Ezekiyele 23

Anangu Ahendi wʼAmantu

1Diui dia Latuyalaka diakayi le mi ntu ati: 2Onʼa untu, esekaseka wʼamantu ehendi wakuto etoi utema wakiko. 3Vo wakatuyala akanga a luseka lʼEdjibitu, wakatunana luseka lu nshi yawo yʼesekaseka. Elongo wʼapami wakakenyaka la wo lu awele awo leko. Vo wakanandaka sumu yʼawele awo lamʼakiwo dimuma. 4Kumbu yʼesekaseka ako nye: lʼenundu, Ohola; la kushi, Oholiba. Vo wakayala wadiemi; wakuti ana apami la ana amantu. Kumbu yawo yaki okone: Ohola, eli Samariya; la Oholiba, eli Jerusalema.

5Lamʼaki Ohola wadiemi, ndi akunana luseka; ndi akaleki nanga eseka andi, asukanyi andi, asi Asuriya. 6Vo wakalotaka ahondo wa tilili, waki embuledi la elombodi wʼalimbi. Vo tshe waki elongo wʼapami wʼamena efula, ambahemi wa falasa, wakahemaka falasa yawo. 7Ndi akayakimo le wo, elongo wʼapami tshe wʼasi Asuriya wakaleki amena. Ndi akayalanya lʼapami tshe wakandalangaka, ndu la dikishi diawo tshe. 8Umaka lamʼakindi lʼEdjibitu, ndi ataseke luseka landi. Vo wakunanaka la ndi lamʼakindi usekaseka; wakakenyaka la ndi lu awele andi lamʼakindi emuma; wakunanaka la ndi efula efula. 9Diako mbakamukimo lʼanya wʼeseka andi, lʼanya wʼasi Asuriya wakandalangaka. 10Vo wakenyi utakataka andi, wakohotola anʼandi wʼapami la anʼandi wʼamantu, wakudiaki la yombo. Vo wakulumbuya edja ndu akayala engo ka dionyo lʼatei wʼamantu.

11Kushendi Oholiba akenyi akambu ako, keli ndi akuleki kolo lu nanga apami. Ndi akayakimo lu luseka uleki enundu andi. 12Ndi akalangaka asi Asuriya, embuledi la elombodi wʼalimbi, asukanyi andi, wakalotaka ahondo wa nemo, waki ambahemi wa falasa, wakahemaka falasa yawo. Vo tshe waki elongo wʼapami wʼamena efula. 13Dimi lakenyi nti: Ndi ambuyasanya. Vo ahendi wakayeli mbuka otoi. 14Ndi akafudia luseka landi. Ndi akenyi esatu wʼelongo wʼapami lu eheli, difanelu diʼasi Kaladiya diakasangwema lu dangi dia tilili, 15wolotshi eya lu kindi, la tambala lʼete. Vo tshe uku ewandji wʼamena, wufanyi lʼasi Babilona, lu kete ya Kaladiya, lene akawuto. 16Kamʼakandawaenyi, ndi akalangaka efula, akatumi akendji le wo lu kete ya Kaladiya. 17Asi Babilona wakayakaka le ndi dia ndjetama la ndi lu tangi kandi; vo wakusanya la luseka. Lamʼakandasana la wo, ndi akakadimo uma le wo la dionyo. 18Lamʼakandatetemala la luseka landi, lamʼakandenyaka antu utakataka andi, utemʼami akutuni uku akamatuni enundu andi. 19Keli ndi akafudia luseka landi, akuhoka nshi yakindi usekaseka, yakandunanaka luseka lu kete ya Edjibitu. 20Ndi akalangaka eseka andi waki la alimba uku alimba wa punda, ndu waki la alome uku alome wa falasa. 21Osoku mbatuyukumbulaka kolo yaye ya lu nshi yaye yʼusekaseka, yakakenyaka asi Edjibitu la ye lu awele, ndu lamʼakawanandaka sumu yʼawele aye.

