Ezekiyele 32

1Lʼeleku ka dikumi, lu lushi la ntundu la ngondo ka dikumi lʼahe-ndi, diui dia Latuyalaka diakayi le mi ntu ati: 2Onʼa untu, uleli lu dikambu dia Farayo, khumʼekanga ka Edjibitu; uwuteli wati:

We akayafanya lʼosongo a tambwe

lʼatei a wedja;

We aki uku shimiamba lʼashi a waki.

We akahami lu ndjali yaye, akafungushaka

ashi lʼekulu aye;

We akalanyaka ekedi awo.

3Khumadiondjo Latuyalaka kata ati:

Dimi layukamba otei ami la ului a

wuki wʼantu,

Ku dimi layukunda lu otei ako.

4Dimi layukutshika la kete,

layukukadja lʼusui,

Layutuma fudu tshe ya lʼulungu dia

yo mbahema ladiku diaye,

Ndu layulutsha nyama tshe ya la kete

lʼemunyi aye.

5Dimi layuhane emunyi aye lʼete

wʼekungu,

Layuludia ekedi la betshi dia emunyi

aye.

6Dimi layutshulula dikila diaye lu kete

yakayatelaka ashi pulu ndu lu ete

wʼekungu.

Ekedi wayuludiama la ye.

7Lamʼayumukushisha, layukumba

ulungu, layete toto udjima.

Dimi layukumba unya dingi,

Ndu ngondo hukashiya.#32:7 Is. 13:10; Mat. 24:29; Mak. 13:24-25; Luk. 21:25; Eny. 6:12-13; 8:12.

8Dimi layete esasi wa lʼulungu udjima

lu dikambu diaye,

Ndu layutuma udjima lu kete yaye,

Mbata Khumadiondjo Latuyalaka.

9Dimi layunyangia etema a wedja efula lamʼayumukotola lu fumbi lʼatei a wedja, ndu lu kete yahayeyi. 10Dimi layukhumia antu efula akhumu lu dikambu diaye, ndu khumi ya dikanga yawo yayuleka nkuka woma lamʼayumutundja yombo ya ta la ntundu kawo. Vo wayudidimaka tena tshe untu lʼuntu lu lumu landi, lushi lʼekwelo kaye. 11Khumadiondjo Latuyalaka kata ati: Yombo ya khumʼekanga ka Babilona yayudiaka. 12Dimi layudiaka antu aye efula la tombo tʼapami a wulu, wane wuleki ngala tshe lʼatei a wedja.

Vo wayushisha utaku wʼasi Edjibitu,

Ului awo tshe wayulanyema.

13Dimi layushisha nyama yawo tshe

Yeli lʼemamu wʼashi efula.

Ekulu wʼantu la sanga ya nyama

hawuwahashahasha ntu.

14Dimi layolembohaya ashi awo,

Layokedia ndjali yawo uku iso,

Mbata Khumadiondjo Latuyalaka.

15Lamʼayumete kete ya Edjibitu tongo,

Lamʼayumbama diango tshe dieli loko,

Lamʼayumudiaka antu tshe wudjashi

loko,

Ku vo wayeya vati: Dimi keli

Latuyalaka.

16Oso eli delu diayuwulela, ana amantu wa lu wedja wayulelaka delu diako. Vo wayulelaka lu dikambu dia Edjibitu ndu lu dikambu dia antu awo tshe, mbata Khumadiondjo Latuyalaka.

17Lu eleku ka dikumi lʼahendi, lu lushi la dikumi lʼatanu la ngondo ka ntundu, diui dia Latuyalaka diakayi le mi ati: 18Onʼa untu, uleli lu dikambu diʼului wʼasi Edjibitu, uwadji vo la ana amantu wa wedja a wulu lʼesi a kete, kame la waku watahulo utsha lu Difuku:

19Akona ukuleki dimena?

Utshu, utetami kame

La waku waki kumbahema uhekeli.

20Vo wakako lʼatei a waku wakadiakema la yombo. Edjibitu ayetama kame la elui andi wʼantu. 21Ewandji andi wa wulu wayoteketa dikambu diawo, kame la ekimanyidi awo uma lʼatei wʼUdimu a Pengandu. Vo wakahulo, weko leko pundju; wane waki kumbahema uhekeli, wakadiakema la yombo.

22A si Asuriya weko leko la antu awo tshe, ndu waumbu awo weko lʼutshimba andi; waku tshe wakavu, wakadiakema la yombo. 23Waumbu awo weko lu ehongo wa Difuku, ndu antu awo weko lʼutshimba wa waumbu awo. Wane tshe wakavu, wakadiakema la yombo. Vo wakutsha wudja a wasena woma wa mamba.

24Asi Elame weko leko la antu awo tshe, la waumbu awo lʼutshimba. Wane tshe wakavu, wakadiakema la yombo. Vo wakahulo, kumbahema uhekeli, utsha lʼesi a kete. Vo wakutsha wudja a wasena woma wa mamba, wakutshama sonyi utsha le wane watahulo utsha lu Difuku. 25Vo wakatshi mbetu kawo lʼatei wʼedu, kame la antu awo tshe; ndu waumbu awo weko lʼutshimba awo. Wane waki kumbahema uhekeli tshe, wakadiakema la yombo, ne dia vo wakutsha wudja a wasena woma wa mamba, ndu vo wakutshama sonyi utsha le wane watahulo utsha lu Difuku. Vo wakakitshama lʼatei a wane wakadiakema.

26Mesheke, Tubala la antu awo tshe weko leko, waumbu awo weko lʼutshimba awo. Wane tshe waki kumbahema uhekeli, wakadiakema la yombo, ne dia vo wakutsha wudja a wasena woma wa mamba. 27Vo hawetami kame la ahuka a wulu wa lu nshi yʼedjedja wakadiakema, wane wakahulo kame la dihumo diawo dia ta utsha lʼUdimu a Pengandu. Vo wakakitsha ete awo ladiku dia tombo tawo, la dingawu diawo ladiku dia weka awo, ne dia vo wakutsha ahuka a wudja a wasena woma wa mamba. 28Ndu we ayulanyema lʼatei a wane waki kumbahema uhekeli. We ayetama kame la wane wakadiakema la yombo.

29Asi Edome, khumi ya dikanga yawo la ewandji awo, waku wakadiakema la yombo weki la dihunga, weko leko. Vo wakakhundema kame la wane waki kumbahema uhekeli kame la wane wakahulo utsha lu Difuku.

30Ewandji tshe wa la ngelʼa kushi la asi Sidona tshe weko leko, wakahulo lu sonyi la andjakemi, ne dia woma wa mamba wakawutsha antu uma lu wulu awo. Vo wambetama la wane waki kumbahema uhekeli kame la wane wakadiakema la yombo, ndu vo wakutshama sonyi kame la wane watahulo utsha lu Difuku.

31Lamʼayuwena Farayo, ndi ayusambama lu dikambu diʼului wʼantu andi tshe, wane wakavu la yombo ndu elimbi andi tshe, mbata Khumadiondjo Latuyalaka. 32Ne dia ndi akatshulula ududu wa kele kandi lu kete ya wasena, vo wayetama lʼatei a wane waki kumbahema uhekeli, kame la wane wakadiakema la yombo, Farayo la antu andi tshe, mbata Khumadiondjo Latuyalaka.

Currently Selected:

Ezekiyele 32: TLL

Highlight

Copy

Compare