Romanos 6

Jutsata mana ruranapaq yätsinqan

1Tsaynö kaykaptinqa Dios Yaya mas llakipämänapaq ¿jutsata rurartsuraq kawashwan? 2¡Manam! Jutsa ruraypaqqa wañushqanönam kantsik. Tsaynö kaykarqa ¿imanöparaq jutsata rurar kawashwan?

3¿Manaku musyayanki Jesucristo cruzchö wañunqannö noqantsikpis bautizakur jutsa ruraypaq wañushqanöna kanqantsikta? 4Bautizakunqantsik höram Jesucristuwan pampakashqanö kashkantsik. Jesucristuta Dios Yaya poderösu kayninwan kawatsimunqannömi noqantsiktapis mushuq kawayta qaramashkantsik.#Col. 2.12. 5Jesucristo wañunqannö noqantsikpis jutsa ruraypaq wañushqa karmi pay kawamunqannö kawamushun.

6Shumaq tantiyakushun. Unay kawaynintsikqa Jesucristuwan cruzchö wañushqanam kaykan. Tsaymi kananqa jutsapa poderninchönatsu kaykantsik.#Gál. 2.20. 7Wañushqakuna jutsata manana rurayanqannömi noqantsikpis jutsata manana rurar kawanapaq kaykantsik. 8Tsaymi kananqa Jesucristuwan wañushqana kar musyantsik paypa poderninchöna kawanapaq kanqanta.

9Tsaynöllam musyantsik Jesucristo kawamushqana kar imaypis manana wañunanpaq kanqanta. Paymi wañuyta vencishqana. 10Juk kutilla wañurmi jutsa ruraypita jipimänapaq wañurqan. Kananqa Dios Yayapa puntanchönam kaykan. 11Tsaynölla qamkunapis jutsa ruraypaq wañushqanöna kayay. Kananqa [Señornintsik] Jesucristuchö kar Dios Yaya munanqannö kawayay.

12Tsaynö kaykaptinqa jutsapa poderninchö amana kawayaynatsu. Shonquykikuna jutsaman apayäshuptikipis ama rurayaytsu. 13Llutan ruraykunaman ama mëtikuyaytsu. Wañuyanqaykipita kawamushqanö kaykarqa Dios Yayapa poderninchöna kawayay. Llapan cuerpuykipis Dios Yayallapaqna katsun. 14Manam Dios Yayapa leyninkunata cumpliyanqaykiman confiakurtsu salvakäyanki, sinöqa llakipäkuq kayninman confiakurmi. Tsaynö kawarmi jutsapa poderninchönatsu kayanki.

Dios Yaya patronnintsik kanqanta tantiyatsinqan

15Llakipäkuq Dios Yayaman creyikur salvacionta chaskiykarqa ¿jutsata rurartsuraq kawashwan? ¡Manam! 16Jutsata rurar kawashqam jutsa ruray patronnintsik. Serviqninta patronnin imayka munanqanta ruratsinqannömi jutsa ruraypis patronnintsik kar munanqanta ruratsimantsik. Tsaynö kawarmi castigashqa kashun. Peru Dios Yaya patronnintsik kaptinmi sïqa salvakantsik.

17Unayqa jutsa ruraymi patronnikikuna karqan. Peru Jesucristupa willakuyninta llapan shonquykikunawan chaskishqa karmi kananqa Jesucristupa poderninchöna kaykäyanki. Tsaymi Dios Yayata agradëcikü. 18Jutsapa poderninpita librina karmi Dios Yaya munanqanta rurarna kawaykäyanki.

19Patronman iwalatsiypam parlapäyaq shumaq tantiyakuyänaykipaq. Unaypitanam jutsapa poderninchö kar melanaypaq kaqkunata rurar kawayarqayki. Peru kananqa tsaynö amana kawayaynatsu, masbien jutsa rurayta dëjaskir Dios Yaya munanqannöna kawakuyay.

20Jutsapa mandädunchö kawarmi Dios Yayata mana cäsur kawayarqayki. 21Dios Yayata mana cäsur ¿ima allitatan jipiyashkanki? Tantiyakuyaptikiqa tsay llutan rurayanqaykikunam alläpa penqakuypaq kaykan. Tsaynö kawayanqaykipitam wañuyanki.

22Peru kananqa jutsa ruraypita librina karmi Dios Yayapa poderninchöna kawaykäyanki. Tsaymi pay munanqannö kawayänaykipaq yanapaykäyäshunki. Tsaynö kawarmi paypa puntanchö imayyaqpis kawayanki. 23Jutsa rurayqa wañuymanmi apamantsik. Peru Señornintsik Jesucristo noqantsik rayku wañushqa kaptinmi Dios Yaya dembaldilla salvamantsik puntanchö imayyaqpis kawanapaq.#Prov. 12.28.

Currently Selected:

Romanos 6: qxn

Highlight

Compare

Copy