22Diako mbatela Khumadiondjo Latuyalaka Oholiba ati: Enda, dimi lutsha munyia eseka aye dia nkolosha. Dimi layela eseka aye wakayonyola uma lu beke tshe dia ndjukolosha; 23asi Babilona la asi Kaladiya tshe, Pekode, Shoa la Koa, kame la asi Asuriya tshe, elongo wʼapami wʼamena, embuledi, elombodi awo tshe wʼalimbi, enene wʼalimbi la andoshi wa ta, vo tshe wakahemaka lu falasa. 24Vo wayuya la dihumo diawo, pusupusu yawo, etshimbi, la ului a wuki wʼalimbi dia ndjukolosha. Vo wayuya-longa wukimedi dingawu dia waki ndu dia tshitshe, ndu fule ya mbulu dia ndo la ye lʼutshimba tshe. Dimi layuwasha wulu wa nkulumbuya, ku vo wayukulumbuya uku elembe. 25Dimi layutundja kandjema kami dia to ntolo la ye. Vo wayukutshela akambu wa ngala: wayukuhimbula ohembe la atui; atshikadi aye wayudiakema la yombo. Wayunda anʼaye wʼapami la anʼaye wʼamantu, ku atshikadi aye wayutshumbama lu dja. 26Vo wayu-kukulula ahondo, wayukohotola dengalenga diaye diʼamena. 27Osoku mbayumunya kolo yaye uma le ye, la luseka laye lakayayi la lo uma lu kete ya Edjibitu diaha we nkaluya ashu aye utsha le yo, kuyanga mbuho Edjibitu ntu. 28Ne dia Khumadiondjo Latuyalaka kata ati: Dimi lutsha nkukimo lu anya a waku watukuhetshaka, lu anya a waku wakayaseke. 29Vo wayukutshela la luhetshu, wayukohotola ekundjelu kaye tshe, wa-yukutshika utakataka. Ku utakataka aye la luseka laye wayenama, akambu aye wa sonyi la luseka laye. 30Wayukutshela akambu ane, ne dia we akunana la asi wedja, ndu ne dia we akayalanya la dikishi diawo. 31We akayelaka mbuka kakakendakendaka enundu aye, diako mbayumudja dikoho diandi diʼelanyelu lu anya aye. 32Khumadiondjo Latuyalaka kata ati:

We ayono dikoho diʼenundu aye a

umuntu

Dikoho diako dieli wuki ndu utali,

asui efula weko loko.

Wayukonyola, wayukola tola tʼekunune.

33We ayudjo edjwelu ka wulu ndu ka

lunyangu

Lu dikoho diʼenundu aye Samariya.

Dio dieko dikoho dia nkashimo,

Dikoho diʼelanyelu.

34Dieli la ye dia dino tshe ndu

mbitshitshi,

Ku we ayuhatula divu, ayuhatula

awele,

Ne dia dimi lambuta, mbata Khumadiondjo

Latuyalaka.

35Okone Khumadiondjo Latuyalaka kata ati: We akambuhela, akambuki okongo, diako mbayuyemba wutshu wa kolo yaye la wa luseka laye.

36Latuyalaka akambula ntu ati: Onʼa untu, we ayulumbuya Ohola la Oholiba? Uwateli akambu awo wa wononyi. 37Vo wakunana luseka, anya awo weko dikila tu, vo wakaseke dia ntemola dikishi, wakaditshumbela anʼawo wʼapami wakawambutela. 38Vo wakantshela ndu akambu akina: wakalanya etemwelo kami lushi lako, ndu vo wakalanya nshi yami ya mumuya. 39Kamʼakawadiakela dikishi diawo anʼawo, vo wakoto lu luudu lami lushi lako dia lusanya. Osoku mbakawatshi lu luudu lami. 40Wakatumi akendji dia nteta antu uma lʼetali, ku vo wakayi. We akoke ashi lu dikambu diawo, akakiti yula lu ashu aye, akalote dengalenga. 41We akadjase lu tangi kaye ka dimena. La ntundu kaye kaki mesa wolongo-swami, wakayakitsha malashi la iso kami. 42Lundju lʼongenongeno lʼului a wuki wʼantu laki kame la ndi, ndu kame lʼantu wʼanyanya la ambidjoki wakawela uma lʼusui wa shenga. Ku vo wakayudja ekoma lu anya wʼamantu ako ahendi la alembo wa kusu lu ete awo.

43Ku dimi lakati lu dikambu dia one laya usumbi lu luseka nti: Undi, ndu kakiane vo wayutetemalaka munana la ndi, la ndi munanaka la wo? 44Vo wakoto le ndi uku atuwotoka le kanga luseka. Osoku mbakawoto le Ohola la le Oholiba, amantu wa kolo. 45Antu wʼololo wayalumbuya uku atuwulumbuyaka amantu akanga a luseka, ndu uku atuwulumbuyaka amantu watutshululaka dikila, ne dia akanga a munanyi mbewo, la anya awo dikila tu.

46Khumadiondjo Latuyalaka kata ati: Dimi layutuma ului wʼantu dia ndo la wo, dimi layakimo lu anya awo dia vo mbasuya la mbahotola diango. 47Ku ului ako wʼantu wayuwauka ave, wayuwatshanya la tombo, wayudiaka anʼawo wʼapami la anʼawo wʼamantu, wayutshumba mvudu yawo. 48Osoku mbayumukumia kolo kene lu kete, dia amantu tshe mbewo diaha vo ntsha kolo uku akanyatshi. 49Vo wayunyosomboya kolo kanyu kene, la nyu nyayemba wutshu wa kolo ka dikishi dianyu. Ku nyu nyayeya nyati: Dimi keli Khumadiondjo Latuyalaka.

Currently Selected:

Ezekiyele 23: TLL

Highlight

Copy

Compare