Zacarías 14

Dios Yaya shamur mandakunanpaq ninqan

1Jerusalén runakuna, Dios Yaya juzgayäshunayki junaqmi chämunqana. Kikikikuna rikaykäyaptikim chikiyäshuqniki nación runakuna venciskiyäshurniki imaykaykikunatapis rakipunakuyanqa.

2Jerusalénta atacayänanpaqmi llapan nación runakunata Dios Yaya qorimunqa. Tsay runakuna Jerusalénman yaykuskirmi tsaychö wajikunapita imaykankunata apakuyanqa. Warmikunatanam violayanqa. Jerusalénchö täkuq runakunatam pullan kaqta prësu apayanqa y wakin kaqtanam tsayllachö dëjayanqa.

3Tsaynö rurayaptinmi kikin Dios Yaya tsay nacionkunawan pelyanqa. Israel runakunata unay yanapar pelyanqannömi tsay nacionkunapa contran pelyanqa. 4Tsay junaqmi Jerusalénpa tsimpan rupay yarqamunan kaqlä Olivos lömachö Dios Yaya ichinqa. Tsaychö ichiptinmi Olivos löma ishkayman partikanqa. Partikaskiptinmi jatun raqra tikranqa rupay yarqamunanpita hasta rupay jeqananyaq. Pullan lömam norti kaqläpa rakikanqa y pullan kaqnam sur kaqläpa rakikanqa. 5Tsay raqra Azal partiyaq chaptinmi qamkunaqa tsay jatun raqrapa qeshpir aywakuyanki. Judá nacionpa mandakuqnin rey Uzías kanqan witsay terremötu kaptin unay castaykikuna qeshpiyanqannömi qamkunapis qeshpir aywakuyanki. Tsay höram santu angelninkunawan Dios Yaya shamunqa.

6Tsay witsayqa manam atsikyaypis, alalaypis ni qajapapis kanqatsu. 7Manam paqaspis ni junaqpis kanan kanqannötsu kanqa, sinöqa paqas kaptinpis junaqpanöllam atsikyanqa. Tsay junaqnöqa manam imaypis kashqatsu ni kanqanatsu. Tsay junaq imanö kananpaq kanqantaqa Dios Yayallam musyan.#Isa. 24.23; Apoc. 22.5.

8Tsay witsaymi usya tiempu y tamya tiempupis chuya yaku Jerusalénpita yarqamunqa.#Eze. 47.1-12; Juan 7.38; Apoc. 22.1-2. Pullan yakum rupay yarqamunan kaqlä lamaryaq chanqa#14.8a Rupay yarqamunan kaqlä lamarqa Kachi Lamarmi. y pullan yakunam rupay jeqanan kaqlä lamaryaq chanqa.#14.8b Rupay jeqanan kaqlä lamarqa Mediterráneo Lamarmi.

9Tsay junaqmi entëru kay patsachö Dios Yayalla rey kanqa. Tsaymi maytsaychöpis payllatana alabayanqa.

10Entëru Judá nacionmi pampa tikranqa Gebapita hasta Jerusalénpa sur kaqläninchö kaykaq Rimón partiyaq. Jerusalénnam löma jananchö quëdanqa. Jerusalénchömi runakuna täkuyanqa Benjamín Punkupita hasta Unay Punku shutiyuq punku kanqanyaq. Tsay Unay Punkupa shutinmi kananqa Esquïna Punku. Tsaynöllam täkuyanqa Hananeelpa rikachakunan törripita hasta reypaq üvata jaruyänan kaqyaq. 11Tsaymi Jerusalénchö runakuna junta täkuyanqa. Paykunapaqqa manam ni ima maldicionpis kanqanatsu, sinöqa tranquïlunam täkuyanqa.

12Jerusalén runakunata atacayanqanpitam llapan contran nación runakunata Dios Yaya mantsaypaq qeshyaywan castiganqa. Tsay qeshyaywanmi kawaykäyaptinlla aytsankunapis y ñawinkunapis ismunqa. Tsaynöllam qallunkunapis shiminkunallachö ismunqa. 13Tsay witsaymi Dios Yaya tsay runakunata alläpa mantsakayman churanqa. Tsaymi kikinkunapura contra shärir pelyayanqa.

14Jerusalénta defendir pelyayänanpaqmi Judá parti markakunachö täkuq runakuna Jerusalénman shayämunqa. Cercan nacionkunachö täkuq runakunata venciskirmi imayka riquëzankunata qechuyanqa. Tsay riquëzakunam maytsika yuraq qellay, qori y llatapakuna. 15Chikiqninkunapa campamentunkunachö kaykaq bestiakunata, mulakunata, camëllukunata, ashnukunata y wakin wätakunatam mantsaypaq qeshyay ushanqa. Tsay qeshyayqa ämunkunata tsarinqan qeshyaymi kanqa.#Zac. 14.12.

16Jerusalén runakunawan pelyayanqanpita kawaykar quëdaq juklä nación runakunam cada wata Jerusalénman shayämunqa poderösu rey Dios Yayata adorayänanpaq. Tsaychö adorarmi Ramäda fiestata rurayanqa.#Lev. 23.39-43; Deut. 16.13-17.

17Mayqan nación karpis llapanta mandaq Dios Yayata adorayänanpaq Jerusalénman mana shayämuptinqa tsay nacionchö manam tamya kanqatsu. 18Egiptupita karpis Ramäda fiestata rurayänanpaq mana shayämuptinqa Dios Yayam wakin nacionkunata castiganqannölla castiganqa. Tsaymi paykunapaq tamya kanqatsu. 19Tsaynöllam castiganqa Egipto runakuna y mayqan nación runakunapis Ramäda fiestata rurayänanpaq mana shayämuptinqa.

20Tsay witsaymi bestiakuna wallqaräyanqan campanïllakunachö qellqashqa kanqa: <<Dios Yayapaq santum>> nir. Dios Yayapa wajin templuchö kusinakuyänanpaq kaq mankakunapis altarpa lädunchö kaykaq tazonkunanö santum kanqa. 21Entëru Jerusalénchö y Judáchömi llapan mankakuna llapanta mandaq Dios Yayapaq santu kanqa. Santu kaptinmi pipis adorayänanpaq shamur tsay mankakunawan apayämunqan sacrificiuta kusinayanqa. Tsay witsayqa llapanta mandaq Dios Yayapa templunchö rantikuqkuna manam kayanqanatsu.

Currently Selected:

Zacarías 14: qxn

Highlight

Copy

Compare