Zacarías 12

Jerusalénchö täkuqkunata cuidananpaq Dios Yaya äninqan

1Kaychömi Dios Yayapa willakuynin qellqashqa kaykan. Kay willakuyqa Israel runakunapaqmi. Ciëluta ruraq, kay patsata shumaq patsätsiq y runata kawayta qaraq Dios Yayam nin: 2<<Machätsikuqnö kananpaqmi Jerusalénta tikratsishaq. Tsaymi Jerusalénta y Judáta atacar chikiqnin nación runakuna machashqanö kar ni imanakaytapis puëdiyanqatsu.

3<<Maytsay nación runakunam Jerusalén runakunata chikirnin contran shäriyanqa. Tsaymi jatusaq ruminö kayänanpaq Jerusalén runakunata churashaq. Pipis pallariyta munaqtaqa wañutmi qopinqa>>.

4 Dios Yayam nin: <<Tsay witsaymi soldädukunapa llapan bestiankunata mantsakätsishaq. Montaqnin soldädukunatam löcuyätsishaq. Juklä nación runakunapa bestiankunatam qaprayätsishaq. Peru Judá runakunatam sïqa shumaq cuidashaq. 5Tsaymi Judá soldädukunapa capitanninkuna shonqullankunachö niyanqa: <Llapanta mandaq Dios Yayam Jerusalénchö täkuq runakunata imaypis yanapan>.

6<<Tsay witsaymi permïtishaq Judá soldädukunapa capitanninkuna shanshanö kayänanpaq. Tsaymi yantaman y gavïllaman nina lunyar ushanqannö paykunapis vecïnun nacionkunata itsuq kaqlämanpis derëcha kaqlämanpis ushakätsiyanqa. Jerusalén runakunanam markankunallachö yapay täkuyanqa. 7Jerusalénta manaraq salvarmi Judáchö wakin kaq marka runakunataraq puntata salvashaq. Tsaymi Jerusalénchö täkuqkuna y Davidpita miraqkuna allish tukuyanqatsu.

8<<Tsay witsaymi Jerusalénchö täkuq runakunata pipis atacaptin noqa Dios Yaya yanapashaq atacaqninkunata venciyänanpaq. Tsaychö täkuqkunatam yanapashaq mayqanpis imayka pishi kallpanö kayaptin rey Davidnö kallpasapa kayänanpaq. Tsaynöllam rey kananpaq Davidpita miraqkunata yapay churashaq. Paymi mandakunqa puntanta aywaq ángel mandanqannölla.

9<<Tsay witsaymi mayqan nacionpis Jerusalénta atacayaptin tsay atacaq nacionta jankat ushakätsishaq. 10Davidpita miraqkunata y Jerusalénchö täkuqkunatam tantiyatsishaq llakipäkuq kayänanpaq y imay hörapis mañakayämänanpaq. Tuksiyämanqanta#Juan 19.37; Apoc. 1.7. rikäyämarmi waqayanqa. Mayor tsurinkuna wañuptin waqayanqannömi makinkunatapis tsoqpakur waqayanqa.

11<<Tsay junaqmi Meguido pampachö Hadad-rimónpaq llakikuyanqannö Jerusalénchö alläpa llakikuyanqa. 12Judá runakunaqa alläpa llakikurmi castanpa castanpa waqayanqa. Tsaymi waqayanqa David castapita miraqkuna warmintin, Natánpita miraqkuna warmintin, 13Leví trïbupita miraqkuna warmintin, Simeipita miraqkuna warmintin, 14y wakin castakunapis warmintin.

Currently Selected:

Zacarías 12: qxn

Highlight

Copy

Compare