Romanos 7

Diospa leyninkunapa poderninpita yarqunqantsik

1Wawqikuna y panikuna, Diospa leyninkunata yacharmi musyayanki kawaqkunalla leykunata cumpliyänanpaq kanqanta. 2Tsaynöllam ollquyuq warmipis ollqun kawanqanyaq ollqunpa poderninchö kaykan. Peru ollqun wañukuskiptinqa librinam quëdanqa. 3Ollqun kawaykaptin jukwan kakurqa ollquntam respitantsu. Peru ollqun wañuskiptinmi sïqa tsay leypita librina kar jukwanpis kakunman.

4Wawqikuna y panikuna, Jesucristo cruzchö wañunqanpitam noqantsikpis Diospa leyninkunapaq wañushqanö kantsik. Tsaymi tsay leykunapa poderninchö kanqantsikpa rantin Jesucristupa poderninchöna kaykantsik. Paytam wañunqanpita Dios Yaya kawatsimurqan pay munanqannö kawanapaq.

5Unayqa jutsa ruraypa poderninchö kawashqam Dios Yayapa leyninkuna yarpätsimarqantsik jutsata mas ruranapaq. Tsaynö jutsasapa karmi wañushqanö karqantsik. 6Peru kananqa tsay leykunapa poderninpita yarqurmi tsay leykunapaqqa imayka wañushqanöna kaykantsik. Tsaymi tsay leykunata cumplirtsu Dios Yayata servintsik, sinöqa Espíritu Santu yanapamashqam.

Poderninchö jutsa ruray katsimanqantsik

7Tsaynö kaptinpis ama yarpäshuntsu Diospa leyninkuna mana alli kanqanta. Diospa leyninkunaqa allim. Tsay leykunata mana musyarqa jutsa ima kanqantapis manam musyämantsu karqan.

Tsay leykunachömi nin: <<Ama runa majikipa imaykankunatapis munapankitsu>>.#Éxo. 20.17; Deut. 5.21.

Mana niptinqa jukpa imantapis munapanqä jutsa kanqanta manam musyämantsu karqan. 8Peru tsaynö kaykaptinpis tsay leyta jutsa ruray utilizaptinmi masraq imatapis munaparqä. Diospa leyninkunata mana musyaptïqa jutsa ruray wañushqa kar manam yarpätsimanmantsu karqan.

9Unayqa tsay leykunata manaraq musyarmi kushishqa kawakurqä. Peru Diospa leyninkunata musyaptïnam sïqa jutsa ruray poderyuq tikraptin wañushqanö karqä. 10Tsaymi Dios Yayapa leyninkunata musyarpis alli kawayman chänäpa rantin wañuyman charqä. 11Tsaynöpam jutsa ruray engañamar wañutsimänapaq Diospa leyninkunata utilizarqan.

12Tsaynö kaptinpis Dios Yayapa leyninkuna y mandamientunkunam rasunpa alli y sagrädu. 13Wañushqanö kanäpaq manam Diospa leyninkunatsu jutsayuq, sinöqa jutsa ruraymi. Diospa leyninkunata utilizarmi wañuyman apamarqan. Tsaynöpam jutsa ruray alläpa mana alli kanqanta tantiyä.

14Musyantsikmi Dios Yayapa leyninkuna alli kanqanta. Peru noqaqa runalla karmi jutsa ruraypa poderninchö kaykä. 15Tsaynö karmi imanir jutsata ruranqätapis tantiyätsu. Allita rurayta munarpis mana munanqä kaqkunatam rurä.#Gál. 5.17. 16Mana munanqä kaqkunata rurarmi tsay leykuna alli kanqanta tantiyä.

17Jutsa rurayta mana munaptïpis shonqüchö jutsa ruraymi mana allikunata ruratsiman. 18Noqaqa allikunata rurayta munarpis manam puëdïtsu. Tsaymi musyä shonqüchö imapis allillaqa mana kanqanta. 19Tsaynö karmi Dios Yaya munanqanta rurayta munaykarpis mana allikunata rurä. 20Jutsa rurayta mana munaptïpis shonqüchö jutsam jutsa rurayman apaman.

21Tsaynöllam imaypis päsaman. Allita rurayta munarpis mana allitam rurä. 22Shonqüchö Dios Yayapa leyninkunata cäsuyta munaptïpis 23jutsa ruraymi alli yarpaynïwan maqanakuykan. Vencimar prësutanö katsimarmi jutsaman ishkitsiman. 24-25Noqaqa Dios Yayapa leyninkunata cäsuyta munarpis jutsa ruraypa poderninllachöraqmi kaykä. ¡Allaw noqallä! Alläpa llakipaypaqmi kaykä. Wañushqanö kanqäpita ¿piraq salvaykamanman? ¡Gracias, Dios Yaya! ¡Señor Jesucristum salvaman!

Currently Selected:

Romanos 7: qxn

Highlight

Compare

Copy