Ezekiyele 31

1Lʼeleku ka dikumi lʼotoi, lu ngondo ka satu, lu lushi la ntundu la ngondo kako, diui dia Latuyalaka diakayi le mi ati: 2Onʼa untu, umbuli Farayo, khumʼekanga ka Edjibitu, la antu andi wati:

Akona edimiye la ndi lu wuki aye?

3Enda, usi Asuriya aki usasi wa la

Lebanona,

La tahi yʼamena, pukaa uku ukunda

ndu utali efula;

Sodi kawo kakakumaka pulu lʼatei a

wangi.

4Ashi efula wakuhamia, ehongo

wakawudia,

Ndjali kakakelaka lʼutshimba wa dihuli

diakawunami.

Ku tokedi tawo takakumaka lʼetamba

tshe wa lʼekambo.

5Okone vo wakuli utali

Ndeka etamba ekina tshe wa lʼekambo;

Tutahi tawo takafulanela;

Tahi yawo yakasimbemala

Uma lʼefula kʼashi kakawalungulaka.

6Fudu tshe ya lʼulungu yakalongaka

kefu lu tahi yawo;

Nyama tshe ya lʼusui yakutaka ana

Lu dedi dia tahi yawo.

Wedja a waki tshe wakadjaseka lu

dedi diawo.

7Utamba ako waki dimena lu wuki

awo,

Ndu lu esimbemalelu ka tahi yawo,

Ne dia ediu awo wakatshu pulu ndu

lʼashi efula.

8Esasi wa lʼekambo ka Unyashungu#31:8 Etat. 2:9.

haweyi mbuleka.

Tahi ya weoto la yʼetamba ekina

Hayufanyi la tahi yawo.

Nduku utamba ukina wa lʼekambo

Ka Unyashungu wedimi la wo lu

dimena.

9Dimi lakawete dimena uma lu efula

ka tahi yawo.

Okone etamba tshe wa lu Edena,

Ekambo ka Unyashungu, wakawuki

kandjema.

10Diako mbata Khumadiondjo Latuyalaka ati: Ne dia vo wakaleki mbula utali, la sodi kawo kakakumi lʼatei a wangi, ku utema awo aki la utaku ne dia utali awo. 11Dimi layukimo utamba ako lu anya wa dihuka dia wedja; mete, ndi ayuwutshela uku eli ngala kandi. Dimi lakashili mbukadja. 12Angendangenda wuleki ngala lu wedja, wayokota, wayu-wukadja. Tahi yawo yakako lʼekungu ndu lʼekidi tshe, yo yakahimbuhimbuyama, la yakakadjema lu minga tshe ya wedja. Okone antu tshe wa la kete wakamo uma lu dedi diawo, wakoseke. 13Fudu tshe ya lʼulungu yayudjase ladiku dia elanyelu kawo, ndu nyama tshe ya lʼusui yayutsha atuka ayo lʼatei a tahi yawo, 14dia etamba tshe weli lasuki lʼashi tawulaki, ndu tawusimbulaki ete awo lʼatei a wangi; dia elungu tshe weli lʼashi tawuhamaki ndu tawulaki etali ndeka etamba ekina tshe wa lʼusui. Ne dia vo tshe wakakimwama dia nkotama la mbikadjema lu difuku, kame la ana wʼantu la wane watahulo utsha lu Difuku.

15Khumadiondjo Latuyalaka kata ati: Lushi layunduhulo utsha lʼUdimu a Pengandu, dimi layutshutshiya ashi dia vo ntsha utanda. Dimi layukumba ohongo lu dikambu diandi. Dimi layumia ndjali; ashi a waki wayemala; dimi layolotsha Lebanona ahondo wʼutanda. Okone etamba tshe wa lʼusui wayuma. 16Wedja tshe wayudidima uma lu lundju lʼekwelo kawo, lamʼayuwukadjema lʼUdimu a Pengandu, kame la wane watahulo utsha lu Difuku. Etamba tshe wa lu Edena, etamba tshe wakasonwama ndu wuleki amena wa Lebanona, tshe watoloyamaka lʼashi, wakasambama lu ahuli wa lʼesi a kete. 17Ndu vo wayuhulo la ndi utsha lʼUdimu a Pengandu, le wane wakadiakema la yombo; ee, wane wakadjaseka lu dedi diawo, lʼatei a wedja, wayulanyema. 18Akona edimi la ye lu lutumbu ndu lu wuki lʼatei wʼetamba wa lu Edena? We ayukadjema kame la etamba wa lu Edena lu ehongo wa la kete. We ayetama lʼatei a wane waki kumbahema uhekeli, kame la wane wakadiakema la yombo.

Oso eli Farayo la ului andi wʼalimbi, mbata Khumadiondjo Latuyalaka.

Currently Selected:

Ezekiyele 31: TLL

Highlight

Copy

Compare