Zacarías 13
13
Judá runakuna Dios Yaya munanqannö kawayänanpaq ninqan
1<<Tsay witsaymi pashtaq yakuwan mayllaqnö Davidpita miraqkunapa y Jerusalénchö täkuqkunapa jutsankunata perdonashaq>>.#Eze. 47.1-12; Joel 3.18; Juan 4.10-14; 7.38; Apoc. 22.1-2.
2Llapanta mandaq Dios Yayam nin: <<Tsay witsaymi entëru kay nacionchö ïdulukunata ushakätsishaq. Tsaymi qepa yuriqkunaqa tsay ïdulukunapa shutinkunata musyayanqanatsu. Tsaynöllam llulla profëtakunata y mana allikunata yarpätsikuq supaykunatapis ushakätsishaq. 3Noqapa shutïchö pipis llullakur willakuptinqa kikinkunapa taytan y mamanmi niyanqa: <¡Qamqa wañunkim! ¡Kikikipa yarpayllaykipitam Dios Yayapa willakuyninta willakuykanki!> Tsaynö nirmi llutanta willakuykaqta kikinpa mamanwan taytan tuksiyanqa.
4<<Tsay witsaymi llapan llulla profëtakuna llullakur willakuyanqanpita alläpa penqakuyanqa. Tsaymi profëtakuna shukukuyänan qaratsapita rurashqa cäpata ni imaypis shukukuyanqatsu ni profëta tukuyanqanatsu. 5Masbienmi niyanqa: <Noqaqa manam profëtatsu kä. Lluta runalla karmi wamra kanqäpita chakrallachö arukurnin wiñashkä>. 6Pipis <¿imanirtan cuerpuyki kutsushqa kaykan?>#13.6 Baalpa profëtankuna roqukuyanqanta musyanaykipaq liyiyanki 1Rey. 18.28. nir tapuyaptinmi niyanqa: <Amïgükunapa wajinchö arurmi däñakushkä> >>.
7Llapanta mandaq Dios Yayam nin:
<<Espäda, üshata mitsinanpaq churanqä amïgüpa contran tikray.
Üsha mitsikuqta wañuskatsiptïmi üshankuna wakpa kaypa witsikar aywakuyanqa.#Mat. 26.31; Mar. 14.27.
Ashkashkunatapis jankatmi wañutsishaq.
8Tsaymi kay nacionchö täkuqkunaqa pullanpita mas wañuyanqa.
Sobraq kaqllanam kawaykar quëdayanqa.
9Kawaykar quëdaqkunataqa jutsannaq kayänanpaqmi purificätsishaq.
Yuraq qellayta ninawan fundiqnö y qorita ninawan taqranta jipiqnömi paykunata purificäshaq.#Isa. 1.25; 48.10.
Paykuna mañakayämaptinmi wiyashaq.#Ose. 2.23.
Tsaymi nishaq: <Qamkunam kuyanqä wamräkuna kayanki>.
Paykunanam niyämanqa: <Qammi Diosnïkuna kanki> >>.
Currently Selected:
Zacarías 13: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
