Ezekiyele 28

1Diui dia Latuyalaka diakayi le mi ati: 2Onʼa untu, uteli uwandji wa Tura wati: Khumadiondjo Latuyalaka kata ati:

Ne dia utema aye ambuyala la utaku,

Ku we akati wati: Dimi leko

etemolatemola kemotshi,

Dimi mbidjaseka lu kiti ka

ditemolatemola,

Kʼatei atei wʼashi a waki.

Keli we eko paka untu, aha

etemolatemola,

Kuyanga mbatuyuyakanaka weme

Kanga yimba uku etemolatemola

kemotshi —

3Mete, we ndeka Danyele yimba;

Nduku dikambu dia usheshe diukushami.

4Uma lu yimba yaye la ewu kaye,

Mbakayakundja ekundji,

Mbakayadji paunyi la fesa lu

waumbelu aye.

5Uma lu wuki wa yimba yaye yʼukanda,

Mbambuyuyafudia ukundji aye.

Uma lʼukundji aye, mbambuyuyambiya

lʼutema.

6Diako mbata Khumadiondjo

Latuyalaka ati:

Ne dia we atuyakanaka wati:

Unyashungu kemi,

7Mbayumutuma asi wedja dia nkolosha,

Wudja wuleki ngala lʼatei a wedja.

Vo wayosomola tombo tawo

Dia ndosha yimba yaye ya mamba,

Vo wayulanya dimena diaye.

8Vo wayukuhuluya utsha lu Difuku,

We ayuvo lʼatei wʼashi a waki

Uku wane watuwudiakaka la dihumo.

9Undi, we ayuyata ntu la ntundu

kʼundjaki aye

Wati: Dimi keli Unyashungu?

We kema Unyashungu, we eko paka

untu

Lu anya wa one lakudiaka.

10We ayuvo nyoi ka wane

Wahatahema uhekeli, lu anya wʼasi

wedja,

Ne dia dimi lakati,

Mbata Khumadiondjo Latuyalaka.

11Diui dia Latuyalaka diakayi le mi ntu ati: 12Onʼa untu, uleli lu dikambu dia khumʼekanga ka Tura. Utuwuteli wati: Khumadiondjo Latuyalaka kata ati:

We kakakumi lʼuluwanyi tshe

Lu yimba ndu lu dimena.

13We aki lu Edena, ekambo ka

Unyashungu.

We akayakumbi la wehu tshe wʼave

wʼushinga a wulu:

Dive dia tilili, diʼendondo, dia

pesopeso,

Diʼekesekese, diʼetukutuku, diʼawadi

awadi,

Diʼeleselese la diʼekesekese, la paunyi.

Yimba ya ntsha ngomo yaye la pungi

yaye yaki le ye;

Lu lushi lakayatungama,

mbakawalongoswama.

14Dimi lakakukitsha okeruba

wakasonwama ulami.

We aki ladiku diʼukungu wʼekila wa

Unyashungu,

We akakendakendaka lʼatei wʼave

wakatumba esasi,

15We aki uluwanyi lu mbuka yaye.

Uma lu lushi lakayatungama,

Edja ndu lamʼakayatanema la kolo.

16Uma lu efula kʼukanda aye,

Mbakawakuludia la ngala,

Mbakayatshi kolo.

Diako mbamumukukadja

Uku engo kʼanyanya uma lʼukungu

wa Unyashungu;

Mbamumukulanya, we okeruba,

ulami;

Mbamumukunya uma lʼatei wʼave

watutumbaka usasi.

17We akayambiya lʼutema ne dia dimena

diaye;

Uma lu ngaingai kaye, mbakayalanya

yimba yaye.

Dimi lakakukadja la kete,

Lakakutundja la ntundu ka khumi

ya dikanga.

18Uma lu efula ka kolo yaye,

Ndu uma lu lukesu lʼukanda aye,

Mbakayafutanya temwelo diaye.

Diako mbamumuhetsha dja

Lʼatei aye dia yo nkutshumba.

Dimi lambukukadimula utuku

Lu ashu a waku tshe watukendakendaka.

19Waku tshe watukeyaka lʼatei a wedja,

Wayukashimo dikambu diaye.

We ambuyala anyanya, we huyala ntu

pundju.

Etelu kʼAkambu Wahatayi lu Dikambu Dia Sidona

20Diui dia Latuyalaka diakayi le mi ntu ati:

21Onʼa untu, ediya ashu utsha lu Sidona. #28:21 Joe. 3:4-8; Zak. 9:1-2; Mat. 11:21-22; Luk. 10:13-14.

Uti diui lu dikambu diawo,

22Wati: Khumadiondjo Latuyalaka kata

ati:

Ulungi, dimi layendana la ye, we

Sidona!

Dimi layutumbwama lʼatei aye.

Ku antu wayeya vati: Dimi keli

Latuyalaka,

Lamʼayumulumbuya Sidona,

Ndu lamʼayumenya ekila kami lʼatei

awo.

23Dimi layatumela elandu,

Layokedia dikila lu esese awo.

Yombo yayuya lu beke tshe dia

ndjalosha.

Yo yayatshika edu kalakala lʼatei awo,

Ku vo wayeya vati: Dimi keli

Latuyalaka.

24Nduku tende diatuhikanaka, diayuyala le khumbu ka Isariyele ntu, kuyanga dungu diatuhumuyaka dia waku wadinei, wakawaonyolaka. Ku vo wayeya vati: Dimi keli Khumadiondjo Latuyalaka.

25Khumadiondjo Latuyalaka kata ati: Lamʼayumusanganya khumbu ka Isariyele uma lʼatei a wedja tshe wakamadianganya lʼatei awo, dimi layakidia la ntundu ka wedja tshe, ku vo wayudjase lu kete yawo hita, yakamasha ukambi ami Jakoba. 26Vo wayudjase la lutui tshitshi, wayuhika mvudu, ndu wayune ekodi wa vinyo. Vo wayudjase la lutui tshitshi lamʼayumulumbuya waku tshe wadingi, ndu watasuyaka. Ku vo wayeya vati: Dimi keli Latuyalaka, Unyashungu awo.

Currently Selected:

Ezekiyele 28: TLL

Highlight

Copy

Compare