Ezekiyele 9

Enelo kʼUdiakelu wʼAkanga wʼEnungu

1Ndi akahangohango lʼatui ami la diui dia wulu ati: Usukanya waku watulamaka usumba, untu tshe akimeli ehumo kandi ka ta lu lunya. 2Menyi ku apami asamalu ane wayayi lu mbuka kʼuma la suku dia ladiku, dieli lu leke la ngelʼa kushi. Untu lʼuntu akayakimedi ehumo kandi ka ta lu lunya. Untu otoi lʼatei awo akalote ahondo wa linene la olondo wʼashi a mukanda wukelekami lu lukindi. Vo wakoto, wakatemala lasuki la ediakelu ka ohotela.

3Lutumbu la Unyashungu wa Isariyele lakamo uma ladiku dia okeruba lene akilo. Lo lakatshu utsha la suku dia luudu. Lo laketi untu lakalote ahondo wa linene, laki la olondo wʼashi a mukanda wukelekami lu lukindi. 4Latuyalaka akawutela ati: Utshu lʼatei wʼusumba, lʼatei a Jerusalema, utudji djimbitelu lu fumu yʼantu tshe#9:4 Env. 7:3; 9:4; 14:1. wakhuma akhumu ndu walela, ne dia akambu tshe wa wononyi wambutshama lʼatei awo. 5Dimi lakuki lamʼakandatela akina ati: Nyutshu lʼokongo andi lʼatei wʼusumba, nyutudiaki antu. Ashu anyu tawuhandjaki untu, ndu tanyukaki untu ketshi. 6Nyutudiaki esumbi wʼapami, elongo wʼapami, esekaseka wʼamantu, ana wʼashashi, ndu amantu. Keli tanyaheki untu leli la djimbitelu lunya. Nyutateli lʼetemwelo kami. Ku vo wakatatela ndjaka esumbi wʼapami waki la ntundu ka luudu. 7Ndi akawatela ati: Nyutulanya luudu, nyutuludia seke too lʼandjakemi. Nyeso, nyutshu. Ku vo wakatshu, wakatudiaka antu lʼusumba. 8Lamʼakiwo lu ndjaka antu, dimi lakatshikala, ku dimi lakako ekhukhumadi la kete. Dimi lakaleli nti: Hai, Khumadiondjo Latuyalaka! we ayudiaka atshikadi wa Isariyele tshe lamʼatshululaye kolo kaye lu Jerusalema?

9Ku ndi akamvutela ati: Unungu wa khumbu ka Isariyele la khumbu ka Juda weko efula, kete yaya too la etshulwelu ka dikila. La usumba wambulula too la akambu wa kolo. Vo mvutaka vati: Latuyalaka akaseke kete, Latuya aka henyi. 10Okone ashu ami hawahandja; dimi haluwauka ketshi, layukaluya kolo yawo lʼete awo. 11Ku untu lakalote ahondo wa linene, laki la olondo wʼashi a mukanda wukelekami lu lukindi, akayuta ati: Dimi lakatshi akambu tshe wakayamvutela.

Currently Selected:

Ezekiyele 9: TLL

Highlight

Copy

Compare