Ezekiyele 34

Etelu kʼAkambu Wahatayi lu Dikambu Dia Alami wa Isariyele

1Diui dia Latuyalaka diakayi le mi ati: 2Onʼa untu, uti akambu wahatayi lu dikambu diʼalami wa Isariyele! Uteli alami wati: Khumadiondjo Latuyalaka kata ati: Mananu kayali le alami wa Isariyele watuyaleshaka vame! Undi, alami hawuhumbi ndesha nyimba yʼekoko? 3Nyu nyatolekaka wata awo, nyatolotaka ahondo wa diosa diawo, nyatudiakaka ene weli la wata, keli nyu hanyutuweleshaka. 4Nyu kunkikitsha ene waki wodu, kuyanga nkonoya ene waki la kandji. Nyu kunsula puta ya ene wakahumo, kumungula ene wakanganela, kuyanga ene wakashisho. Keli nyu nyakaweulela la khudu ndu la ngala. 5Vo wakadiangana ne dia vo tawaki la ulami;#34:5 Wal. 27:17; 2 Ek. 18:16; Mat. 9:36; Mak. 6:34. vo wakayala dia nde dia nyama tshe ya lʼusui, ndu vo wakadiangana vwa. 6Limba lami lʼekoko lakadiangana lu ekungu tshe ndu lu akuna tshe wʼetali; vo wakadiangana lu kete tshe, ku nduku untu akeyangi wulu kuyanga mbeyela.

7Okone nyu, alami, nyulungi diui dia Latuyalaka. 8Khumadiondjo Latuyalaka kata ati: Uku wemi la lumu! ne dia ekoko ami wakayala engo ka dimbu, ndu mbu ya nde le nyama tshe ya lʼusui, ne dia nduku ulami akiko, kuyanga alami ami nyanga ekoko ami. Keli alami wakayaleshaka vame, kundesha ekoko ami. 9Okone nyu, alami, nyulungi diui dia Latuyalaka! 10Khumadiondjo Latuyalaka kata ati: Enda, dimi layendana lʼalami, layunya ekoko ami uma lʼanya awo, diaha vo mbalesha ntu, ndu alami vame haweyi nde ntu. Dimi layuhandja ekoko ami uma lʼenyo awo, diaha vo ndjala mbu ya nde yawo ntu.

11Diako mbata Khumadiondjo Latuyalaka ati: Enda, dimi dime layuyanga ekoko ami wulu, layuwela. 12Uku atuyangaka ulami limba landi lʼekoko lu lushi lakawadiangana, osoku mbayumuyanga ekoko ami. Dimi layesanganya uma lʼahuli tshe wakawadiangana lu lushi la lungi la udjima. 13Dimi layuwaela uma lʼatei wʼantu, layesanganya uma lu kete ya wenu wehu, ku layuwaela lu kete yawo. Dimi layuwalesha lu ekungu wa Isariyele lasuki la ekedi, ndu lu ahuli tshe wudjashi antu. 14Dimi layuwalesha adiyu wʼololo. Ekutu awo wayuyala lu ete wʼekungu wa Isariyele. Vo wayetamaka lu ukutu wʼololo. Vo wayolekaka adiyu wʼomongela lu ete wʼekungu wa Isariyele. 15Dimi dime layuyala ulami wʼekoko ami, dime layuwaetamiaka; mbata Khumadiondjo Latuyalaka. 16Dimi layuyanga one wakashisho, layukaluya one wakawatshanya. Dimi layusula puta ka one wakahumo, ndu layokonoya one weli la kandji. Keli dimi layulama one weli la wata ndu weli la wulu. Dimi layuwelesha lu dialelu diʼololo.

17Khumadiondjo Latuyalaka kata dia ekoko andi ati: Enda, dimi layulumbuya lʼasa ekoko la ekoko, ndu lʼasa waumi wʼekoko la weumbi wa mbudi. 18Undi, dikambu dia tshitshe mbedio dia nyulesha lu adiyu wʼololo, dia nyu mvukamakamelaka wane watshikala la ekulu anyu? ndu dia nyu nokaka ashi wa pudipudi ndu nyu nfundjafundja ashi wutshikadi la ekulu anyu? 19Keli ekoko ami watolekaka kene kakanyakamakamela la ekulu anyu, ndu watonokaka ashi wakanyufundjafundja la ekulu anyu.

20Diako mbawatela Khumadiondjo Latuyalaka ati: Mete, dimi layulumbuya ekoko a waki la wa weondju. 21Ne dia nyu nyakasukula ekoko lu pandju ndu lu aheka, nyakakomola ekoko tshe wa weodu la seki yanyu, edja ndu lamʼakanyedianganya vwa. 22Okone dimi layuhandja ekoko ami diaha vo ndjala engo ka dimbu; layulumbuya lʼatei wʼokoko lʼokoko. 23Dimi layekitshiya ulami otoi utu, ukambi ami Davidi ayuweleshaka. Ndi ayuweleshaka, ayuyala ulami awo.#34:23 Eny. 7:17. 24Dime, Latuyalaka, layuyala Unyashungu awo, la ukambi ami Davidi ayuyala uwandji awo.#34:24 Ezek. 37:24. Dimi Latuyalaka kakati.

25Dimi layudja la wo sheki ya ki, layushisha nyama ya ngala lu kete. Ku ekoko wayudjase la lutui tshitshi lʼusui; vo wayushama lʼatei wʼekunda. 26Dimi layuwatshokola kame la ahuli wa lʼutshimba wa dikuna diami, layuwaloshiya mvula lu etena kato, ku to kayuyala mvula kʼotshoko. 27Etamba wa lu dikambo wayoto elua, kete yayutundja tumbatumba. Vo wayuyala la lutui tshitshi lu kete yawo. Ku vo wayeya vati: Dimi keli Latuyalaka, lamʼayumuhimbuhimbuya ekodi wa lokoho lawo, ndu lamʼayumatshungula uma lʼanya wʼantu watakambiaka ulimu. 28Vo hawuyala diango dia dimbu ntu lʼatei a wedja. Nyama ya la kete hayuwele ntu, vo wayudjase la lutui tshitshi. Nduku untu ayuweutsha woma. 29Dimi layuwakitshiya ekambo kʼongonyi, diaha vo ndjala la ndjala ka kasha lu kete, kuyanga mbutshama sonyi le wedja ntu. 30Vo wayeya vati: Dimi Latuyalaka, Unyashungu awo, leko lʼatei awo, la vo khumbu ka Isariyele, weko wudja ami, mbata Khumadiondjo Latuyalaka. 31Nyu ekoko ami, ekoko wa lu dihuli diami diʼeleshelu, la dimi keli Unyashungu anyu, mbata Khumadiondjo Latuyalaka.

Currently Selected:

Ezekiyele 34: TLL

Highlight

Copy

Compare