Ezekiyele 35

Etelu kʼAkambu Wahatayi lu Dikambu Dia Ukungu a Seire

1Diui dia Latuyalaka diakayi le mi ntu ati: 2Onʼa untu, ediya elu-ndji kaye utsha lʼUkungu a Seire,#35:2 Is. 34:5-17; 63:1-6; Jer. 49:7-22; Ezek. 25:12-14; Am. 1:11-12; Ob. 1-14; Mai. 1:2-5. uti akambu wahatayi lu dikambu diawo. 3Uwuteli wati: Khumadiondjo Latuyalaka kata ati: We Ukungu a Seire, dimi layendana la ye. Dimi lambusimbe lunya lami ladiku diaye, layukete tongo la engo ka nkashimo. 4Dimi layulanya esumba aye, we ayuyala tongo tu; ku we ayeya wati: Dimi keli Latuyalaka. 5Ne dia we aki utunyi a wulu wʼasi Isariyele, akahenyahenya la yombo lu lushi lʼasui awo, ndu lʼetena kʼekumelu kʼasui awo. 6Diako mbata Khumadiondjo Latuyalaka ati: Uku wemi la lumu! dimi layukukitsha lu dikila, ku dikila diayuku-yela, ne dia we la unungu lu dikambu dia dikila. Osoku dikila diayukuyela. 7Dimi layete Ukungu a Seire engo ka nkashimo la tongo tu. Dimi layunya wane tshe watuyakaka, la wane watutshokaka leko. 8Dimi layuludia wane wayudiakema la tombo lu ekungu aye, lu akuna aye, lu ekidi aye, ndu lu ekedi aye tshe. 9Dimi layukete tongo pundju, esumba aye hawuyala la antu; ku nyu nyayeya nyati: Dimi keli Latuyalaka.

10Ne dia we akati wati: Wedja ene ehendi, la kete nye hyendi yayuyala yami, shu tayuyikita, kuyanga mbaki Latuyalaka leko, 11diako mbata Khumadiondjo Latuyalaka ati: Uku wemi la lumu! dimi layunyutshela la kele la ududu a wulu uku akanyawaenya luhetshu lanyu. Okone dimi layuyaenya lʼatei anyu, lamʼayumunyulumbuya. 12We ayeya wati: Dimi Latuyalaka lakuki tengo tshe yakayatengaka ekungu wa Isariyele, ata wati: Vo wakalanyema, wakakimwama le su dia shu mbelanya. 13Nyu nyakayambiya lu dikambu diami lʼaui wʼuma lʼenyo anyu, nyakafudia aui anyu le mi, dimi lakuki aui ako. 14Khumadiondjo Latuyalaka kata ati: Lamʼayuyala kete tshe la ongenongeno, keli we, dimi layukete tongo. 15Uku akiye lu ngenangena lu dikambu dia ukito wa khumbu ka Isariyele wakalanyema, wuhu ako mbayumukutshela. We Ukungu a Seire ayuyala tongo tu, we la Edome tshe; ku vo wayeya vati: Dimi keli Latuyalaka.

Currently Selected:

Ezekiyele 35: TLL

Highlight

Copy

Compare