Ezekiyele 10

Lutumbu la Unyashungu Lambumo Uma lʼEtemwelo

1Dimi lakedia ashu, menyi ku dive diʼudima ne, diufanyi la kiti ka diulelu, diaya lʼulungu ladiku dia akeruba.#10:1 Ezek. 1:26; Eny. 4:2. 2Ndi akatela untu lakalote ahondo wa linene ati: Utshu lʼatei wʼetshimbi watshimba lʼesi a akeruba, utuludia awambu aye la akalanga wa dja waheta lʼatei wʼakeruba, utadianganya ladiku diʼusumba.#10:2 Eny. 8:5. Lamʼakamawendaka, ndi akoto loko. 3Lamʼakoto untu ako, akeruba wakemadi lu lunya landi la pami la luudu, dingi diakaluli lu seke dia lʼetei. 4Lutumbu la Latuyalaka lakambela uma lu akeruba, lakatemala ladiku dia suku dia luudu. Ku luudu lakaluli la dingi, ndu seke diakaluli la usasi wa lutumbu la Latuyalaka. 5Luhelu lʼahafu wʼakeruba lakukema lu seke dia lʼandja uku diui dia Unyashungu Kanga-Wulu-Tshe lamʼateketandi.

6Lamʼakandatela untu lakalote ahondo wa linene ati: Utose dja uma lʼatei wʼetshimba watshimba, uma lʼatei wa akeruba, ndi akoto, akatemala lasuki la utshimbi. 7Okeruba omotshi akasimbula lunya uma lʼatei wa akeruba, utsha lu dja yaki lʼasa akeruba. Vo wakose motshi, akayidji lu anya wa one lakalote ahondo wa linene. Untu ako akayilungila, akatumbi la yo. 8Akeruba waki la efanelu ka lunya la tshina dia ahafu awo.

9Dimi lakedia ashu, menyi ku etshimbi enei ene lasuki la akeruba: utshimbi otoi aki lasuki la okeruba la okeruba. Etshimbi ako wakafani la ave wa ngaingai, wʼendondo. 10Etshimbi ako enei waki pupu: utshimbi lʼutshimbi akafani uku vo weko lʼatei wʼutshimbi ukina. 11Lamʼakawunelaka, vo wakeyi ntsho utsha lu beke nei. Vo kunsikiso lamʼakawunelaka. Keli utsha lu dihuli diakatelelaka ote, kakawatatshokaka. Vo kunsikiso lamʼakawatatshokaka. 12Etshimbedi wʼetshimbi ako enei, ekongo awo, engango awo la eseke awo waki too lʼashu lʼutshimba tshe.#10:12 Eny. 4:8. 13Dimi lakuki lamʼakawete etshimbi ako vati: Etshimbi watshimba.#10:13 Ezek. 1:15-21. 14Akeruba ako tshe waki la dundji nei: ka ntundu, kaki elundji ka okeruba; ka hendi, elundji kʼuntu; ka satu elundji ka tambwe; ndu ka nei, elundji ka pungu.#10:14 Ezek. 1:10; Eny. 4:7.

15Ku akeruba wakambela. Vo waki difanelu dia nyama diakamenyi lasuki la okedi wa Kebara. 16Lamʼakunela okeruba, etshimbi wakatshimbaka lasuki la wo. Ndu lamʼakahuhanya akeruba ahafu awo dia munela uma la kete, etshimbi kumamito uma le wo. 17Lamʼakemalaka akeruba, etshimbi wakemalaka. Lamʼakawatambelaka, ndu vo wakambelaka kame la wo, ne dia nyuma ka difanelu dia nyama kaki lʼatei awo. 18Lutumbu la Latuyalaka lakamo uma ladiku dia suku dia luudu, lakatahema ladiku dia akeruba. 19Dimi lakendaka akeruba lamʼakawahahanyaka ahafu awo dia munela uma la kete, etshimbi wakatshokaka lasuki la wo. Vo wakatemala la suku dia lu leke lʼehutwelu ka unya la luudu la Latuyalaka. Lutumbu la Unyashungu wa Isariyele laki ladiku diawo.

20 Akeruba ako waki difanelu dia nyama diakamenyi la tshina dia Unyashungu wa Isariyele lʼumamu wʼokedi wa Kebara, ku dimi lakayulimbitela nti: Difanelu diako diaki akeruba. 21Okeruba la okeruba aki la dundji nei, ndu la ahafu anei. Difanelu dia anya wʼuntu diaki la tshina diʼahafu awo. 22Dundji dia akeruba ako diaki uku dundji diakamenyi lʼumamu wʼokedi wa Kebara. Mete, vo ako aso. Vo wakatatshokaka usimbwi utsha la ntundu.

Currently Selected:

Ezekiyele 10: TLL

Highlight

Copy

Compare