currently Selected:

Ezekiyele 36: TLL

Highlight

Copy

Compare