Ezekiyele 11

Ambuhangwela Ewandji wa Kolo

1Nyuma ka Unyashungu akamunyia, akambela uya lu suku dia lu leke lʼehutwelu ka unya dia luudu la Latuyalaka, ntani ku apami akumi ahendi la atanu ane wemadi la suku. Jazaniya, onʼa Azura, la Pelatiya, onʼa Benaya, ewandji wa wedja waki lʼatei awo. 2Ku Nyuma akamvutela ati: Onʼa untu, antu ane watusanguyaka ntsha kolo, watulakaka asi usumba alaku wa kolo; 3wakati vati: Etena kene kema etena ka mpika mvudu, usumba one weli puki ka wuki, la shu teko unatshi. 4Okone we onʼa untu, uti akambu wahatayi lu dikambu diawo, uti akambu wahatayi!

5Nyuma ka Latuyalaka akambahema. Ndi akamvutela ati: Uti wati: Latuyalaka kata ati: Nyu khumbu ka Isariyele, okone la okone mbakananyu, ne dia dimi mbeyaka tukanyi tanyu. 6Nyu nyakatamanya ndjala antu lʼusumba one, nyakaludia esese la edu wʼantu wakanyadiaki. 7Diako mbata Khumadiondjo Latuyalaka ati: Antu wakanyadiaki lʼatei wʼusumba weli unatshi, la usumba one weli puki ka wuki. Keli dimi layunyutundja uma loko. 8Nyu nyakuki yombo woma, okone dimi layunyela yombo, mbata Khumadiondjo Latuyalaka. 9Dimi layunyutundja uma lʼatei wʼusumba, layunyukimo lu anya wʼasi wedja, layunyulumbuya. 10Nyu nyayudiakema la yombo. Dimi layutunyulumbuya lʼulelu wa Isariyele. Ku nyu nyayeya nyati: Dimi keli Latuyalaka. 11Usumba one huyala puki kanyu ka wuki, la nyu hanyuyala unatshi loko. Dimi layutunyulumbuya lʼulelu wa Isariyele. 12Ku nyu nyayeya nyati: Dimi keli Latuyalaka. Nyu kundjela elembe ami kuyanga lama adjangu ami, keli nyu nyakatshaka uku weli adjangu wa wedja weli lʼutshimba anyu.

13Kamʼakamataka akambu wahatayi, Pelatiya, onʼa Benaya, akavu. Ku dimi lakako ekhukhumadi la kete, lakadi tukuku ta wulu nti: Hai, Khumadiondjo Latuyalaka! Undi, we ayushila atshikadi wa Isariyele ushiki?

Daka Dia Ekalweyu la Eluwanyelu

14Ku diui dia Latuyalaka diakayi le mi ati: 15Onʼa untu, waku weli ananyo, asikaye weli kame la ye lu lohombo, khumbu tshe ka Isariyele, mbeli waku wakatela asi Isariyele vati: Nyumo etali uma le Latuyalaka, ne dia kete yanyu yakakimwama le su uku etenyi kʼukito. 16Okone uti wati: Khumadiondjo Latuyalaka kata ati: Kuyanga dimi lakawanganya etali lʼatei a wedja, kuyanga lakahandjula lʼatei a waulelu, dimi lakatukuyala etemwelo le wo nshi motshi lʼatei a kete yambuwukuma. 17Okone uti wati: Khumadiondjo Latuyalaka kata ati: Dimi layunyusanganya uma lʼatei a wedja, layunyukaluya uma lʼatei a waulelu wakamanyuhandjula, ku layunyusha kete ya Isariyele. 18Vo wayutsho utsha leko, ku wayutunya dikishi tshe la diango tshe dia wononyi leko. 19Ku dimi layuwasha utema otoi, layudja nyuma kʼuyuyu lʼatei awo. Dimi layunya etema wʼave uma lʼalimba awo, layuwasha etema wʼemunyi, 20dia vo mbeya ndjela elembe ami la nama adjangu ami la mbatsha. Ku vo wayuyala wudja ami, la dimi layuyala Unyashungu awo.#11:20 Ezek. 36:26-28. 21Keli lu dikambu dia waku watuyelaka dikishi diawo la diango dia wononyi, dimi layakaluya etsha awo lu ete awo, mbata Khumadiondjo Latuyalaka.

22Ku akeruba wakasimbula ahafu awo, etshimbi waki lasuki la wo. Lutumbu la Unyashungu wa Isariyele#11:22 Ezek. 43:2-5. laki ladiku diawo. 23Lutumbu la Latuyalaka lakambela uma lʼatei wʼusumba, lakatahema ladiku diʼukungu weli lu leke lʼehutwelu ka unya lʼusumba. 24Nyuma ka Unyashungu akamunyia, akamembe lu enelo utsha la Kaladiya le afumbi, ku enelo kakamenyi kakamo uma le mi. 25Ku dimi lakatela afumbi akambu tshe wakamenya Latuyalaka.

Currently Selected:

Ezekiyele 11: TLL

Highlight

Copy

Compare