Ezekiyele 27
27
1Diui dia Latuyalaka diakayi le mi ati: 2Onʼa untu, uleli lu dikambu dia Tura. 3Uteli Tura, ludjashi lʼumamu wʼashi a waki, latutshaka ukanda lʼantu wʼuma lu asenga efula, wati: Khumadiondjo Latuyalaka kata ati:
Tura, we akataka wati:
Dimi leko tshe dimena.
4Elelu aye weko lʼatei wʼashi a waki,
Ambiki aye wakakete dimena tshe.
5Vo wakati abaya aye tshe la weoto
wʼuma la Senire,
Wakose utamba wʼusasi wʼuma la
Lebanona
Dia nkuhanela ekulu ka koi.
6Vo wakakosele kahi lʼelungu wʼuma
la Bashana,
Wakakutshela ekala la ewanga
wumamatanyi
Lʼabaya wʼukudi wʼuma lu asenga wa
Kupiro.
7Vo wakakutshela dipema dia mashua
La linene lʼololo leli la asangu asangu
wʼuma lʼEdjibitu,
Dia dio ndjala dembela diaye.
Apema waki la dangi diʼudima la
diʼengengi
Uma lʼemamu wa Elisha, waki ukumbo
aye.
8Asi Sidona la asi Aravada waki aduki
aye,
Antu wakaleki tumba wa la Zemere
waki lʼatei aye, we Tura.
Vo waki akendjikendji aye wa mashua.
9Dihangamendi la asi yimba uma la
Ngebala
Wakadjaka elungu lu mashua.
Mashua tshe waki lʼatei wʼashi a wuki
kame.
Antu waki loko, wakayakaka le ye
Dia ndjutsha la ye ukanda.
10Asi Peresiya, asi Luda la asi Puta, waki lʼatei wʼalimbi aye, ahuka a wulu. Vo wakahaneka dingawu la fule ya ta lʼatei aye; vo wakakete dimena otekoya. 11Asi Aravada la Heleke wakahemaka ladiku dia peli lʼutshimba aye tshe. Asi Ngamada waki lu tangelu diaye. Vo wakahaneka dingawu diawo lu peli diaye tshe; vo wakakete dimena otekoya.
12Asi Tarashishi wakatshaka la ye ukanda, ne dia efula ka weuhu tshe wʼongonyi aye. Vo wakengonya la ye udjulu lu diango diaye. 13Asi Javana, asi Tubala, la asi Mesheke, wakatshaka la ye ukanda. Vo wakengonya antu la mashua wʼohotela lu diango diaye. 14Bete-Tongarama wakengonya la ye falasa, falasa ya ta la punda lu diango diaye.
15Asi Rodese wakatshaka la ye ukanda. Kete yʼasenga efula yaki ahuli aye hita wa ntshaka ukanda. Vo wakakulambula ewanga la utamba wʼupindji. 16Edome akatshaka la ye ukanda ne dia efula ka diango diaye. Vo wakengonyaka la ye mboko yʼeleselese, ahondo wʼengengi, ahondo wʼasangu asangu, linene lʼololo, keli, la mboko ya tilili yʼawadi awadi. 17Wudja wa Juda la kete ya Isariyele wakatshaka la ye ukanda. Vo wakengonya la ye epunga, mbeli la fingu yatelaka esadi, usanga, iso la lodia. 18Damaseke akatshaka la ye ukanda ne dia efula ka diango diaye, ndu ne dia wehu wʼengonyi aye. Vo wakengonya la ye wanu wʼuma la Helebona la diosa dia wema diʼekoko. 19Vo wakengonya la ye wanu wʼuma la Uzala lu tuka diaye, wakengonya la ye luwulu la lutshula, ma-mbu ya dieku la ediu wʼenyi la diango diaye. 20Dedana wakatshaka la ye ukanda la ahondo wa mbidjase ladiku dia falasa. 21Asi Arabiya la ewandji tshe wa la Kedara wakatshaka la ye ukanda la ana wʼekoko, ekoko a waumi, la mbudi. 22Asi ukanda wa la Sheba la wa la Rama wakatshaka la ye ukanda. Vo wakengonya la ye diango diʼupumu diuleki amena, wehu tshe wʼushinga a wulu la paunyi. 23Harana, Kane la Edena, Ashura la Kilimade wakatshaka la ye ukanda. 24Waso wakatshaka la ye ukanda la eloto wuleki amena, wʼedima, wʼasangu asangu; la eshete wakatshama lʼabaya wʼusasi wakakelekami lʼekodi, wakaludi too la ahondo wʼushinga a wulu. 25Mashua wʼuma la Tarashishi wakakembelaka diango diaye diʼukanda.
Okone we akaluli too lʼongonyi la
lutumbu
Lʼatei wʼashi a wuki.
26Anduki aye wakakukumia lʼatei
wʼasukhu a wulu;
Lopepe lʼuma lu leke lʼehutwelu ka
unya
Lakakuhandjula vwa lʼatei wʼashi a
wuki.
27Engonyi aye, ekundji aye, diango
diaye diʼukanda,
Ekambi aye wa lu mashua,
Akendjikendji aye wa lu mashua,
Ekambi aye watukitaka elungu,
Ambetshetshi aye wʼukanda,
Andoshi aye tshe wa ta
La ului tshe wʼantu weli lasuki la ye,
Wayudita lʼatei wʼashi a waki
Lu lushi laye lʼelanyelu.
28Lamʼayuda akendjikendji aye wa
mashua tukuku tʼalelu,
Kete ya lʼumamu wʼashi yayudidima.
29Aduki tshe, ekambi wa lu mashua,
Akendjikendji wa mashua wayutumba
uma lu mashua awo,
Wayemala lʼokenge wʼashi.
30Vo wayedia aui awo lu dikambu
diaye,
Wayuda tukuku ta wulu,
Wayuyatela ditshu lʼete, wayungito
lʼukutu.
31Vo wayunya avu lu dikambu diaye,
Wayolota akutu,
Wayukulela lʼokedi lʼetema awo,
Kame la lunyangu la wulu.
32Lu lunyangu lawo kayuwukutshimela
djuwa,
Kayuwukulela vati:
Akona akalanyema uku Tura lʼatei
wʼashi a wuki?
33Lamʼakatumbaka diango diaye uma
lʼashi a wuki,
We akakutshaka ehumba wa wedja
efula.
Uma lu efula kʼongonyi aye.
La diango diaye diʼukanda,
Mbakayangonya khumi ya dikanga
ya la kete.
34Lamʼakakuhandjula asukhu wʼashi a
waki.
Diango diaye diʼukanda la antu aye
tshe wakaditi kame la ye.
35Antu tshe wa lu asenga wakakashimo
dikambu diaye,
Khumi ya dikanga yawo wakate asulu;
Dundji diawo diakayala lʼulingulingu.
36Ambetshetshi wʼukanda lʼatei aye
Watukohongwelaka soi;
We ambuyala anyanya,
We huyala ntu pundju.#27:36 Eny. 18:11-19.
Currently Selected:
Ezekiyele 27: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
